［領展都盈警！嘩！］被視為最「穩陣」嘅領展都發盈警！但唔減派息。即係點？
1. 嚴格嚟講你可以話唔係盈警，係「2019冠狀病毒病對領展之影響」。但明啦。嚟緊出嘅業績，見紅。3月年結的，即係2019年4月至2020年3月呢12個月，見紅。而上半年（2019年4-9月）當然係冇見紅。
2. 印象中好似領展第一次發盈警，但凡事梗有第一次。香港GDP都第一次跌9%，美國GDP嚟緊都會第一次跌三四十個%（你冇睇錯，係三四十，唔係三四）。都係第一次。
3. 講返，「穩陣」？收租都可以見紅？是的。為甚麼不。如果唔會嘅，人人都仆住去做啦。又唔係要專利或乜。
4. 事實，中電（2）發電都發到發盈警（https://bit.ly/2YyDWCG），港鐵（66）都發過盈警（https://bit.ly/2Wu1Nk4）。兩單我都寫過。我以為大家見慣大場面？
5. 好，記住，兩樣嘢。睇點解，同量化。
6. 首先，點解發盈警。係咪租跌？唔係。係都冇咁快影響到。第一原因係，物業估值預期下降，revaluation loss．小小技術但應解得到。你公司拎住啲投資物業，每年升升跌跌，都會影響你盈利—係呀，不存在未賣就唔當蝕或賺呢回事。每次出業績就同你mark to market．除非你係自己用嘅物業，即係你恒生自己用嘅舖唔使呢個過程，但恒生都有舖收租，嗰啲就要mark．
7. 咁所以，會搞到啲盈利上落好大。而一般分析員基金經理，都會剔開呢舊嘢唔睇。雖然係非現金，但，會影響盈利，亦即係可以影響派息（但領展情況有啲唔同，之後解）。蝕一年當然可以派息，但蝕到之前啲「滾存利潤」都冇晒，就不得派息了。
8. 咁所以，直接啲，當然都影響盈利，但，相對地唔係「核心」嘢。浮雲啫。賺嗰時亦唔會好得戚。同埋，non cash嘅（＊）
9. 至於第二點，「同舟計劃」云云，支援商戶，但好似冇乜點減租。不重要，呢度唔係鬥地主。個「同舟計劃」，講緊3億，同埋可能係未用晒嘅。
10. 最緊要乜？量化嘛。3億。領展一年收租係100億港紙。減除開支係近80億—之後就會有嗰啲revaluation gain/loss 呀或者賣物業realize嘅賺蝕咁，同埋稅—3億，點睇都唔係大數。
11. 如果講book value，更加不得了，領展嘅book value 差不多2000億。3億嘅影響，好細。同revaluation loss相比，可以不理。
12. Revaluation loss幾多？其實通告入面有講（https://bit.ly/2Ww45zs），270億。嘩！
13. 首先，就話你知，「同舟計劃」嗰3億，同Revaluation loss比，零頭嚟啫
14. 另外，270億 Revaluation loss，係咪好多？睇你點睇。量化就係堆投資物業估值跌咗10%，sounds fair？我知旺舖跌咗好多，但領展係公屋商場呀車位呀多喎。
15. 其實睇返領展早兩年業績（https://bit.ly/2WlKwto），個Revaluation gain，上年係122億，再早一年係355億！所以而家呢個270億Revaluation loss，射程範圍啦，粗淺講就係嘔返之前兩年Revaluation gain咗嘅一半咁咯
16. 最後，派息。點解公司蝕錢仲派息，仲要唔減？
17. 其實我一路都想寫「派息」，但怕畀人話教壞細路。因為我會將佢形容為性交。有機會詳解，但，即係有啲公司蝕錢派息，就感覺好似條女畀人飛
（條仔都得，男女平等），咁就用性去留住人咁咯。我發毒誓呢個比喻唔係我作的。
18. 不過，領展唔係呢種情況。唔係佢唔做，又唔係不屑做。如果我理解冇錯，佢係必定要做的。Guaranteed sex. So Wonderful．Wonderful過 Wonderful Sky （＊＊）
19. 居然有Guaranteed sex？其實都係有的。債券啦。仲有，REIT嘛。小朋友，領展由頭到尾都唔係「股票」
20. 即係點？即係話，如果我冇理解錯，或者大家都有聽過，你買收租股（例如希慎）同買REIT最大分別係乜？係REIT一定要派9成息畀你。聽過下架可？
21. 咁你話，蝕錢喎，仲派乜？
22. Nonono，派9成，唔係9成of個會計盈利，而係9成of 個「可分配收入」.
23. 甚麼是「可分配收入」？可以睇條文，但，就類似「核心盈利」咁，頭先講嘅嗰啲270億嘅Revaluation loss，係絶對唔影響派息架！係咪好Wonderful 先！係咪Wonderful 過Wonderful Sky先！
24. 當然啦，亦都解釋咗，點解好景嗰時，仲有兆萬嗰時（OK，好爛），公司你見明明話賺好多，但都好似冇派晒，咪又因為Revaluation gain，不計入「可分配收入」。唔好又話人呃你
25. 最後，咁嗰3億「同舟計劃」，會唔會影響「可分配收入」，影響派息？我估會，但可能錯，但錯都冇所謂，3億嘅嘢，不重要啦。請重睇樓上一次。
26. 最最後，跌幾多？唔知。咁史無前例出盈警可能震下嘅。但我估唔會多。既然都唔影響派息，問題似乎不大。固然你個book value 冇咗270億（講到跌咗條薯條咁輕鬆喎），但，Revaluation gain，浮雲嚟啫。今年舖租咁嘅款，冇理由好意外。
27. 最最最重要係，股價都在低位啦。跌得幾多丫。
（＊）雖則，例如國泰，或者今晚（星期一）隻德娼奠姬咁，write off 一大舊，幾十億幾百億嘅goodwill 都係 non cash —因為你一早畀咗嘛！而家變鹹水海咁解。
（＊＊）作為一個分析員我當然同Wonderful Sky有啲來往。啲人真係Wonderful的，冇引號非曲。但我一諗就諗到呢個gag，冇法。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
