寫於國安法通過前，
之後唔知仲可唔可以咁樣寫?
-
近呢兩三個月，香港人喺極權嘅步步進迫之下，好多人都開始諗移民嘅問題，希望可以逃離中國共產黨嘅控制，呼吸自由嘅空氣。
-
呢個問題亦纏繞喺我個腦入面好耐，先唔講有無能力走，撇除經濟或者任何嘅規限，面對壓迫嘅處境，應該留低，定係離開?
-
結果，好多戲院都會重播經典舊戲，例如我最愛嘅《我的野蠻女友》，我尋晚就去戲院睇咗《Mad Max》嘅重映，喺圓方嗰間PREMIERE ELEMENTS嘅4K巨幕上重溫呢一套當代動作電影嘅頂級傑作，第三次入場睇，我先至發現自己從來都無真正理解佢個故事。
-
《Mad Max》嘅世界觀，成個世界變成一個荒涼不毛之地，簡而言之，就係一個簡化咗嘅未來世界，出現軍閥割據嘅情況，資源例如女人、土地、石油、人力都被壟斷，而統治女主角國家叫「西方堡壘」，嗰度嘅皇帝Immortan Joe就係因為控制住地下水源，所以能夠雄霸一方，以高高在下嘅姿態統領萬民，得到百姓極端嘅膜拜。
-
而故事嘅主線，就係講女主角Imperator Furiosa喺一次國家任務當中叛變，將暴君喺國家入面五個秀色可餐嘅老婆帶走，尋找世界上一塊神秘嘅樂土—綠洲。
-
換言之，Mad Max嘅故事一字寄之曰——「走」，不停地走佬，比人伏擊，然後再走佬。面對暴君嘅魔爪，男主角M ax同女主角Furiosa因為被迫同埋主動嘅原因不斷要走，而戰車就係一眾角色嘅載體，協助眾人去到理想中嘅桃花源。
-
走定唔走？要點樣走？呢個問題纏繞住電影中嘅角色，亦纏繞住2020年嘅香港人，故事入面嘅“GREEN PLACE”，就係香港人想移民去外國，享受自由生活嘅希望。
-
但當電影做到四分三嘅時候……
-
女主角Furiosa同佢以前喺綠洲嘅戰友重聚，原來佢細細個就比Immortan Joe捉走咗，一別已經係7000日嘅時間，眾人以為自己已經去到傳說中嘅綠洲。點知戰友就話，原來真正嘅綠洲一早已經被摧毀，土地酸化，樂土經已唔存在。
-
當每個地方都有自己問題嘅時候，香港人移民嘅綠洲，究竟存唔存在？
-
本來，男女主角同埋一眾老婆and戰友，希望可以用160日嘅時間尋找新嘅綠洲，就好似香港人知道而家嘅香港已經不宜久留，不斷搵唔同移民嘅方法，走去邊都好，得唔得都好，都一定要走，誓要呼吸自由嘅空氣。然而……男主角Max喺整裝待發，準備繼續趕路之際提出咗另一個建議。
-
佢話，與其漫無目的咁去搵一個唔知存唔存在嘅綠洲，咁點解唔返轉頭，番返去有水有花草樹木嘅地方，番返去本來就屬於大家嘅地方，男主角嘅說話感動咗其他人，於是佢哋就決定折返，同暴君拼死一戰。
-
喺故事嘅最後，喺主角團隊有人命傷亡嘅情況之下， Immortan Joe敗北，男女主角帶住暴君嘅屍體入城，人民初時懷疑，但見到Immortan Joe條屍之後就開始瘋狂，原來人民一直以嚟對佢嘅膜拜只係虛偽嘅幻象，每個人都恨不得將佢碎屍萬段。
-
Immortan Joe嘅中文譯名叫做不死喬，但從第一幕戲開始，觀眾就睇到佢嘅身體有極多嘅毛病。我哋成日都以為極權統治者有超乎常人嘅能力，可以長生不老，但原來喺暴虐無道嘅表皮之下，佢哋可能比正常人仲要廢，仲要虧。強權唔一定穩固，依靠人嘅反抗，可能會以意想唔到嘅速度陷落，人民終究會戰勝歸來。
-
將Mad Max嘅故事擺入今日我哋嘅處境，面對國安法嘅如狼似虎，大家會走，定係守？This is a question.
