關於 fulltimeheadhunt ，我們在網路上蒐集到這些相關的討論、資訊與評價

簡易版MBTI測驗

4條問題發掘職業取向

正所謂「知己知彼，百戰百勝」，搵工嘅大前提，其實就係「知己」。要清楚了解自己嘅性格特質同興趣，先可以搵到自己心水嘅工作。大家快啲黎測試一下你嘅十六型人格，同適合啲咩工作啦！


Q1. 以下哪種情況令你覺得更自在？
A. 有朋友陪伴 (E)
B. 獨處 (I)


Q2. 學習新事物的時候，你更偏向…
A. 看直覺/興趣，選擇性學習、記憶(N)
B. 邊看邊學，著重實踐成果 (S)


Q3. 當你要對某事件作出決策時，你會…
A. 將邏輯和公平放在首位 (T)
B. 優先考量持份者感情和睦 (F)


Q4. 以下哪種情況較貼近你的生活方式？
A. 生活井井有條，將事情提早安排好 (J)
B. 不跟規劃走，做事即興 (P)

結果：
INTJ 建築師
富有想象力和戰略，一切盡在掌握之中

適合職業：作家、研究學者

ENTJ 指揮官
大膽、富想象力且意識強大，總能使問題迎刃而解

適合職業：研究學者、管理層、律師、建築師

INTP 邏輯學家
具創造力，渴望知識

適合職業：教授、研究學者

ENTP 辯論家
聰明好奇，喜歡挑戰自己

適合職業：記者、影視製作


INFJ 提倡者
理想主義，安靜而神秘

適合職業：室內設計師、獸醫

ENFJ 主人公
富有美麗和鼓舞人心的領導者

適合職業：HR、PR、牧師

INFP 調停者
利他主義，善良熱情

適合職業：演員、創作者、音樂人

ENFP 競選者
熱情、有創造力的自由靈魂

適合職業：管理層、CEO


ISTJ 物流師
注重現實，實際並可靠

適合職業：會計、程式編寫員

ESTJ 總經理
出色的管理者

適合職業：學校/企業管理層、廚師

ISFJ 守衛者
非常專注且溫暖，守護身邊人

適合職業：秘書、社工

ESFJ 執政官
極有同情心，樂於助人

適合職業：幼稚園教師、醫護人員


ISTP 鑒賞家
大膽而實際，擅長使用任何工具

適合職業：木工、電工、分析類工作

ESTP 企業家
聰明、感知力強，懂得享受生活

適合職業：紀律部隊、財務顧問、項目經理

ISFP 探險家
靈活有魅力，時刻探索新鮮事物

適合職業：設計珠寶、鐘錶維修、手作行業

ESFP 表演者
主動、精力充沛，對生活充滿熱情

適合職業：客戶服務員、售貨員

性格冇分好壞，最緊要同職位契合，工作起上嚟先更見成效。無論係獵頭甚至喺Career Coaching上面，我都導入了好多MBTI元素：向客戶講解求職者性格，同企業性格係咪一個契合；從求職者角度出發，教佢點樣喺面試嘅時候展現自己嘅性格特質。

希望大家都可以多啲了解自己，搵到適合自己嘅career path啦！

#FullTimeHeadHunt #Fillture #全職獵人 #求職秘笈 #16型人格 #MBTI #心理測驗 #職業導向 #生涯規劃

如果你都想喺職場上有得揀，搵我哋幫你！而家接受八達通消費券！今個9月仲有現任HR團隊Career Coaching 限時優惠、及Big4優惠：https://wa.me/message/HODW7VGMWFAGL1

—————————————————————

免費下載2021 薪酬報告：https://fillturecareercoaching.co/salaryreport2021/

—————————————————————

立即追蹤全職獵人FullTime Headhunter各大社交平台，搶先獲得各種最新職場資訊！
最新職位空缺：https://instagram.com/fillturegroup
最新職場情報及冷知識：https://instagram.com/fillturecareercoaching
全職獵人：https://instagram.com/fulltimeheadhunter

