做香港人真係好艱難..
話說其實我屋企個姐姐已經係七月頭走咗..當然唔例外佢都係博炒啦..要比返一個月嘅通知金佢..再要比機票同埋交通費佢添..然後仲要好巴閉咁樣講搵到一個好好嘅僱主可以stay out！
我想講嘅係點解香港嘅制度會係咁痴線呢？就算佢博炒！就算佢辭職！佢唔做！我哋都要比機票錢、交通費、通知金？
就係因為有呢啲咁嘅制度先至會令到啲姐姐咁肆無忌憚！伍詠薇細佬個工人盜竊超過一百萬都係判監兩年！呢個數字根本成村人一齊打工都賺唔到呢條數！而家犧牲一個人兩年嘅自由就可以解救佢哋成條村！
姐姐偷嘢基本上已經唔係啲乜嘢新鮮事！好多人都遇過！報警又如何！通常搞完一輪大龍鳳！最後可能雙方協議唔使通知金斷約就算！然後嘅然後就係再有下一位無辜嘅雇主….
我哋香港人要去Working holiday都要自己買機票啦！又要財產證明依樣嗰樣！
我哋請一個姐姐包來回機票包食宿、生養死葬！總之就乜都包！
呢個時候可能就會有好多人沖出嚟講！係咁㗎啦接受唔到咪唔好請姐姐自己湊囉！呢個已經唔係單單一兩個家庭嘅問題！係成個香港好多人都面對緊嘅問題！
有人請姐姐係負責照顧年紀老邁嘅父母！有人就好似上述嘅媽媽咁樣要幫手照顧殘疾嘅小朋友！呢個世界並唔係每一個人都會咁幸福健全！
自己仔女自己照顧？自己父母自己照顧？冇收入點樣照顧？喺屋企唔做嘢拎綜援又有啲人喺度講有手有腳點解唔出去做野！呢個世界實在太多人鍾意為反而反！講嘢之前真係要尊重下自己尊重下人哋！每一句說話每一個留言都有機會傷到人哋嘅心.批評之前請三思
好多人都話我哋要齊心唔請斷約姐姐.但係其實有好多家庭都係逼不得已冇選擇！再加上而家疫情封關更加無奈！我真係好想好想知道究竟可以點樣做呢？有冇機構有冇議員可以幫我哋雇主發聲？人哋姐姐都有工會爭取人工啦！點解我哋作為僱主冇人幫我哋發聲？
其實我地嘅要求都唔係好過分啫..只係希望姐姐做到完約先可以領取機票錢、交通費！好多姐姐自己都會喺社交平台分享唔使錢仲有人包食宿就可以喺香港玩…玩夠仲可以拎錢返屋企…
當然有好嘅姐姐我自己七年前都曾經遇過一個.而家仲返咗鄉下結婚生埋小朋友.不過遇到好姐姐嘅機會率真係難過中六合彩…
有好多媒體平台都會經常分享雇主群組裏面僱主嘅辛酸..可惜佢哋嘅標題通常都係問答題..問吓大家點睇？問吓大家同唔同意？問吓大家有冇遇過？
好希望作為媒體平台係幫我哋香港人發聲..而唔係將個問題成為茶餘飯後嘅話題
