關於 號外雜誌邊度買 ，我們在網路上蒐集到這些相關的討論、資訊與評價

［韋拿踢法似我］睇咗，冇乜特別。咁我當然係買咗返屋企睇啦，唔會去打人書釘咁咩嘅。細個仲打唔夠咩（細個唔係打誠品啦），而家有能力就唔好咁度縮了。50蚊，食個大家樂早餐都冇咗。

TLDR：介紹返，上星期我在Patreon寫嗰篇日本股仲全面。況且仲會一路繼續寫。點都抵睇。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

1. 朋友話頭，你以為本人強項係金融，其實唔係。以為我強項係寫文，其實都唔係。本人係Information processor，又即係金融DJ，仲係市場降躁耳機。我可以幫你整合啲不同嘅東西，消化咗，屙返出嚟，等你易入口。同埋我會睇得到唔同事情嘅關係。仲有，我可以幫你過濾咗好多雜試 —在呢個時代呢樣先最重要。

2. 呢本東西，標題150台幣，香港誠品賣50港紙，算有良心（＊），雖然有冇良心我都係咁買架啦，星巴克幾蚊咖啡粉（有冇？）賣你幾十蚊添。表面望落算多嘢睇，但老老實實，同樣價錢，你買本「信報財經月刊」好過，下期有我。嘻。

3. 講返一樣嘢，我唔止一次提過，本人最憎台灣翻譯金融書嘅一樣嘢，並唔係啲用語（全世界就你一個咩，唔好咁中二病），而係啲推薦序。

4. 人地原本本書好地地，硬係要搵件乜柒投信或者乜柒外資嘅二打六，然後出嚟評點幾句。最Q好笑仲要係夾硬name dropping，個作者入面某一章提過嘅某條友，丫，佢嚟台灣時我同我上司同佢飲過茶呀。關我撚事？你唔見人地原本英文版有呢啲嘢？當然呢啲就係台式圍威喂啦，明嘅，但你見香港都冇呢啲咁嘅嘢。

5. 咁你話，你講嘅係翻譯書，呢本雜誌喎。但佢呢個封面故事，登登，就係譯日本雜誌嘅。雖然冇name dropping，嘩我去銀座Ginza Six食中村藤吉呀作者又去過呀（巧多日本大媽的）。但，我一見有個台灣人寫導讀，我即時已經諗，去到第幾段會出現「失落三十年」？果然第二段就有！

6. 個封面故事嘛，無甚特別。外資大買進？一早知啦，日日新聞紙都有報。至於1000億美金，聽落好多，但講緊由舊年開始喎。而日本股市，差不多一日300億美金成交（香港講緊大約200億美金）。

7. See？你唔量化，聽落1000億美金就好多，實情只係3日成交。當然，佢1000億美金呢個數肯定係低估嘅。

8. 仲有，最正嘅當然係，佢除咗譯日文雜誌外，當然要加埋自己嘅東西。之後仲整咗幾篇講基金，講日本樓。原因就你懂的。而佢譯日本雜誌嗰兩篇文，係冇叫你去買基金嘅，只係畀啲個股你。睇到分別冇？
9. 不過，就當然唔係一無是處嘅。首先佢講咗啲個股，雖然照計你睇我Patreon篇文好過。

10. 但佢提到一樣嘢，日本股市，大約有40%嘅股票係below book，即係 股價低過帳面值，Price to book 低過一倍。美股講緊只係7%，英國甚至唔夠1%。中國？原來都只係多過美國少少，但呢個數字係今年3月嘅。

11. 固然阿豬阿狗都識講價值陷阱，平嘅可以再平。But still．我Patreon嗰27隻日本股，都有唔少係相當殘的（但我亦唔只係揀殘嘅嘢），可以自己去睇下。

（＊）不吐不快，但照計你身邊梗有啲咁嘅人。例如你去旅行佢叫你幫佢買嘢，仲要拎個Google Finance 嘅價去同你計 啲 yen幾錢（佢真係當自己拎到Google Finance嘅價！）。甚至我見過有啲仲極品嘅，拎返個圖出嚟同你講，喂，唔係喎，你去嗰時一對六喎，做乜而家同我計一對七？唔係發生在身上，係我朋友嘅朋友怪罪佢。我話，佢心中肯定覺得仲係益咗你呀，你賺咗信用卡里數！

