(有劇透)
澳門電影《熱唱吧》
今日香港公映，
相信香港應該好少人會留意。
-
前幾日睇，入場原因好簡單，第一係我想睇吓比香港呢個彈丸之地更細嘅地方，可以拍出點樣嘅電影。而第二個原因係我想睇「飛夢映畫」呢間公司，如果手握一個長片嘅機會，會拍出一套點樣嘅作品。
-
入場之前，當然打定底。《熱唱吧》喎，搵班人柴娃娃好似high school musical咁，吵吵鬧鬧應該就可以啦，作為第一套電影，寫啲中學生熱血眾志成城參加歌唱比賽，唔會有咩驚喜，但勝在夠老土，亦夠穩陣。
-
但睇完套戲之後，估唔到電影隱含咗一種意想唔到嘅沉鬱，喺電影入面，甚至連一場「熱唱吧」嘅場面都搵唔到，成套電影都係講緊女主角劉玉芳追夢嘅挫折同掙扎。
-
挫折同掙扎當然係另外嘅一啲公式，同輩嘅嘲笑啊，父母嘅阻撓啊，對自身價值嘅懷疑等等等，電影亦有一啲明顯嘅問題，例如演老師嘅周國賢太Chok，女主角陳慧敏演學生妹會吃力等等，但令電影仍然有一定可觀性嘅，係去到最後要觀眾自行領會、惹人深思嘅「命題」-- 究竟乜嘢係真正嘅「反叛」。
-
喺電影入面，女主角有三番四次「反叛」嘅行為，例如唔讀書呀，唔聽父母講嘢呀，掛住唱歌唔理所有嘢呀，喺街頭、酒吧賣唱，打交，唱粗口歌等等。一啲「反叛」無端，甚至玉芳自己都解釋唔到自己嘅行為，一啲「反叛」有理，點解學生一定要讀書？點解大個一定要考公務員？點解唔可以喺咁短嘅生命入面，追逐一啲自己真正重視嘅嘢？劉玉芳喺電影入面就係「乜都反」，每次都以為自己做啱，直到佢遇上咗曾經滄海，破格嘅老師張智仁，慢慢慢慢咁改變咗自己嘅價值觀。
-
喺結局嗰陣，例牌係一場歌唱比賽，又例牌理應係主角施展渾身解數嘅一場演唱，故事講劉玉芳比音樂公司睇中，精心但夾硬幫佢加上咗一個「反叛」嘅標籤，然後再上場唱一首壞女孩嘅歌，距離夢想，距離「爆紅」，只係一步之遙。
-
但最後，玉芳唔理經理人嘅反對，竟然唱咗一首鼓勵恩師，節奏慢到不得了，但佢好鍾意嘅抒情歌，雖然拎唔到比賽冠軍，但搏到咗全場觀眾驚喜嘅掌聲。
-
跌跌撞撞嘅中學生，由對於現實一切不滿嘅「盲反」，去到最後終於明白，原來真正嘅反叛，唔係一種形象或者公式，而係要敢於對身邊唔合理唔公義嘅事情出聲，而係敢於爭取，敢於對抗呢個世界嘅荒謬。
-
單單係呢個message，
我帶住滿足感離開戲院。
-
熱唱吧！
FreeDream飛夢映画
