【龔成問答信箱】（Q20241-Q20260）
Q20241：
龔Sir,你好，我係你股票班學生, 我想問一隻股票 - 必瘦站(1830),
我亦多次係你既堂上同埋你既FB 聽過你既推介, 因為之前不太了解佢既業務, 同埋唔太理解佢如何係內地拓展佢既生意網絡,
所以一直都無買到, 但直到最近我睇到幾個內地既親戚微信發文講述內地美容文化既景象, 才有了解, 以下係我對必瘦站既估值方法
有代表性既市盈率: 8-14;
預測盈利: $0.3 X 10%增長 = $0.33
預計合理區為: $2.64 - 4.62
4.40 (合理區中上部); 我認為當佢跌到落$3.3 (即P.E. 為10倍)才是值得買入既時機, 你認為我這個估算正確嗎?
龔成老師：
必瘦站（1830）有質素的。這股我自己都有貨，可長線。
佢業務正面，長遠有發展，有長線投資價值，現金流及財務數據都理想。
你的估值大致合理，但由於這企業過往的品牌有少少問題，這點我扣左分，所以唔敢在估值上大過進取，以及在注碼上不能太過訓身。
大約$4.0$4.2是合理區頂。如你保守D，去到$3.3 先買入，可以的，我都認同10倍市盈率會較穩陣。
你的估值與投資策略基本上正確。
但都要留意，佢最新公佈了業績，而見到業績不差，我地投資者進行估值時，就要適當地作出調整，而不是只運用過往數字。
------------------------------------------------
Q20242：
多話阿sir的回覆，您除左做左我理財導師，仲做埋我心靈導師，我有時係度反思究竟我個上級講的係咪有佢Ge道理
佢話工作上心係好事都係壞事，但我覺得工作上心係最基本的工作態度，佢又話我工作主動積極只係自己一廂情願的諗法，未必係幫到手
自問做左咁耐戈度，從未試過出大獲事要上級執手尾，所以聽到佢同我講的一番說話，我個心寒左一寒，好似發現原來我的以為只是我以為
但係工作認真係我一向做人的宗旨，我不忘初心，我都唔覺得自己有做錯。阿sir您的故事感動左好多有上進心的後生仔
包括我呢個小粉絲，希望之後搵您係同您講我interview 成功啦！多謝阿sir回覆，我充滿正能量啦！
龔成老師：
你只要「做好自己」就得，當然，我地會檢討自己，但好多時，唔需要理別人太多。
我地總會遇到不同的人，但唔好因別人令到自己唔開心。做好自己。加油！
------------------------------------------------
Q20243：
老師，我的 MPF供款是（1）香港股票,（2）環球股票（3）亞洲股票，（4）中國股票。
現在全部四種股票基本都處於高位，是否現時耍將全部或部分轉入保守基金以防全球股票市埸會有大調整呢？MPF戶口已累積了40餘萬。謝謝
龔成老師：
簡單來說，你強積金是集中在「股票」類別。
由於強積金比我地平時的投資，更為長線，所以強積金在配置上，唔需要經常轉來轉去。你只要簡單按翻你的人生階段，去配置進取/平穩/保守，已經是大方向。
如果你年齡較大，要賣較多轉到保守。如果你年齡，則不用轉，始終年輕可以較高風險。
------------------------------------------------
Q20244：
老師，我有2層樓一個車位全部自用，車位是加按物業再投資的，購入價1M最高升至2.3M左右，當時想放出因租金回報只有2.2厘
想放出後買有5厘左右的收息基金一部份收入可以補助另租車位自用費用，但因老公睇好車位升值後市，因我住的果區車位嚴重不足，現在市况下車位價己回落至1.7M左右，重應吾應該放左佢再買基金收息呢？
但現時隻隻基金都升左好多，所以好矛盾，一方面怕基金價接高位入市另一方面又怕低價放左車位後又係甘升。
我自知錯過了一次機會吾想再做錯多一次决定請老師指教
龔成老師：
其實無人能準確捉到最高低位，不要太過停留「事後孔明」的概念，有問題的。
車位是資產項，現時價住算是合理區中上部至頂的位買，長線持有不是不可，但增長力不強。不過，相信短期下跌壓力都不會太大，最大下跌都過去。
你暫時可以持有，因為現時其他資產，如股票、基金都唔平。到你見到這些資產思落時，先再考慮將車位轉過去，暫時就持有住先。
如果你真的好想轉，就可以考慮轉收息股，現時一般都有5%、6%，股價合理，都可以考慮，自己建立一個收息股組合。
------------------------------------------------
Q20245：
老師你好，本人想學習投資，好幸運地有朋友介紹左成哥比我認識，而家開始睇緊老師你既《股票勝經》，希望而家開始學習唔會太遲‧‧‧
