【白俄羅斯與 Xianggang的距離】
討論 Belarus 抗爭，記得用返「白羅斯」，唔好用「白俄羅斯」啊！人哋就係唔想同俄羅斯痴咁埋，特登改官方中文譯名。
對白羅斯抗爭者而言，「白俄羅斯」就好似「xianggang」咁難聽。
FB洗晒板，相信大家都知道來龍去脈：在位 26年的盧卡申科不承認最新選舉結果，有可能高票當選嘅反對派候選人被迫流亡，街頭抗爭不斷、警察暴力鎮壓。﹙未知嘅可以睇台灣聯合新聞網的整理：https://bit.ly/33ZrDBP﹚
白羅斯抗爭背後，同香港相似之處不僅在於抗爭手法同警暴：有隔離大國強行融合、有瀨俄共﹙？﹚瀨出 backfire嘅傀儡政權、有因武肺而起嘅民間自救、有 DQ。睇完之後，作為香港人，你會更加覺得白羅斯嘅抗爭者，值得你去聲援。
********
1. 點解白羅斯要同「白俄」劃清界線？
記得 2018年去烏克蘭採訪，講起同俄羅斯嘅恩怨，必會提及白羅斯：喺俄羅斯嘅史觀當中，俄、烏、白三民同源，皆為古國「基輔羅斯」﹙Kievan Rus'﹚子民，不過俄羅斯覺得自己係大佬，「自古以來」其他兩國都係佢嘅，烏克蘭只係「小俄」，白羅斯則為「白俄」。而家連烏克蘭都 hold唔到，白羅斯更加唔可以放。
俄白兩地政、社經緊密嘅程度係去到，烏克蘭人講起白羅斯，就好似香港人講起澳門咁樣。
融合由葉利欽開始，普京上任以嚟，更有意用「聯邦」方式直程吞併白羅斯，又想喺白羅斯起軍事基地。俄羅斯養住呢個「歐洲最後獨裁者」，但畀嘅好處都係為咗加強控制：俄方一直低價賣原油畀白羅斯，變相補助嘅金額一度去到相當於白羅斯 GDP 五分之一，但今年年頭突然話要停止供應、加價，並拒絕協商，除非白羅斯同意同俄羅斯喺軍事、政治、經濟上進一步融合。
近年，白羅斯已經多次爆發反融合示威，民眾擔心喺盧卡申科治下，白羅斯作為獨立國嘅地位不保。
2014年嘅烏克蘭廣場革命，令盧卡申科揣揣不安，擔心自己都會被人民推翻；但白羅斯人民亦都因而見到曙光，知道俄羅斯嘅控制唔係一世都擺脫唔到。
********
2. 盧卡申科點解要同俄羅斯對著幹？
俄羅斯嘅「祖國關懷」之霸道，連一直受莫斯科庇蔭先在位咁多年嘅盧卡申科都頂唔順，不得不嘗試與俄羅斯拉開距離，否則自己連總統都冇得做，只能做省長。
近年，盧卡申科開始向歐盟、美國、甚至中國示好，想逐步減少對俄依賴；去到選舉前夕，驚輸的盧卡申科使出絕招，出手拘捕 33個懷疑「俄羅斯僱傭兵」，嘗試擺出一款對俄硬起來嘅形象，甚至指控反對派候選人，係俄國大亨暗中出錢支持嘅「鬼」。
普京政府對盧卡申科亦都越嚟越唔耐煩。但如果今次盧卡申科因為保位而同歐盟再次反面，普京就可以坐收漁人之利，以協助控制局面為利誘，逼盧卡申科屈服，完全控制冇晒 bargaining power嘅盧卡申科，食咗白羅斯。
所以白羅斯抗爭今次一輸，真係會輸到連「國家」都冇埋。
********
3. 抗爭者係咪為咗支持反對派候選人走出嚟？
事實上，白羅斯次次總統選舉，啲反對派候選人下場都一樣，唔係坐監就係流亡。
2020總統選舉都未開始選，3個較有實力嘅候選人已悉數被「提名無效」， 2個拉入監倉，1人流亡去國。三人之中，甚至有兩個都唔係咩「抗爭陣營」，而係當地精英階層推舉出嚟嘅挑戰者，都要面對如此待遇。
