偶像殺（下）
上集：http://bit.do/fr66Z
仔細觀察，大隻佬眉目有幾分似阿霧，我諗「痴鬍鬚、墊嘢、扮大隻」，係阿霧其中一個易容方法。
阿霧喺墓前痛哭，我打開竊聽器。
阿霧走後，我拎番竊聽器，聲音好模糊，我只聽到：「阿爸阿媽......對唔住......報仇......」
雖然聽到嘅訊息唔多，但我精神一振，阿霧會偷偷嚟拜祭，證明佢唔係大家眼中咁冷血不孝。
而且佢要報仇？大文已經被捕、認罪，佢手段凶殘，睇怕都要判終身。
阿霧仲諗住點報仇？係劫獄殺大文，定係殺番大文嘅父母？
或者，阿霧扮到對父母嘅死漠不關心，就係為咗令大家放鬆警惕，佢再殺番大文嘅親人報仇！
咁就死啦，雖然我同表弟大文唔多熟，亦覺得佢罪有應得，但舅父自細都對我唔錯，我唔想佢出事喎。
為咗更接近真相，我決定去探大文。
失去自由嘅大文望咗我兩眼，好冷漠咁講：「表哥，如果係講咩『殺人唔啱』嘅廢話，你就慳番啖氣暖下肚啦。」
「我嚟探你，唔係因為我係你表哥，我哋有幾熟啫？連IG都無follow。」
我好認真咁望住佢：「係因為我都鍾意阿霧啊！我想知道你點解咁對阿霧？」
果然，一講起阿霧，大文雙眼發光：「阿霧點啊？佢係咪幾乎崩潰？
新入嚟嘅人話我知，阿霧照常接Job好似無乜嘢咁，邊有可能啊？我明明search過，阿霧好孝順父母㗎！」
「你希望阿霧崩潰？」我好似搵到問題嘅核心。
大文沉默咗一陣，講出佢嘅心路歷程......
一個平凡嘅打工仔，有一個萬人景仰嘅偶像。
曾經，大文最開心嘅事，就係買到演唱會握手位門票；
或者跟蹤阿霧，睇住佢行入一間名店，然後用晒成個月人工，去買一件阿霧掂過而無買嘅衫。
後來大文花錢拉關係，入到阿霧嘅歌迷會，可以及時追蹤有阿霧嘅活動，有得同阿霧慶祝生日。
大文有更多機會，企喺阿霧面前：「我......我叫陳大文，我好鍾意聽你嘅歌！」
阿霧點點頭，講一句「多謝」，已經令大文欣喜若狂。
但類似嘅事重覆一次、兩次......十次，阿霧見到大文，眼神依然陌生，大文依然要講「我叫陳大文」。
大文赫然發現，無論自己出現幾多次，都只係千千萬萬歌迷嘅其中之一，阿霧永遠都唔會記得自己個名。
大文都努力過，阿霧所在嘅公司請人，就算請清潔工，大文都即刻應徵。
但人生並唔係努力就會有成果，就算係清潔工，都會請更有經驗嘅清潔姐姐，而唔係呆頭呆腦嘅大文。
大文想令阿霧記得佢，呢種執念好似一粒種子，喺佢心中生根發芽，纏繞佢嘅心臟，佔據佢全部嘅注意力。
既然自己無能力做咩好事，或者......可以做壞事。
作為忠實歌迷，大文知道阿霧好孝順，亦好輕易搵到阿霧同父母嘅合照。
阿霧走紅後，佢父母無搬家，甚至無請工人，仍然維持簡樸嘅生活。
所以，大文好輕易就跟蹤住兩個老人家，入屋殺人。
「阿霧會記得我掛，我叫陳大文，同佢有殺父之仇啊。」大文望住我，眼神狂熱到好似我就係阿霧咁。
我無言以對。
監獄雖然封閉，但有得探訪犯人，犯人亦可以睇雜誌，所以都可以知道外界嘅消息。
無幾耐，大文在獄中自殺身亡。
據講，大文死前一直收集阿霧相關嘅消息，一聽到人哋話「阿霧涼薄，父母被殺都無咩感覺」，大文就顯得好暴躁。
大文用餘生去換取阿霧嘅關注，居然失敗，亦失去一切希望。
呢啲都係我估，但我仲有一樣嘢未諗通。
我再次去到阿霧父母墳前，等待阿霧，大文死咗，佢一定想話畀父母知。
易容後嘅阿霧出現，我直接衝埋去，講出我嘅所有猜測：「你特登扮到漠不關心，就係想精神上報復大文？」
阿霧反而問我：「你係陳大文嘅親友？」
「算係。」我加多一句：「但我都係你嘅歌迷。」
「你覺得我有錯咩？我父母無做過壞事，被佢斬甩咗個頭啊，成間屋都係血。判咗終身，就抵得上兩條人命？」
阿霧眼都紅埋：「我知道陳大文想要乜嘢，我就係要遺忘佢，我就係要佢得唔到佢要嘅嘢。」
我下意識問：「你點知大文想......被你記得？」
「佢被捕後，我有見過佢，我本來想問佢點解要殺我父母，但係佢望住我嘅眼神......好熟悉。」
阿霧嘆氣：「以往有歌迷買咗我隻碟，或者幫我做咗啲嘢，佢哋就會咁望住我，係渴望讚賞渴望認同嘅眼神。」
我只可以講：「你咁樣做，人人都以為你對父母漠不關心，你嘅事業會無晒。」
「已經無晒。」阿霧眼神堅定：「呢個係報仇，報仇就需要付出代價。」
我忍唔住講：「其實大文都死咗，你都可以講番真相。」
「有人會信咩？」阿霧淡然一笑，轉身就走。
望住阿霧遠去嘅背影，我不禁諗，點解我之前會以為阿霧涼薄，唔在意父母嘅死？
依加諗番轉頭，假如佢真係唔在意父母嘅死，
佢更應該喺鏡頭前痛哭，流幾滴廉價嘅眼淚，搏取公眾同情。
人總係相信自己睇到嘅嘢，但耳聽為虛，眼見都唔一定為實。
真正嘅痛苦，未必會大喊大叫；至惡嘅壞人，亦未必面目猙獰。
－完－
將專頁設定為「搶先看」/ "See first"，最新故仔馬上睇！
#短故 #短篇 #小說 #陳美濤 #廣東話 #粵語 #tomatochan #偶像殺
鬍鬚墊 在 可惡想揉！毛孩鬍鬚墊根本新治癒神器 - Pinterest 的推薦與評價
... 顆顆），是屁屁、臉蛋、腳爪、尾巴還是耳朵呢？本凹最喜歡的應該就是貓肉球了，看到粉嫩嫩的肉墊，真的超有想摸一下的衝動阿！(毛小孩,貓咪,鬍鬚墊,兔子,萌,可愛) ... <看更多>