ViuTV劇集《身後事務所》正在播放Part 1，由陳國邦同徐肇平演出嘅Part 2將緊接播出，日前兩人喺尖沙嘴接受《蘋果》訪問，大談Part 2嘅劇情及拍攝點滴。阿邦同肇平喺劇中飾演一對同性伴侶，呢個題材喺港劇比較少見，阿邦話：「其實劇集題材分開嚟計就一啲都唔新鮮，我喺劇中係一名教師兼酒吧老闆，又分別有一段異性及同性戀關係，每樣嘢分開其實冇乜特別，但擺埋一齊就變成個角色好複雜，好多變化，亦係咁所以吸引我拍，作為演員係一個好好玩嘅機會。」
而飾演阿邦伴侶嘅肇平就話自己角色比較簡單，喺劇中兩人一齊經營酒吧，後來肇平發現對方行徑有古怪：「即係你覺得老公或老婆行為同平日唔同咗，追查之下發現佢有一段你唔知道嘅過去。」
講番今次劇集嘅主題《身後事務所》，阿邦表示其實我哋生活中，不知不覺間都做緊同樣嘅嘢：「打個比喻，你朋友屋企人離開咗，你都會陪佢安慰佢，甚至有啲死者遺物要幫手處理，呢樣正正就係身後事務所負責嘅服務，向一啲失去配偶、家人嘅人喺精神同物質上提供幫助。」
阿邦自言相當喜歡呢個構思，佢話：「成日都講，一個人死咗就係一個完結，但在生嘅人就好大影響，我同肇平嘅故事就係因為有一位人士離世，經身後事務所追查下，發現我哋兩個牽涉在內。」
今次兩位係首度合作，肇平透露媽媽黃淑儀有同阿邦合作過：「所以媽咪知道我有呢個Project之後，就極力推介我一定要拍，佢話我一定會喺阿邦身上學到好多嘢。」結果如媽媽所講，肇平話喺對方身上獲益良多：「阿邦好好傾，好願意分享，有時我會留低喺度睇佢同其他演員繼續拍攝，喺佢身上學到好多演戲技巧。」
而阿邦亦都肇平讚口不絕，佢話：「以新人嚟講佢俾我好大驚喜，尤其今次角色比較複雜，對住我呢啲所謂前輩，演出時仍有嗰份自信同自然流露，我好滿意亦覺得佢好有天份。」
劇中要飾演一對同性伴侶，屬兩人嘅首度嘗試，肇平直言並冇需要花太多時間去事前準備，佢話：「我只係一個Storyteller（說故事的人），喺個角色入面我係深愛住對方，我就用返現實中究竟愛一個人應該點做嚟演出，完全冇諗過性別唔同嘅分別。」阿邦亦表示自己用同樣方法嚟演繹角色，佢話：「你愛一個人，不論係男係女付出嘅愛係一樣，即使係演繹緊鬧交都好，愛一個人同佢鬧交你會表達心痛。」
劇中相信少不免會有伴侶間嘅親密鏡頭，拍攝時有冇尷尬？阿邦話：「劇中我哋一樣有情侶間嘅親密接觸，攬同Kiss都一樣有，總之平日你同太太或者女朋友係點樣相處，點樣攬或者Kiss喺劇中就係如常寫實地做番出嚟。」肇平補充劇本內根本冇清晰地交代佢哋應該點演：「我哋純粹由心而發，加上我哋角色設定段關係收收埋埋，所以成件事可以演譯得好隨心，完全冇尷尬。」
採訪：曹家誠
攝影：沈健程、廖達燊
精選娛聞，喺晒《娛果》
http://fb.com/appledailyent