呢啲友，記住疏遠佢。幫人買過嘢就知，都係一件幾麻煩嘅事，但好多人真係當你「順路」，講到「你去開大阪會經過京都呀可？」咁滯。仲有唔好忘記，仲要時間幫你去搵，幫你排隊，仲要驚買錯畀你小。同埋仲有一個風險：件嘢有乜中途爛咗唔見咗，都係你自己負責的。真人真事，我嗰時去德國幫人買波衫，結果漏咗在火車。咁當然係我自己拎錢幫佢買過件啦，唔通同人講「你件波衫我買咗啦，不過漏低咗，盛惠八百蚊」？但其實我冇同我朋友講呢件事（唔知佢會唔會睇到呢個POST），我啲朋友都係比較好的，向來都係 我話幾錢就幾錢，唔會拎個匯率圖出嚟同我計。

記住，就算本雜誌原本200台幣誠品賣200港紙，我都覺得係冇問題的。因為你可以唔買的。

＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。

［今日寫呢啲］事忙，晏咗出Patreon，同埋可能將來預告版寫少啲。況且今日寫啲嘢都要係Patreon版先寫得深入

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

首先，星期一預告咗買隻港股，星期二就買咗。絶不走數。亦唔係「買一股都係買」咁賴皮，一早講明買幾多。想知邊隻就睇文，雖然冇乜咁難估。

又，星期二隻嘢開市升我都係買照落去的，一貫作風，我都唔明做乜要縮骨到排嗰一兩格，當自己對沖基金做arbitrage？一向都係market價買，又唔係買幾千萬。買得就唔會只係睇10-20%，唔睇幾倍都至少四五成啦（當然要啲時間），所以我先唔會貪嗰一兩格，因小失大。

冇喎，結果一買完即跌。又如何？言者無心，但有時啲讀者問我，「你隻XXX我一買完就跌喎，點算」，我就都幾扯火。一來，幾時變咗「我隻」？二來，有乜點算？咁一買完就升你又點算丫？你話賴皮都好，但，唔係升就跌架啦。想唔輸錢嘅，買完兩日跌5%問點算嘅，好簡單，唔好買。Have fun stay poor

亦都見到我係身體力行，「輸就兩份」，我戶口長期都唔會有六位數（港紙！），一有幾皮嘢我就會拎去買晒股票，stay invested．係架，「如果下個月股災咪冇錢買咯」，係喎，但，「如果下個月唔股災呢」？咁你見，舊年3月23日標普指數到而家升一個開，完全冇10%嘅調整，就算你等5%都差不多一年冇見過，等到幾時？況且，唔好自欺欺人啦。下個星期美股跌10%，我保證你一樣唔敢買。

大市嘅，冇乜特別啦，今日我直頭都未睇升定跌（居然有人以為我係成日望住個市的，望住有乜用？我就夠望住李佳芯啦）。咁星期二反彈嘛，很好，但，有人話見底未？答案係：我點知？

有人話「確認」見底後先好買，諗真啲，都幾廢話。梗係當咗好似「確診」咁有個報告畀你。點「確認」呢請問？美股升成個開都仲有人話「都係靠印錢吊住」。甚至由2009年升足十年，都有人話「冇解決到實體經濟」。點「確認」？我話你知，多數就係升咗十倍啲友先「確認」！然後咪摸頂！

（真係唔係講笑，昨日咁啱係添曲接手蘋果十年，好似股價升咗十倍，史上創造最多財富嘅CEO，冇錯，多過Steve Jobs同Jeff Bezos Elon Musk，都仲有人去問到底人地掂唔掂，點「確認」？）

