滴惜仔嘅「滴滴遊蹤深導行」免費導賞活動，前年我地都去過依個活動，應該除左九龍水務文物徑之外(因為疫情所以當時取消左)，其他五條路線都去過。
早排睇FB終於見佢地又再次舉辦活動，師奶仔嘅我就當然即刻報名，除左打算去九龍水務文物徑之外，我地仲報名再去多一次萬宜水庫。雖然我同小小豬都已經係第三次去，不過前兩次都係兩母子去，今次就等我地帶埋Daddy三口子齊出發啦！
由於我地係跟導賞團，沿途有導賞姨姨同我地詳細講解，所以對水塘同啲岩柱係了解多左嘅，但亦都因為咁有啲似鴨仔團，參觀時間就短左少少又有少少趕(係東壩大約留左一個鐘左右)，但有專車由集合點來回接送(最好當然就係免費)，所整體感覺都係唔錯嘅。
今次真係俾依個文弱書生嚇親，初頭都行得好地地，仲同導賞姨姨一邊行一邊唔停咀問岩柱、S形六角形岩、海蝕洞嘅嘢。點知回程時突然又話唔舒服，行得好辛苦，最後要Daddy扶住佢先可以行到上旅遊巴。已經沿途叫佢大量飲水，又有齊風扇、帽同遮都攪成咁，不過嗰日又真係好曬兼冇乜風，所以估計因為咁小小豬就唔舒服(唉……究竟點先可以令佢體能好返啲呢)。
雖然有文弱書生依個小插曲，不過東壩整個環境都真係好正，Daddy仲由開始行講到離開都仲講緊嗰度大自然嘅風景有幾靚，又話要再嚟慢慢行多次添。再嚟緊係好呀…不過就唔好係大熱天嚟，等十一月左右先，我怕小小豬真係頂唔順啦。
有興趣想睇下萬宜水庫有咩睇，可以睇返上次小小豬去嘅玩樂短片呀~> https://www.youtube.com/watch?v=JMzYc6JK7ms
另外，如果大家有興趣去參加依個免費活動，可以去官方網站了解更多四條路線嘅詳情同報名，不過留意返小朋友要年滿８歲先可以參加呀~>https://bit.ly/3wiiDCj
