【因材施教】
為人父母嘅，當然都希望自己嘅子女成材。所謂「望子成龍」，但其實每個人心目中嘅「龍」又係咪一樣？全部都唸住大個做醫生、律師、工程師？我地又有無諗過小朋友嘅長處喺邊度？我成日同大家講，我自己都係到咗大學時期先至開竅嘅：從一個怕怕醜醜，完全收埋自己嘅四眼龜（當時無「毒男」呢個term㗎，通常只會話我呢啲叫做「摺」）變成今時今日嘅開籠雀。
所以我唔會監自己個仔。佢先得果幾歲人，我有乜可能會因為佢見到陌生人怕醜、唔出聲而怪佢？甚至係鬧佢無出色？相反，我會俾多啲嘅鼓勵佢，同暗中透過一啲遊戲同課外活動去幫佢。例如我會俾佢學魔術。你諗下，變魔術嘅人係一定會四周圍搵人嚟睇自己。而喺過程中，佢唔單只唔怕醜，仲自信到可以喺別人嘅面前表演。而重點係：你唔需要監佢、迫佢，佢卻做到而不自知。
今日，我進化到俾佢玩電路板。你知啦，依家呢個世界，開口埋口都講STEM。起初，個傻豬見到盞燈著咗都無乜嘢。但到咗部收音機有聲果剎那，佢直頭成個人hyper咗，周圍去show-off！所以我想借呢一個機會同所有嘅父母講：教仔啫，鬧係無用嘅，嘗試下用不同嘅方法去啟發小朋友。只要你搵到佢個掣喺邊，你就可以好輕易咁撻著佢！係咁你咪唔洗勞氣，而細路又開心囉！
你睇下牛仔，幾proud of佢自己！
🐮🔋🔌💡😎
#教仔唔洗鬧 #開開心心教