—————————————————————

讀者投稿、廣告合作現正開放中，歡迎電郵至info@fillturegroup.com

《用公司流動現金溝女，其實得唔得？》

「拖糧」其實好似COVID-19，冇人想中，一個中，就感染晒全公司，隔離幾行的密切接觸者齊齊遭殃無一幸免，然後中招者全部自我隔離，原因係冇糧出冇錢出街。呢個「疫症」喺新聞聽得多，「某某公司被凍結資產，欠薪近百名員工」，「某某航空公司拖欠員工薪金，傳裁員逾千人」，「某某工程爛尾拖糧，員工苦主追數無門」，「大批被拖欠薪金的員工包圍公司大樓，掛起『有汗出無糧出』的橫額投訴」…… 聽得多，潛移默化都覺得呢個「疫症」似世界末日，辛辛苦苦的血汗錢凍過水，亦要擔心公司是否要執笠，係一種食唔安坐唔落的煩惱。可怕嘅係，呢種看似遙遠、事不關已已不勞心的「疫症」，偏偏讀者Joe「感染」咗。

阿Joe喺一間start-up公司做會計，老闆Lucas Chan係一個典型富二代，外國回流返嚟，識講幾句帶有美式accent的英文，公司係Lucas個富爸爸打本俾佢開，所以佢唔太上心，只懂掛着「初創企業老闆」的頭銜去四圍溝女。

「Joe呀，我最近同個大波空姐date緊呀，佢有41吋long leg㗎！俾佢張相你睇吓，真係睇得又打得又食得，硬晒！」Lucas講到興奮的同時口水都噴咗2滴出嚟。Joe心諗，咪又係出邊嗰啲整容KOL，即係永遠自己一個去旅行嗰啲，個IG永遠都係得自己的照片。

隔咗兩星期，Lucas居然同Joe講：「I’m committed，我女友就嚟birthday喇，佢話想喺Rosewood 搞喎，你幫我book間套房呀，要望海㗎！」Lucas 指示Joe。

「你Committed？哦……大波長腿空姐。」Joe無奈地反咗兩下白眼，因為Lucas每次都以「小公主」稱呼自己啲女友。

「Joe呀，你估小公主鍾唔鍾意紅玫瑰？幫我訂9999支紅色嘅，唔要999枝呀，太cheap喇，我要再威啲冇人試過嘅！Birthday嗰日送去Rosewood啦，呀…仲有，喺間房整多啲氣球，我要嗰日做全酒店最威嗰個！同埋間房係咪都係隔聲、睇海景，我鍾意對住個海❤️我依個白馬王子要請公主食蘋果。」Lucas繼續口若懸河，笑語間帶有幾絲淫意。

阿Joe終於忍唔住：「老闆呀，上次你寫俾空姐張100萬支票都彈咗票……依家9999支玫瑰、氣球連酒店要十幾萬呀！」

「得㗎喇，啲數返嚟就夠錢，啲客拖我哋數，我都唔想㗎！你……用住公司啲流動資金先啦！」Lucas一邊揮住手不耐煩地說，一邊走向公司大門。

「下……老闆，上個月份糧都……」Joe都未講完，Lucas已經離開咗，應該趕住去半島同空姐high tea。

原來Joe個老闆為咗溝女都可以去得好盡，鍾意用公司錢，上個月份糧都遲咗一個月先出，另外仲鍾意使人唔使本，空姐生日過後，除咗留低咗一系列的打卡呃like相外，仲有就係一堆垃圾同影完即棄的9999枝玫瑰。

「Joe你搵人清咗間房d 波波、DomDom、蘋果（真係有蘋果！）同花佢，$500搞掂佢啦！我依家出去食個飯，係我check out 之前搞掂佢！」Lucas叫Joe去執手尾。

其實垃圾可以自己丟，但少爺仔老闆錫身，又花盆又泥又成地「濕紙巾」咁嘅粗重工夫，當然係由Joe去做。經此一疫後，Joe嘅公司數未返，流動資金都用晒，轉眼間又到咗出糧日。

「同事遲到喎，合約寫明返十點，你幫我扣返啲糧呀。」Lucas開始諗縮數，但都係唔夠錢出糧俾員工。

「5月份糧，6月30日出，6月份糧，依家凍過水。」阿Joe心諗，而佢塊面都愈嚟愈灰。

轉眼間，又到七月嘅某一日，Joe趁未放飯，火速跑去老闆房，但完全唔見Lucas人影。佢成張辦公枱七國咁亂，啲收據同文件堆到周圍都係。唉，月尾埋數真係慘過打仗，陰功…

