Uncommon common sense
就住前天在私人平台分享過一件我自己爆seed 的事，我決定在這再公開講一講。
先睇睇當晚我嬲到震之後嘅分享：
*********************
人生第一次鬧陌生人。
難得大家終於可以唔使帶口罩跑步，喺馬場跑跑吓，前面有位小姐擰轉面打咗個乞嗤，仲要係超大聲，唔暗口嗰隻。
我當時距離有100米左右，即刻帶返口罩繼而上前鬧爆佢。堅燥底！
我相信就算我話完佢，佢都未必會改。幾分鐘內，就已經有三個人跑上唻。世界疫情咪就係多得呢啲人囉。
我燥底時通常會講英文，仲要非常快同流利⋯⋯我自己都有啲嚇親自已😌
好啦⋯⋯擤完舒服晒早唞拜拜！
#走之前完全唔記得自拍打卡因為嬲到震
**********************
呢一刻，當然氣已下。
但想藉題發揮，想講一下，好似唔係太多人有呢啲基本禮儀嘅common sense。
在公共場所，打乞嗤或者咳，請暗着把口，唔暗口，口水飛沫係會隨空氣飛到九丈咁遠。
呢啲基本常識，但眼見不知有幾多人打乞嗤，咳嗽都唔暗口，無論有沒有疫情，呢啲都係基本。
關於擔遮
落雨擔遮嘅朋友，香港地方淺窄，擔遮嘅人，可否真係幫幫忙，睇睇路，唔好把遮插倒人隻眼。落緊雨，多數都行得好狼狽，唔好急住個一兩分鐘，請讓讓人。
落雨擔遮嘅朋友，既然都擔得遮，可唔可以喺一啲冇遮掩嘅地方行，唔好同啲冇遮嘅人爭路行，如果行得有遮掩嘅地方，就請你收起把遮。
唔落雨擔遮嘅朋友，都真係麻煩你地都真係要多睇路，你地把遮有沒有機會整倒人。
跑步徑行路
好多地方都設有專為跑友而設的跑步徑，地下都有寫明尺數嘅距離，而有啲場地下更為跑友舖啲比較軟嘅地下。我相信好多跑友係唔會介意同散步友分享跑道，但唔好三五成群，一字排開，每次都要跑緊嘅朋友慢落來講excuse me。就算似我跑得慢嘅人，都會時常留意有冇阻倒人，跑得慢嘅要讓一讓跑得快嘅。
巴士禮儀
坐巴士嘅時候，請不要自私放個袋喺隔離。
仲有請唔好放雙腳喺對面坐位，大聲講嘢講電話等等。
其實呢啲好似好簡單嘅common sense，真係一啲都唔common。