示威喺選前己經爆發，未選就拉咗 600幾個抗爭者、記者。最終代表反對陣營出戰嘅，係37歲嘅 Svetlana Tikhanovskaya，佢係其中一位被捕候選人嘅太太，係臨危受命出面挑戰盧卡申科嘅 Plan B。
對此，盧卡申科講咗一句：白羅斯冇人會投個老婆囉，個社會唔 ready投畀女人。佢嘅理據係：憲法要求總統強勢主導，所以憲法下女人唔適合做總統。
輕敵放人入閘就啱啦。
於是喺「 anyone but 盧卡申科」之下， Svetlana就搞到盧卡申科輸到造票都唔掂。不過，Svetlana 喺示威爆發不久後就流亡立陶宛，仲多次呼籲示威唔好咁暴力，同勇武「割蓆」。
然而，當日投佢嘅選民，有不少只係為唔投盧卡申科而投，所以示威者之間，對 Svetlana 是否支持都未必一致。人民係為咗公義行出嚟，唔係為特定候選人。
********
4. 點解鎮壓咗 20幾年，盧卡申科今次會控制唔同局面？
因為俄羅斯嘅好朋友 — 中共輸出武肺啊。
為防經濟爆煲，盧卡申科拒絕頒佈 Lockdown命令，仲夠膽死同國民講「飲多兩啖 Vodka咪得囉」，一定要人返工，結果武肺大爆特爆，近七萬人確診，死近 600人。白羅斯本來就面對緊 25年嚟最嚴重嘅經濟衰退，加上政府應對武肺嘅差勁表現，盧卡申科頓變人民公敵。
而疫情有更重大嘅影響：喺一個極權國度，掀起「民間自救」風潮。
盧卡申科不承認疫情嚴重、官方數字不可信，白羅斯人想知道真實情況，唯有靠民間資訊。唔少人 search 吓 search吓，接觸到獨立媒體，亦因此見到官方宣傳以外嘅選舉新聞。
政府無能，白羅斯民間「疫下自救」，老闆主動要員工 WFH、民眾集資買裝備送畀醫護。呢股民間自行組織嘅慣性，轉化為政治運動參與，由做義工幫候選人收提名、到 TG吹雞示威，抗爭嘅唔再係多年嚟熟口熟面嘅「反對派」，而係因疫情自救而打開參與之門嘅一般人。
啲嘢做開、做慣係會有條路：一位醫生同反對派候選人同場，批評政府防疫不力而被炒，24小時內，民間就眾籌返一年人工畀佢；Tikhanovskaya被 DQ，Svetlana喺極短時間內就收集到所需嘅 10萬個提名去參選。
亦因為此，選後白羅斯會瞬間爆發出咁大規模嘅示威。
*********
白羅斯抗爭者用TG、 Be Water、模仿香港抗爭者裝備，相信大家都睇唔少，而彼邦嘅警暴，比起香港有過之而不及。不過，猶幸佢哋比香港更早得到回應：白羅斯政府釋放數千被捕者、道歉，外長尋求與其他國家就大選問題協商。喺歐洲國家加強制裁嘅壓力下，重新點票、甚至重新大選是否在望？絕對唔會善罷甘休嘅俄羅斯又會點樣出手？需要再觀望。
你可能會諗，點解人民對抗極權嘅故事，來來去去都係咁相似﹙尤其是當個極權係中國或者俄羅斯﹚。不過，只有曾經有過同樣經歷嘅人民，先會明白抗爭唔係畫面睇得咁簡單，唔係親歐 VS 親俄或親中 VS 親美咁表面，而係有血有淚，有人承受緊難以想像嘅壓逼，先會以性命相搏去反抗。
香港人，撐白羅斯！
vodka中文 在 環星創意股份有限公司- 請問ABSOLUT VODKA的中文品牌名稱 ... 的推薦與評價
請問ABSOLUT VODKA的中文品牌名稱為? →今日好禮是ABSOLUT VODKA在12/2的時尚派對入場貴賓票一張喔~(可攜伴一名) ... <看更多>