Emi好鍾意食餅，早餐和下午茶都會食，雖然買的都是"優質"品牌，原味、橙味、燕麥味輪住食，但仍然覺得日日食都不是太好，要想想辦法... 前日成功做出蔬菜米餅，今日繼續用飯試做蘋果米餅，很成功，亦成為我們今日的下午茶！以後早餐和下午茶又多個選擇😋
材料：
飯一碗仔 （煮熟）
蛋一隻
蘋果蓉4湯匙 （去皮切粒，少量水同煮，煮軟後打成蓉）
牛油1茶匙
快熟麥皮2茶匙
椰子油/牛油適量 （落鑊煎用）
做法：
將所有材料一齊blend，搽薄薄一層油落鑊，慢火煎兩邊。會比較難反，始終沒有麵粉，不夠結實。反後，"砌回圓形"就可以（或者用多點時間，一小個煎）。兩邊煎好後，放入焗爐用180度焗10分鐘，放涼切條，即成！
*因為我想乾身一點，所以放焗爐。可以因應自己喜好而調節焗的時間，甚至不放焗爐也可以。
**越乾身就越好保存，用保鮮盒入好，放幾日都ok。但香港天氣潮濕，建議盡快食或放雪櫃，食時略為加熱（焗爐，多士爐/微波爐）就可以。