「祖哥…」一把軟弱無力嘅聲傳過黎。

「哇！Peggy你匿係度搞乜？」Joe踎低見到Lucas嘅私人助理踡縮係枱底，個樣生無可戀咁款。

「冇啦…冇啦…」

「咩冇啦，起身啦……比老闆返嚟見到你喺佢枱底，你條命就真係要冇啦！」Joe費盡九牛二虎之力將Peggy扯翻出黎。

「我地公司要玩完啦…」Peggy雙目無神，臉色蒼白，靈魂係個口到飄咗出黎，手震震遞咗幾張發票俾Joe。

「點解突然有個六十萬嘅item?!」Joe嚇到下巴跌咗落地。

「祖哥…你估仲有邊個敢郁公司啲錢啊嗱…」Peggy說。

「妳係老闆PA都唔知？阿妹妳等等…」Joe轉身即刻打電話俾少爺：「喂？Lucas，係呀阿祖啊，想問呢你呢排有冇碌過條六十萬嘅數啊？」

「六十萬？」唔好扮唔記得啊，一定係你啦，細陳！

「多謝bb！我好鐘意啊！」少爺仔隔離傳來「小公主」刺耳嘅撒嬌。

「哦！係呀！前幾日我自己張卡唔知點解碌唔到嘛，咪過咗少少公司錢買Hermès俾璇璇咯！唔記得同你講翻，sor9y呀~」

「唔緊要，我哋宜家幫你mark翻低吓…」Joe客氣地和老闆說。背後心諗：「點解？點解？點解？同事一直都未出糧，個二世祖用公司錢六十萬買手袋比隻雞？！」

「BB你唔準傾電話傾咁耐啊！嗶——」少爺仔已cut線。

「Peggy…條友攞啲錢去買Hermès…」

「Hermès也好，DIOR也好，條數埋唔到架啦……唔通真係當藝術品投資咩？水哥，今鋪真係想幫細陳生抿屎都愛莫能助……」

「都可以當係公司投資，個包包可以換鮑鮑，將來或者可能會升值添！」Joe語帶諷刺地說。

「祖哥，我好想告佢虧空公款啊啊啊啊啊啊啊！」Peggy已抱頭奔潰。

「上個月已經因為Lucas攞公司錢買私人嘢，搞到全公司啲員工遲咗成個月出糧。佢拍曬心口話今個月會入翻公司戶口。結果冇…都算！呢頭又穿櫃筒底，仲要係六十萬！古有昏君不愛江山愛美人，今有細陳利用江山追女人：Joe，我都唔知應該話少爺仔係昏君，定話小公主係紅顏禍水好，最慘係我哋，騎虎難下，如果而家辭職，真係唔知幾時先收得返之前幾個月嘅人工。」作為私人助理，Peggy開始失控，爆喊。

獵頭小知識：

🔝各位打工仔，根據《盜竊罪條例》第9條，如任何人不誠實地挪佔別人的財產，意圖永久地剝奪該另一人的財產，即屬盜竊罪，最高可被判處10年監禁。而根據第16A條，如果任何人以任何欺騙手段意圖欺騙另一人，為受騙人以外的任何人取得利益，或令任何人蒙受不利，均會被指控為欺詐罪，最高可被判處14年監禁。唔好縱容挪用公款嘅腦細，望周知。

🔝其實無論係公司生意失敗周轉不靈，定係疫情影響令公司生意營運唔到，或係老闆不愛江山愛美人洗晒公司啲錢，喺任何理由及情況下「拖糧」都係犯法，根據《僱傭條例》規定，僱主必須係工資期屆滿後嘅7日內出糧，僱主如果未能依時出糧，必須就欠薪支付利息俾僱員，僱員如果超過 1 個月仍未獲發已到期嘅薪金，可以視呢份「僱傭合約」已被終止，呢個時候僱主就必須支付僱員「解僱代通知金」及其他解僱賠償。僱主如故意及無合理辯解而不依時支付工資給僱員，可被檢控，一經定罪，最高可被罰款 35 萬元及監禁 3 年。萬一大家不幸地中招，記得搵勞工處求助，幫自己追討欠薪，如果仍未解決，就可以選擇告上法庭……不過應該冇人想行到呢一步。所以，入職前了解好公司同老闆背景好重要，記得上官網睇下公司架構，又或者上網爬文，睇下有冇人講過公司的文化，又或者可透過獵頭公司介紹，做齊以上事項，又有獵頭幫你scan過，應該會放心好多。

#不愛江山愛美人
#有錢但唔識理財又有咩用
#打工仔被腦細伏雷死的悲哀
#全職獵人職捱自救企劃
#FulltimeHeadhunt #全職獵人

新書訂購：https://docs.google.com/forms/d/1tjPYjkZpYiQDzv_V3PrKgxj78FUim57G7RDZa6KWBT8/