想問有關於地產股既問題，之前有見老師推薦12恆基地產，我想問老師點睇16新鴻基同1113長實？
另外，地產股其實係咪難有突破/大升幅？
龔成老師：
首先，地產企業最賺錢的年代已過，所以之後升幅不是大升模式，不過，大型地產發展商，始終是賺到錢的，有一定的優質度，所以你上述所講的3股，都有質素，都可投資，不過就只是平穩增長型。
恆基（0012），由於佢是全港最多農地的發展商，長遠有發展力，因此潛力度會高少少（但始終不是大升模式）。
------------------------------------------------
Q20246：
老師，價值投資者會賣出後，等跌買翻嗎？如果當時牛三，好貴？
龔成老師：
都會做賣出的動作，而整個模式是長期性的，我地不是今日賣，明天買翻
而是買入後持有多年，如果見到牛三，明顯貴，可部分賣出。之後耐心等，可以等年計，去翻平的價，重新買入。
不過，由於賣出後無人知能否買得翻（特別是優質股），所以要去到真的貴，先有機會賣，同時唔建議全部賣出。
------------------------------------------------
Q20247：
你好老師 公司會派花紅應該可以有10萬蚊，所以想用嚟投資如果唔係又會亂洗錢買嘢.
依家有以下股票大概市價61萬,請問如果再用10萬蚊可以買咩定係有邊一隻可以加注？
可以加雅生活同阿里巴巴嗎？想搵增長力較高。雅生活買入價較高。
新鴻基 500股 @$108
中國鐵塔 14000股 @1.48
領展 899股 @66
中生製藥 1393 @7.9
比亞迪 [email protected]
小米 800@21
金沙 [email protected]
中銀香港 500@25
盈富基金 2188 @25
雅生活 750 @36.7
阿里巴巴 700@206
龔成老師：
你現時持有的，都是有質素的股票，可以長線。
如果現時加注，你可以考慮阿里（9988），部分雅生活（3319）都得。或者可同時分注安碩恒生科技（3067）可長線。
這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。
不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。
要注意，你要同時有現金剩，令你若出現大跌市，有資金入市。
------------------------------------------------
Q20248：
老師，之前聽家人說買下股票如下，
跌了很多一直處於不想理會的心態⋯⋯
近日的起心肝想重整返自己財務
3988、0005、794
29歲單身
跟家人同住未急予用錢
以下股票可繼續長揸嗎？
等市場好點再放/決定去向
或者盡快離場另覓合適的股票？
龔成老師：
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
所以，以你的年齡，兩隻銀行股都不適合，你見佢上翻D時，轉其他。
至於錦勝集團（0794），生意多年無增長力，發展一般，潛力度不足。你轉其他較好。
其實，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
平穩增長股，你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
潛力股，可考慮：安碩恆生科技ETF（3067），不過，暫時唔好投資，等你多D知就先。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q20249：
龔成先生 請問可以用1萬賺25萬嘛？ 要還債， 求指點
龔成老師：
坦白講，以「投資」的角度，無。
你可以賭博或投機，當然我不鼓勵。例如你玩衍生工具，你預左10次有9次輸晒，但有一次可能升幾倍或10倍。
我建議你從基本著手，增加收入，儲蓄，適當還錢。這是最好的方法，想想增加新收入來源，兼職、小生意。
------------------------------------------------
Q20250：
sir ，之前高追左968信義光能,依家係咪只有耐心等?同小注左6060众安在线,都係帳面虧損緊
我有個目標就係等968信義光能上到50蚊,我覺得這股非常有潛力,不輸比亞迪,上到50就賣一半,一半持有現金,
這方法是否可行.但股價的波動實在會令心情好難受的~同唔知等到幾時,因為我現在沒有工作.
