【《銀魂》嘅完結，唔單止係一個時代嘅終結】
（含淚執筆）
雖然消息已經傳出幾次，作者自己拎嚟玩講笑都玩過一兩次，但係我估今次係真㗎啦，就好似身體健壯嘅老人家成日表情嚴肅同你講自己都唔擺得幾耐啦，命不久矣啦，你都知佢係玩玩吓廢噏吓，直到有一日佢輕輕鬆鬆、微笑住同你講佢要走啦再見啦，你見到佢頭上面有個光環若隱若現嗰一刻，你終於先會意識到呢句道別好真實 - 《銀魂》真係要完啦⋯⋯
作為fan屎，當我哋嘗試去推介其他人睇《銀魂》，而要話俾人知呢一套係乜嘢類型嘅漫畫，我哋都會同意呢一條永遠都係最難答嘅問題。
我哋唔會唔記得將仔剪頭髮嘅時候嗰個繃緊嘅表情同埋佢被滑雪嘅經歷；唔會唔記得「新岩士唐旋風噴射岩士唐砲」係乜嘢；唔會唔記得月詠、阿妙、連埋登勢成班人無啦啦做咗後宮；唔會唔記得火鍋將軍戰爭呢啲瘋狂同搞笑嘅小短篇；同時我哋都會記住作者點樣恥笑日本藝能界、戲仿死神同高達，點樣用對白突破漫畫本身嘅框框。
神樂嘅廣播操啦、嗰把用到爛晒佢都珍而重之嘅遮所帶嚟嘅溫情同感動，失驚無神都會出現喺腦入面；仲有每一篇大長篇 － 一國傾城篇、將軍刺殺篇、尾美一篇等等，由真選組同萬事屋教識我哋嘅除咗係熱血，最重要嘅係佢話我哋知人類要點樣喺通常絕望嘅人生入面掙扎求存、搵到自己嘅一絲希望；佢哋話我哋知人類嘅關係唔止得陌生人、親人、愛人、朋友或者敵人，我哋仲可以惺惺相惜、可以相濡以沫，可以互相排斥同時互相尊重，呢種百花齊放嘅混亂同和諧就係歌舞伎町、呢個世界以及人生最美好嘅地方。
一開始戰場上嘅四個人，由同一個起點走上唔同嘅路，呢一種無奈同建於幻想嘅真實已經注定左呢套漫畫與眾不同。喺絕望面前我哋可以反應激烈、可以絕地反彈、可以望住更遠嘅目標努力、可以捉緊眼前所珍惜嘅嘢；
為咗保護重要嘅人或者事，我哋可以好似歌舞伎町每一個人咁努力爬行、可以好似唔掂叔咁住喺紙皮箱、可以好似真選組一樣暫時避走、可以好似阿銀一樣跪低乞求，但係最重要嘅係，我哋唔可以違背嘅係自己嘅武士道，唔可以選擇永遠放棄 － 只要肯向前慢慢爬著行跪住行避住行，沿路披荊斬棘，再行前啲總會有康莊大道。
你可能會覺得「唓，一套漫畫完啫，有咩咁巴閉呀」～ 但係對fan屎嚟講，《銀魂》嘅完結唔單止係一個時代嘅終結，佢係有特別嘅地位嘅。
喺我哋嗰個美好年代，《One Piece》話俾我哋知友誼同夢想嘅重要性、展示俾我哋咩係完整嘅世界觀同埋出色嘅伏筆；《Hunter x Hunter》示範咗比我哋睇一個鬼才係可以點樣講故事、點樣刻劃人性；《火影》帶出嘅係成長同堅持嘅力量；《死神》帶咗一個超越想像力嘅有型戰鬥世界比我哋；
至於《銀魂》，你可以睇兩集J2之後當佢純粹無聊，但係佢代表乜嘢，只有用心睇過先會感受到佢嘅震撼。