《專業係咩色》

冷氣吹到成間會議室好似停屍間咁，面試官不苟言笑，托咗下眼鏡，徐徐問志文下一個問題：

「你平時買開邊份報紙架？」

「《東方》。」志文下意識答咗今朝買嘅報紙，額頭慢慢滲出幾滴冷汗。

面試官咧嘴微笑：「Second-in嘅資料同事會呢幾日send俾你，加油。」

呢一刻，志文唔知應該慶幸《蘋果》早就消失於世上，已經冇得再被佢「買開」，定慶幸老豆今朝叫佢落街買報紙，七仔個架上面得翻幾份《東方》。

噢，你想問志文係黃定藍？呢個問題我諗佢本人都未必答到你。

佢中意睇《蘋果》，同朋友傾計得閒爹兩句鬧下政府，ig轉發新聞嘅caption義憤填膺咁。與此同時佢係Yuu會員，每次m記出新包都即刻撲去試，搵咗幾間心水公司原來都係中資。

你話佢黃？佢份人係幾撐本土嘅。你話佢藍啊？佢又真係周不時幫襯藍店。港豬？佢又唔係唔關心社會架喎。

究竟係幾時開始，政治、顏色同我地嘅生活，以至工作專業掛鉤？讓我地倒帶翻去2019年志文嘅一場面試。

——————

嗰日，好似係全民罷工大遊行黎。朝早有人塞鐵堵路，但志文去見工嘅時候已經係十點幾十一點，道路暢通無阻。

佢去到間公司，見到前面嘅求職者同一個員工爭論緊。

「唔好意思啊，今朝塞鐵，我轉搭巴士但係紅隧有路障，所以先遲咗咁多。我今朝有打電話黎交代翻㗎，可唔可以俾多次機會我？」

「但後面仲有好多人等緊去in㗎…」

「求下你啊，可唔可以幫我問吓先？」

「發生咩事？」面試官似乎聽到動靜，係會議室出黎，得知事件始末後講道：「我都好同情你嘅遭遇，唉，啲人日日搞事，香港真係不得安寧！」

求職者一怔，欲言又止。

「不如咁，你係度等下先，我in埋呢幾位candidate再安排你面試好嘛？」面試官示意剛才嘅員工安排，轉身入翻會議室。

「先生，咁請你嚟呢邊坐坐啊。」

「唔好意思啊，多謝你地肯俾機會我，但我突然醒起我有啲急事要走先，實在抱歉…」

當志文同佢側身而過，隱約聽到對方呢喃：「又唔諗下係邊個逼到我地要搞事…」

——————

「下一位，林志文。」

面試上半場順順利利地過去，面試官視乎對對志文嘅工作經驗同性格都頗為滿意，直到…

「啊by the way想問下你平時週末會去邊？」

呢一個月，每逢星期日都有遊行，面試官嘅暗示眾人皆知。

「睇情況啦，有時同朋友行街，或者行下山咁。」志文本來冇諗住講大話。

面試官見到志文除咗公事包之外，仲有個紙袋裝住衣物，繼續追問：「你陣間都去行街啊？見你帶埋衫換。」

兜唔兜好呢？

「下晝約咗朋友行山，著西裝唔方便，又返唔切屋企換嘛。」志文成功自圓其說，同時，內心深處有似有一忽倔強，隨之消失。

窗外天陰細雨，面試官一笑，二人相對無言。

面試官最後有冇俾offer佢？佢都唔知，因為個間公司唔係佢首選，之後in多咗幾間，就冇再理會過呢間公司嘅email。

咁今次呢？

朋友無奈笑佢話一不做二不休，既然都決定順面試官意，就唔好同自己過唔去。黎緊個second-in，照去馬啦…

話曬今時今日嘅香港，仲有邊個唔講大話？

——————

志文以前眼中嘅香港，係一百個人有一百種唔同嘅聲音，而又能互相尊重。但宜家嘅香港，可能只得一種聲音被准許…佢有冇資格去judge呢個社會現況？當然冇。為咗生活而低頭生存嘅你同我，都冇。

#撐政府係咪會叻做野啲
#大家點睇黃藍與專業嘅關係
l#FulltimeHeadhunt #全職獵人

Follow我哋IG：

🔝最新職位空缺：Fillturegroup
🔝最新職場情報及冷知識：Fillturecareercoaching
🔝全職獵人：Fulltimeheadhunter