［夕霧—花園］人類文明沒有最低，只有更低。新沙士，伊朗打仗，澳洲山火，都冇呢件事咁恐怖。 Consulate General of Italy in Hong Kong 連 Pizza 落菠蘿都不能忍受嘅，而家對方等同宣戰，考慮下出個嚴正警告。
唔止一個朋友都send畀我，明顯我已經成為人類文明守護者了。彼邦扶桑國早已淪陷（http://bit.ly/2MXODIo）（http://bit.ly/37xWaW6），咁文明嘅日出處天子國搞成咁，真係人類好快滅亡
又，都唔係話富貴咗要求唔同。即係我而家都仲食麥當勞KFC大家樂。但Pizza Hut肯定畀我細個食嗰時差咗好多。明明細個時啲香蒜肉絲意粉就巧巧食，白汁乜乜寬條麵又正（老母至愛），個忌廉磨姑雞湯就有忌廉味有磨姑味仲有雞味，特飲仲有啫喱條，就仲未有芝士批呢啲挑戰人類文明嘅東西（更不用講拎手搣出嚟嘅東西）。
當然亦係一分鐘一分貨，以佢價錢不能有咩要求。但個品牌幾時開始下流，幾時開始變劣食呢？
不過講開又講，我大學年代成日食花園餐廳，都成舊水。當時覺得好好食，早兩年去就當然係屌住走。但我朋友堅持咁多年都係咁難食，只係我而家要求高咗云云。但我幾肯定當年係OK的
再講開又講，當時食親都係兆萬嗰間花園。原因應該係因為當年（大學）成日蒲旺角。有書店（我巧有文化的），有VCD舖（正經嘅，四仔就兆萬買啦傻仔），有戲院，有老翻賣，咩都齊咁。
甚至好似到我教書時都仲會食，可惜唔係同女同事食，亦都唔係同安雅食。係同男同事食。我仲會同個男同事去哥登堡食（梗係唔係瑞典啦），另一個就會去沙藥美。然後我地齊齊會去東京食—梗係唔係一年去幾次日本啦，係兆萬過啲，好似信和隔離嘅「東京日本料理」。當其時食嗰啲沙侓醬壽司好開心架啦。邊似而家MK妹都講噢媽卡些
又其實本專頁好似少講，但資深讀者知我成日講我老豆。而呢間兆萬嘅花園餐廳，居然都同我老豆有關。亦都係佢帶我去（唔通帶我去食Ruth Chris？）。我見佢叫嘅T骨扒咁大塊，打後次次都叫，包括讀大學時同教書時。仲係因為佢先知道可以加個白飯。鬼佬就屌死你了。
而呢間兆萬嘅花園餐廳，我仲同我第二個女朋友去過—堅靚女，堅係堅靚女，甚至好似靚過我之後任何一個女朋友（可見我嘅人生都幾失敗）。不過唔係拍拖時去，拍拖時我先中六佢先中二定三（嘩屌！）。係佢後來出國讀書（所以分開），N年後，我讀大學時，佢返香港，我就居然帶條女去食花園餐廳。唔怪得冇下文，我著件夏文嘅波衫都冇下文。係喎，著件夏文帶條女食花園餐廳都想有下文，青春真好
（Fact check下 ，我大學年代就係夏文剛冒起之時。講返條女，其實從來都冇下文，當年拍拖時人地都未夠秤，本人奉工守法的，埃汾亦都寫過佢係大學一年級下學期，即係1998年2月14號失去處子之身的，呼）
然後又多年後，我已經演化成為怪叔叔。都唔知點解，有一鑊就同條Ｏ靚妹，去食Pizza Hut。就係兆萬隔離（家樂？）間Pizza Hut。好衰唔衰畀個朋友撞到我，同我明顯細我十年有多嘅妹妹仔一齊，佢應該覺得我好有愛心。
嗰次應該係我最後一次食Pizza Hut。之後好似2006年世界盃叫過外賣，還好。當然係食薄批。食厚批嘅人係落地獄的。Period
呀，都唔記得講。當年教書阿蛇團真係劣食團。除咗兆萬花園，「東京」日本料理，哥登堡（！）沙樂美外。我地仲會去倫敦打邊爐—就梗係旺角嘅倫敦大酒樓啦。唔止，我地仲會去食，明將，後來好出名嘅明將。當時嘅新世紀廣場有間。嗰時覺得幾好食。邊似而家又話要乜撚白身魚赤醋飯咁撚多花臣丫。不過倒係冇食過午餐肉壽司
呼，一個Pizza諗起咁多劣食，居然講到花園餐廳，同埋講到女。可見我嘅人生都係吃喝玩樂拉撒睡。但冇啦，都回不去了，人要進步嘛。都係初戀嗰時第一次拖女仔手硬（？）足全日添。如果做人咁就滿足，人類絶晒種啦。
補白：年紀細細嘅埃汾，差不多每次都要同同學一齊食厚批。因為屯門窮撚牛屎仔覺得厚批多啲粉抵食啲又飽肚。就連埃汾老母都好似咁覺得。埃汾嗰時發誓第時有錢自己叫一個薄批自己食撚晒佢，唔再同呢啲人為伍，結果佢做到咗。真係細細個就睇到埃汾係幾咁有主見，唔會隨波逐流，堅持自己原則，唔會只滿足於飽肚咁小農層次（簡稱：麻撚煩扮撚晒嘢）