龔成老師：
眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。
初步睇，企業有發展力的，不過風險同時存在，因此唔建議太大注投資，這股都可考慮長線持有的。只要你不太多貨就無問題。
信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。
這股我在2018年出的《50值博倍升股》都有推，但要上$50不易，第一，近年上升倍計，第二，現時預測市盈率都高達50倍，要再倍升，就要有實質業務增長，先有機會。
你唔好太心急，唔好成日睇股價，多睇書，睇年報，要做真正投資者，不要做無知散戶。
------------------------------------------------
Q20251：
龔 sir 你好，首先感謝你的無私分享，如果早d認識你就好，本人有數年投資經驗，但永遠只係聽朋友講，人買我又買，但永遠唔好彩都係蝕多過賺，現在希望努力跟你學習，想問以下幾隻，希望老師比下意見：
1）2633 前景如何？我1.11 入，現在只有1.03，數量不少，請問應該止蝕嗎？
2）939 適合長揸嗎？
3）175 我31 元買了，心郁郁想再加注，什麼價位可以考慮？
4）另我還有大約5 萬資金，想搵1-2 隻比較有潛力的股票長揸，哪隻比較適合？
感謝老師解答，祝身體健康！
龔成老師：
1）雅各臣科研製藥（2633）主要於香港從事非專利藥及中成藥的開發、生產、市場推廣及銷售。中成藥專利產品包括「保濟丸」（於中國內地稱為「普濟丸」）、「飛鷹活絡油」、「唐太宗活絡油」。
主要專科藥包括呼吸系統科、心血管科、中樞神經系統科、腸胃科、疤痕治療及口服糖尿藥。
其實佢生意不差，有錢賺，但增長力就不強。現價合理的，分注投資都可以，但不是高增長類。
這股持有無問題，但你持有太多就宜減持。
另外，你唔應該太著重短期股價上落，應該要集中睇「企業」。
2）可以，但這只是收息股，增長不強。
3）吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。
長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。
現時價位在合理區頂，甚至有少少貴，股價波動，有貨可長線。最好回少少，例如跌多10%-15%你先加注。
4）安碩恒生科技（3067）可長線。
這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。
不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。
------------------------------------------------
Q20252：
龔sir好，本人差不多40歲，投資經驗唔淺，但老實講，蝕多賺少。
有唔少蟹貨已揸住多年，有2628, 1800, 1618, 857, 991, 5, 2199, 386，今年有部分新經濟股都少少斬獲，請問以上股份是否應該全部換馬？
換入新經濟股定一d傳統但低殘既股票，等經濟好轉會升返？如3988, 3, 1038, 1238（此股票曾經長線持有多年，股息唔錯，公司營利亦按年有增長），想再次買入可以嗎？
從MPF睇，亦證明阿sir你長期持有係絕對正確，過去10年，揀既基金已升左數倍，已接近有7位數字，但如果買既股票升幾成，一般人一定已賺左先
而MPF正正係因為唔需要成日睇住，所以先可以賺到d，現希望阿sir指點一下，感激萬分
祝龔sir身體健康，健康先係財富
龔成老師：
你最大最大的問題，就是賣出有質素的，而留低增長力較低的。你的投資模式令你過往輸錢。
你上述的股票，不是劣質，但增長力不強。
其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。
同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。
維珍妮（2199）、中國中冶（1618）、大唐發電（0991）質素一般般，長遠發展力不足，要找機會賣出。
至於其他，可持有。
你之後可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：安碩恆生科技ETF（3067）、阿里（9988）。
至於上述你想買入的4隻，不是不可，但增長力都是不強，可以不用急。寶龍地產（1238）算是較有增長力。
------------------------------------------------
Q20253：
