【 728後，全香港都有暴動的青年。 】
721上環，係黑警將向巿民開槍變成日常既開端 。
728上環，卻令全香港都有暴動的青年。
612中，五人因「暴動罪」被捕，但未即時被落案控告。抗爭者係71中確立「五大訴求」，當中兩點就係撤回暴動定性同釋放被捕抗爭者。而612後接近兩個月，都再冇其他示威者因暴動罪被捕。
直至728。
2019年7月21日，上環開槍、元朗恐襲，天怒人怨。抗爭者於是發起「727光復元朗」、「728追究開槍大遊行」，結果成為反修例運動中，首次被警方發出「反對通知書」既遊行集會。即使如此，萬名抗爭者依然義無反顧再次走到一星期前既開槍現場。當日，警察用左408枚催淚彈、95發橡膠子彈、52發海綿彈／布袋彈。警察甚至被發現使用疑似過期催淚彈，令無數抗爭者、急救員、記者係日後一段日子出現各種後遺症。抗爭者依然寸步不讓，為既就係追究721恐襲、開槍責任，以及更加重要既五大訴求，「撤回暴動定性」、「釋放所有被捕義士」。
偏偏係612過後接近兩個月，警方終於係728再次撕破面具，再一次以暴動罪之名拘捕抗爭者。44名以暴動罪拘捕既巿民中，有負責人道救援既註冊護士，亦有大家都熟識，已被判無罪釋放既「赴湯蹈火」三人。有別於612暴動案並無即時起訴，呢44位於上環被捕既巿民，係拘留兩日後，被直接帶上法庭審訴，正式落案控訴。
—
我記得，7月29日，我收到消息指呢44人被控暴動罪既時候，我係某處擺緊街站嗌緊咪。
當刻，我憤怒到全身顫抖，第一時間係街站到不停向路過既巿民傳達呢個消息。因為我唔明白，由612開始、由71開始，我地一直向政府表達既清晰訴求就係「學生不是暴徒」、「沒有暴徒只有暴政」、「釋放義士」，點解偏偏呢個政府執意與香港人作對？
當我地要求「撤回暴動定性」，佢竟然用開槍、用元朗白衣人去打壓我地既聲音，再係728更進一步，將更多更多既普通香港巿民以「暴動」惡法拘捕。
跟住落黎既大半年：
觀塘遊行，暴動。
荃灣遊行，暴動。
85三罷，暴動。
811港島集會，暴動。
821元朗，暴動。
831遊行，暴動。
915港島行街，暴動。
十一國殤，暴動。
反緊急法遊行，暴動。
和你Lunch，暴動。
黎明行動，暴動。
中大守護戰，暴動。
理大圍城，暴動。
不能盡錄。
截至2020年7月25日，超過9000人被捕，當中約1500人以暴動罪拘捕，超過650人被落案起訴暴動罪。
—
728後，全香港都有暴動的青年。
—
再過春天，再過秋天，
這裡都不會改變，或者永遠都不變。
如果我們都只願做旁觀的青年。
—