咁當然，大約都有數計下嘅。之前都同你計過恒指啲咩price to book 之類。但，「如果金融海嘯咁大鑊咪1.1倍」「肺炎咁大鑊咪0.9倍」。咁但，由「好平」到「好撚平」，0.9-1.1倍呢度都4000點以上，唔係啲跌300點又股災嘅人可以食到。況且，跌到0.9倍，你咪又係會話「監管風險冇得量化」，正如舊年你都話「肺炎風險冇得量化」，2008年都係「資金本主收皮可以好大鑊」。不過你見Cathie Wood咪又係一個屈尾十買返京東，你咪去屌佢轉軚跪低咯，人地買之前要話你知？「監管風險冇得量化幾平都冇人買」呀可？

最後，標普環球SPGI，我就唔知你滿唔滿意，我本人就好滿意，今年都升超過三成，你都唔滿意嘅我唔知你點先滿意，唯有祝你滿意。但事實係舊年12月我一寫就跌咗13%添，咁你「止蝕」嘅咪冇後來嘅事

但講返，舊年12月寫，因為舊年全球最大收購就係SPGI做，買IHS Markit，好多人聽都未聽過呢兩間公司，然後我先去睇

不過而家，而家又話可能唔批喎，咁買咗SPGI嘅點？（我都有）。文入面講

最後，就真係賣關子啦，真係有眼不識泰山，今日先發現有隻相當有趣嘅美股，唔係垃圾倉細嘢，標普500成份股呀下，陰功，我聽都冇聽過。但，掉轉頭，500隻（＊）你又識幾多隻？

業務相當有趣。或者話，相當沒趣！就係沒趣所以有趣！如果我有錢我就買！可惜我冇錢（都話買咗隻港股）。咁幾時買？有錢咪買！咁幾時有錢！九月咪有！

Patreon就話你知係邊隻，應該真係會買，但頭灰定，得閒呢兩日再睇多啲先。再好嘅嘢都有個價嘛。

（＊）其實標普500指數唔止500隻。冇錯，你估到下一句係乜：「正如香港十隻白虎都唔係十隻，亦唔係香港，亦唔一係白虎」。咩係香港十隻白虎？好似野生動物雜誌嚟的。但，神聖羅馬帝國，既不神聖亦非羅馬更唔係帝國。蘇維埃社會主義共和國聯盟，四個單詞，四個謊言，如是我聞。

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［盂蘭節，金本位制五十歲死忌］話咗寫，而家找數。今日寫Patron寫嘅，正係尼克遜50年前做嘅嘢。肯定佢最初都唔知道造成咁大影響，最初佢只係諗住暫時，嚇一嚇你，點知就一發不可收拾。但對美國嚟講，焉知非福。

TLDR：簡單嘅，你睇呢四個圖已經見到幾咁大影響。

第一，美元霸權，高度金融化。1971年前，美國貨幣供應M3，大約同GDP一致。70年代尾開始越拋越遠，後來量化寬鬆QE只係去得更盡。

第二，政府可以不停借錢。1945年至到1971年，美國債務佔GDP，一路跌。亦係70年代尾開始不停升

第三，貧富不均。1970年前，人均GDP同美國男性收入差不多一樣，亦係70年代尾開始越拉越遠。啲錢去咗邊？

第四，不投資往下流。1971年之後嘅美股，回報好過1971年好多。但明明經濟增長仲要慢咗。事實1971年美國佔全球經濟40%，而家係24%。但當時美股佔全球市場60%，而家……都係60%。

======================
呢篇文夠晒長，7000字，你可以分幾日睇，唔急。但我差不多睇咗10萬字先煮埋一碗。亦好奇怪，咁大嘅課題，你見係冇乜人講嘅。你話好難明？我覺得唔係，但就個個都只係想睇完篇文畀冧把你發達。咁就抵你冇發達。

先講歷史，一戰之前行金本位制，冇得任印，一戰開打黃金都買唔到，當然人人貶值，打完又回復咗一排金本位，然後二戰。

二戰後，1944年至1971年，就係江湖新秩序，Bretton Woods System。戰敗國當然只能硬食，同盟國一齊傾，但個個打到稀巴爛，邊個冇比人打？美國。邊個經濟最強？美國。邊個最多黃金？都係美國