Hello 龔sir ，想請教一下你點睇呢一年既市道？我自己對疫情疫苗等等既不確定因素有d驚，吾知應吾應該係賺少少既情況下先套番現金再等之後低d 買入番。
我而家手持既股：
3988、1928、823、2800、1211、3033、1299、9633、2848。
如果沒有計算錯既話除左中銀之外都賺少少（比亞迪比較多，但有碎股），吾知應吾應該套現然後之後再買，想聽聽龔sir既意見。
感謝龔sir
有沒有建議放邊幾隻或hold邊幾隻？
感謝龔sir！
龔成老師：
我地唔需要太著重中短期的分析，只要睇長遠的「組合配置」就得。
你最重要是持有優質、長線、適合你的組合，不用太理會中短期股價波動及事件。
因此，唔好太著重分析事件，而是做好配置，有質素股，有現金。
你現時持股，都有質素的，可以持有，無乜問題。唔需要特別套現。
------------------------------------------------
Q20254：
老師，已follow 你有幾個月了！真後悔咁遲先認識你！本來已經跟你嘅教導黎選股睇年報，但心態亦唔夠強大。
近幾個月個市升升跌跌，我已經不知不覺入晒手頭上嘅現金了。目前有以下股票，想問下應唔應該轉倉/走咗部份等回完之後再入？
27 1,000 $59.05
66 2,000 $38.7
175 2,000 $31.5
788 20,000 $1.36
823 1,500 $84.5
1177 11,000 $7.62
1833 600 $95.5
1928 2,000 $31.86
2318 1,000 $86
2388 3,500 $25.8
2382 100 $126
3319 2,000 $33.8
3718 12,000 $2.08
6690 800 $35.1
9698 200 $102
9988 600 $238
首先，我好似已經有太多隻股票。應否從當中減持部份？其次，如果呢次真係跌市，我應唔應該襯此機會將d 舊經濟轉返新經済？如可行，應該咩股/咩價位好？
宜家手上面冇晒現金可以買股票，個心好唔安落！亦擔心黎緊大跌市。需唔需要賣出部份呢？
龔成老師：
你唔好無現金在手，我地最重要是建立平衡的組合。
你上述持有的，大部分都是有質素的，不過就開始有點散，如果你現金不多，可考慮減少少，如果你想將舊經濟轉新經濟，可減領展（0823）、金沙（1928）、平安（2318）、中銀（2388），當然，這幾股都是有質素，只是睇你的組合想怎樣配置。
其實，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。
同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。
由於你上述持有的，基本上都是有質素的，所以唔需要急進行這一步，你可仔細思考下先。
另外，建議你努力儲蓄，等自己多翻D現金先。
------------------------------------------------
Q20255：
老師，想問下老師點睇呢幾隻國內內需股呢？
2331（李寧）9992（泡泡）2319（蒙牛），6862（海底撈）謝謝
龔成老師：
都是有質素的，但都面對類似情況，市場有炒作，現價略貴，投資要注意風險。
李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。
增長力不差，這股可長線。不過現價貴，如果本身持有無問題，但如果現價想入，最好就回翻D先。
Pop Mart泡泡瑪特（9992）是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。
整體而言，這企業都有質素和發展前景。睇佢數據，過往幾年增長唔錯。
但始終是新股，參考數據唔多，未來能否一直維持咁高增長，要有待觀察。所以投資時，我地要保守D，唔好太進取。
蒙牛乳業（2319）有質素。
佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。
無論品牌、銷售網絡、發展，都不差，長遠正面。這股有長線投資價值，不過現價就唔算平，回翻10%先慢慢分注入，會較好。
海底撈（6862）正面，有質素。
佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。
在中國有好多分店，以及外國都有。
生意增長力強，有規模，有品牌，整體正面。相信長遠仍有發展的。
不過，這股市場比佢好高估值，現價貴。如果有貨可長線，但無貨最好跌翻D先考慮。
------------------------------------------------
Q20256：
老師，想問6080？
