荷蘭樓市節節上升？
最近有唔少讀者私底下問，依家荷蘭樓市發展成點。咁我就好簡單地同大家分享一下呢一方面嘅情況啦！
同全球各大國家一樣，荷蘭嘅樓市喺過往幾年都不斷上升。2019年平均樓價上升6.9%， 2020年上升7.8%，由銀行預期2021年整體會上升8%。
好多人一開頭會以為，肺炎會令到樓價下跌，但過去一年嘅數據顯示，當地樓市不跌反升，有啲地區平均樓價有雙位數字升幅。當中嘅原因有以下幾點：
第一，荷蘭房屋市場長年供不應求。
根據政府資料顯示，荷蘭喺2030年嘅時候人口就會增長至大約1880萬人（目前係大約1730萬人）。目標係喺2030年之前新增大約100萬間房屋。但過去幾年新增房屋數量遠遠未能達標，而市場上公開出售嘅房屋亦越來越少，2021年嘅數量更達致新低。2020年中荷蘭嘅房屋需求係大約33萬戶，但成交量就只有24萬戶。有銀行預計， 2025年嘅房屋需求會去到差唔多42萬戶！
第二，房貸利息低。
歐盟嘅銀行利息創新低，利息大約1-2%，導致貸款買樓嘅成本大大減低。亦都係令到唔少人想趁機會買樓嘅原因。
第三，荷蘭政府免年青買家印花稅。
原本喺荷蘭買自主房屋，需要俾2%印花稅。舊年荷蘭政府為咗幫助年輕買家置業，免去18至35歲首次置業人士嘅印花稅（只限400,000歐元以內嘅房屋）令到唔少年輕買家趁機上車。
第四，買家FOMO 心理。
以上幾個主因，令到唔少人都有Fear of Missing Out (FOMO)嘅心理，深怕錯失買樓良機，遲咗買樓價又會再升，所以趕快入市。
第五，買家想喺肺炎對自身經濟有重大打擊前利用買樓「多個保險」。
因為疫情依然持續，好多人難保日後自身嘅收入或者經濟情況會唔會因此受影響。所以就想趁收入依然穩定嘅情況之下，盡快向銀行借錢買樓，以減低日後疫情對自身經濟情況嘅衝擊。
其他外圍因素：經濟復甦快，失業率比預期低。
好多人以為肺炎會對經濟大大打擊，但荷蘭經濟復甦比預期快，最新失業率只有3.9%（英國4.8%，，美國5.9%，香港5.5%）。本身荷蘭有能力買樓嘅人少，經濟好當然會帶旺樓市啦！
樓市其實非常複雜，呢篇文章都只能夠講少少皮毛。如果讀者對荷蘭樓市、買樓、裝修等感到興趣，不妨話我知。得閒可以同大家多啲分享一下！
又：其實之前都寫咗三篇《置業篇》，講解喺荷蘭買樓嘅實際操作，有興趣嘅朋友都可以留意返！（喺IG度碌返落去，或者去patreon都得！）
#香港人
#香港人在歐洲
#香港人在荷蘭
#荷蘭
#買樓
#置業
#上車
