我從來都唔食「炸魚皮」，要食就食「炸魚骨」！
但講炸魚骨之前，先講下炸魚皮。大家日常食到嘅炸魚皮，包括粉麵店、火鍋店食到嗰啲，其實多數都係工廠出品，品質味道大同小異。用嘅係平價淡水魚魚皮，極薄身、食材本身冇味，炸完好似一塊淡茂茂嘅Lay's 薯片，不過冇sour cream & onion或者bbq味粉，只有少少鹽加啲胡椒粉；唔好彩仲會好腥同有油膱（益）味。
而炸魚骨，就係用馬來西亞或本地黃門鱔魚皮。呢種魚皮本身厚好多，炸起之後，唔會「薄切切」。最重點係佢會帶少少魚脂！每次我買一包魚骨返屋企，一打開個膠袋，就會馬上聞到一陣炸魚嘅香味！係，你冇聽錯，係炸魚，類似於一塊啱啱炸起嘅吉列魚柳咁嘅香味。呢個就係黃門鱔魚皮最勁揪嘅地方，食過一次，根本返唔到轉頭。呢一種魚皮，仲有分有骨同冇骨，有骨，即係魚皮上嘅一啲幼骨唔會去乾淨，連魚皮一齊炸！魚味更強勁，而且魚骨自己會有另一種唔同狀態嘅「脆」，令一塊魚皮有兩種口感，層次感完全係兩個世界。
印象中，細個去大牌檔食魚蛋粉，根本檔檔嘅炸魚皮都係炸魚骨，檔檔都係厚身帶骨有魚味好好食。然後唔知到左幾時，就開始慢慢被工廠貨取代，變晒做Lay's 薯片。好彩九龍城仲有呢間德興，每日新鮮炸黃門鱔魚皮，聽聞香港其他幾間有賣黃門鱔魚皮舖頭都唔係日日開爐炸。不過九龍城呢間每日產量都係好少，下午一開賣就被街坊秒殺。價錢係貴嘅，上年好似仲係賣緊$20，半年前賣$25，而家賣$30一包仔。我以前係街坊，路過就問下有冇貨，偶然都有得食下，如果唔係街坊，就真係要好神心同有緣份。尋日去九龍城，晏晏地都畀我買到兩包，有食神！
如果你地知道仲有邊度有賣炸魚骨，快啲留言話我知！
德興魚蛋
地址：九龍城福佬村道76號地下
電話：23820646
黃門鱔 在 港榮海味雜貨- 「兩呎長黃門鱔膠，秘方良藥功效顯著」... 的推薦與評價
門鱔膠有青色和黃色之分，青門鱔價錢遠低黃色門鱔。 但功效亦相差甚遠，要區別兩者最主要就是看看有沒有長長的尾巴，只有黃門鱔會有。 和其他花膠一樣，厚肉飽満為上品 ... ... <看更多>