龔成老師：
榮智控股（6080）質素不太好。
佢主要在香港從事地基及地盤平整工程的分包商，分為樁帽工程、挖掘與側向承托工程及地盤平整工程，工程來自公營及私營部門。
過往生意一般般，經常出現虧損。股價有時上落大，炒作多過實際，這股唔太建議。
------------------------------------------------
Q20257：
龔sir 你好。請問 907 (高雅光學)現在入得過嗎？前景如何？Thanks。
龔成老師：
高雅光學（0907）主要從事製造及買賣眼鏡架及太陽眼鏡、物業投資、投資債務及證券，以及電影投資及發行業務。
業務好散，我地這類企業興趣不高。
過往生意變動大，同時經常出現虧損，無不是優質股。
股價上落大，注意風險，未知是炒作還是甚麼原因，總之這股投資價值不高。
------------------------------------------------
Q20258：
龔sir您好！我是您的讀者，近期買了《選股勝經》一書。但我有一些非投資方的困惑，想請教老師。
近期疫情下我爸爸失業，有時情緒會起伏，應如何開解佢？
（我另外又聽您指示，買了The master key system一書，看完後，體驗左自我引導既力量，好想教我其他屋企人常保正面心態）
謝謝！
龔成老師：
首先，失業會影響收入，應該持有較多現金，除了提高了防守力外，亦能增加安全感，可以對情緒有幫助。
第二，同佢多做運動，不要經常留在家，去行山，運動，接觸大自然，這是好事。
第三，多講一些正面說話，例如疫情只是短期，好快將過去，過去佢點樣成功，將來都可以點成功。
第四，做好自己，你用自己做例子，去影響別人，我都是這樣。加油！
------------------------------------------------
Q20259：
龔成老師，你好。先感激你一直以來無私的分享。我呢1年，全靠你的教導，我先至有高啲的EQ去面對大跌市。
膽敢請問老師，我呢個組合能否有機會增長至100萬？（我成日唔識幾時應該買入，令回報率可以高啲）
1177: 7.2$ x1000
1113: 44.33$x1500
0003: 11.3$ x1000
823: 63.8x 3000
0005: 49.1$x1200
1361: 3.5$x3000
希望老師可以指教指教！感謝！
龔成老師：
太好了！要保持知識與財富增長！
你上述的持股，都是有質素，不過，大部分都是增長力不足的股。除了中生（1177）外，其他都是收息或平穩增長型，如果你投資目標是增值，就未必能配合得。
我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。
同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。
你要重新思考你的投資目標，如果想增長，就可以轉部分。例如匯豐（0005）、煤氣（0003）轉其他。
------------------------------------------------
Q20260：
老師你好，我是一個新手，現時28歲，之前對投資股票毫無概念，上年開始月供盈富每月$3000。
因為月供太固定，擔心將來突然沒有工作時供不到，因此想月供的同時，儲夠一手錢時我也想小注地買入一些股票，長線持有及收息。
不過，我不清楚什麼時候才是可以買入的入手價，以及買入後，到什麼位置才是收手時候，需要放貨？
另外，看老師回答網友的問題時，都看到老師你是提倡增值資產而非增值現金，不過人總是貪心
這樣長線持有一些股票，其實所賺的資產的增值，而非現金的增值？
那麼我們不斷投資資金去股票市場，長遠來說資產是有增值，但現實上可賺的即時現金是只有收息的回報嗎？ 謝謝。
龔成老師：
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
簡單來說，你先做好「增值」，並不是賺差價，而是長期持有，當到了某些年齡，或該股升得太多，就可以賣出，轉為收息股，這樣就能有持續現金流。
你現時長期月供盈富（2800），正確。你應該同時留有現金，然後等機會買入一些優質股。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
0823至0907 在 #台灣製兒童睡袋防蚊防蹣寢具#0823至0907 接下來開的是... - 依娃 ... 的推薦與評價
台灣製兒童睡袋防蚊防蹣寢具#0823至0907 接下來開的是台灣製造幼稚園睡袋推薦，【濱川佐櫻】冬夏兩用兒童睡袋【Jumendi】天然防蹣防蚊寢具。對於要上幼稚園的小朋友或 ... ... <看更多>