#資訊嘢 話說虛銀ZA Bank最新宣佈推「出糧 FastPass」，呢壇嘢係幾有趣嘅。
先講佢玩法，假設你30號出糧，咁你可以自己揀提早最多7日，由ZA Bank先出糧俾你。當你揀24號，咁由24號到30號都唔使利息。到30號「公司出糧日」會發生咩事呢？就係只要你ZA Bank活期賬戶夠錢，佢就會自動收數。當然，如果到當日戶口唔夠錢嘅話，佢就會開始計息。
其實香港虛銀過往都燒唔少錢去吸存款、貸款，但問心，大家拎完著數之後，有幾可真係會將大家成幅身家搬過去？不過ZA今次呢個新玩法，係聰明嘅。
首先，呢壇新嘢吸唔吸到人玩先？其實香港總有一班打工仔，係需要較大資金零活性，即係長期糧尾嗰啲呢，呢個新玩法總會target 中呢一大批人嘅。可以早出糧又唔使息，都不失為一個抵刁。
第二，吸到班人開戶，呢班朋友用得佢提早出糧，總要透過ZA使錢，好彩嘅仲可以令用戶習慣用佢嘅服務，變相提高銀行transaction之餘，仲可以培養長期客戶。
第三，呢點最重要！由於一旦你唔記得由出糧戶口過數去ZA Bank，你係要俾息的！！！加上現時唔少傳統銀行，對轉帳去虛銀嘅金額有一定限制，所以估計會有人廢事煩，索性將成個戶口轉過去，咁就一定唔會唔記得找數！結果，ZA Bank成功達陣，吸到人轉出糧戶口。
所以結論係，大家想用佢哋個「出糧 FastPass」早啲出糧的話，請謹記：借定唔借，還得到先好借。公司出咗糧，一定要準時找數呀！
網頁傳送門：https://bit.ly/3z9NfIp