Bretton Woods就係人人同美元掛勾，然後美元同黃金掛勾，唔畀貶值，你外國嘅美金就保證可以用35美金一安士換返黃金。變相就返返去全球固定匯率，有金本位。但當然已經有微妙變化。

之後大家知，歐洲經濟好返，美國就越戰。仲要以前歐洲買美國貨（重建），之後就美國買歐洲嘢。歐洲佬覺得被搵笨，係咁拎晒啲美金換返黃金，計計下根本美國唔夠找數，原來搵笨實。同銀行一樣，擠提。咁美國做乜？就係落閘，唔再畀你換返黃金，吹咩。

呢個就係Nixon Shock嘅背照，當然文中有講。

打後最近呢50年，就係法幣fiat currency，你以為背後「冇任何嘢支持」？錯了，冇黃金支持唔等於「冇嘢支持」。你試下唔交稅咪知背後有乜支持。我唔明點解有人覺得法幣係「冇嘢支持」。如果人人可以任印，就唔會有津巴布韋。

金本位收皮嘅最大影響，就係奠定美元50年霸權。聽落奇怪，明明美金變咗任印，反而地位大升？好簡單，因為，其他人都印嘛！以前你就話馬克法郎美金都有黃金，其實差不多。但到大家都冇黃金，咁你話你揀邊樣？因為咁，美金亦因為default嘅貿易同儲備貨幣。當然呢啲唔係最初尼克遜諗到嘅

美元霸權有乜證據？呢度幾個圖咪睇到，再唔夠嘅，文入面仲有大把。

你可以留意，美國信貸評級唔係最高（你以為係？），美國舉債成本亦唔係最低（你以為係？），美國CDS（你當係國家爆煲有得賠嘅保險）保費亦唔係最低，但美債先係唯一嘅終極避風港。

副作用？當然係通脹，貧富不均，但有乜所謂？總有方法撚化你班平民。況且你又唔係餓到冇飯開，有福利，少少嘢吊住你，幾年等你選一次，得咗。

政府，當然發現金本位死亡係個好東西，美國固然係，但其他國家都係。所以你見美金根本唔係不停貶值，因為人人都貶。正係因為咁，政府可以不停咁高負債但又低息咁去借錢。

然後我亦有講，金本位制死亡後，金融先變成顯學。以前固定匯率，根本冇嘢炒，亦都冇咁多國際資本流通，國際貿易係真係買賣實貨。而家就掉轉，金融活動先係「實體經濟」，冇咗固定匯率，亦冇埋外匯管制，一般就係資本不停流動，先有真正嘅「國際金融市場」，先有咁多貿易，先有中國堀起。

仲有，以前做金融係好悶的，投資銀行股市當然一早有，但以前係幫人發下債咋。當時實業家做鋼鐵做鐵路做石油先係王道，而家另一回事。

然後你亦見到，資產價格狂升，絶對唔係QE之後先有嘅嘢。你話當時因為經濟好？咁你可以睇多次第一個圖。

人工冇得加？鬧尼克遜啦。買唔到樓？鬧尼克遜啦。實業唔受重視？鬧尼克遜啦。真的。

然後會點？你話呢？尼克遜只係屎忽撞棍，唔係水鏡八奇，但總之之後美國發現呢套嘢對佢咁著數，套嘢又係佢搞出嚟嘅，你話會唔會改？其他人？邊個迫到佢改？況且，全世界政府都幾歡迎。多咗咁大權力，唔受金本位約束，點會自己放返出嚟畀你？

最後感想？大學教你嗰啲嘢，真係廢的。我都係自學，睇書，睇報紙雜誌，睇勁人寫文，再加上一路工作學返嚟。不過，大學啲教科書都仲有用，只係教嗰個廢。更加廢就係你去睇宋鴻兵《貨幣戰爭》之類嘅垃圾，冇錯寫得幾認真，但都係垃圾，睇得兩睇你就日日羅富齊共濟會蜥蜴人Deep State。

講真的，出面當然有人認識多過我，但未必可以講得清楚過我，你一舊水月費，只係睇呢篇文都抵。

＝＝＝＝＝＝＝＝＝＝＝＝＝＝
一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