【補充鈣質點止飲奶？】
對女人而言，及時補鈣好重要。因為隨著年紀增長，大概到咗40歲，骨質就開始明顯流失。到咗更年期，女性因體內嘅雌激素下降，體質流失加劇，容易患骨質疏鬆。為使骨骼強健啲，好多人從飲食入手，甚至服食鈣片，加強鈣質攝取。不過，你知道要身體充足吸收鈣時，其實需要其他營養素輔助嗎？否則，即使你食幾多鈣片和含鈣食物，效用不大。
維他命D吸鈣鎖匙
鈣係製造骨胳和牙齒嘅主要元素，而維他命D就好似一條鎖匙，打開大腸嘅門，讓鈣質進入。所以要充足吸收鈣，補鈣同時要有足夠維他命D。維他命D可以透過陽光嘅紫外線照射皮膚後喺體內合成。每日曬10分鐘太陽，已經能夠為身體製造足夠維他命D。如怕曬太陽，都可從食物中攝取，但含有維他命D嘅食物唔多，主要來源有：三文魚、沙甸魚、吞拿魚、蛋黃或添加維他命D嘅奶製品或豆奶等。
磷多鎂少礙吸鈣
另一種要同鈣一同吸取嘅營養係磷。好多人身體缺鈣，唔係因為食唔夠鈣，而係身體太多磷。正常情況下，人體內嘅鈣和磷比例係2:1，但因為現代人常飲汽水、咖啡等，食好多炸薯條、漢堡、pizza等，令身體內嘅磷過多，結果鈣都被磷趕走，因而令身體缺鈣。磷太多，阻礙鈣吸收；體內鎂不足，又會影響鈣吸收。鈣和鎂像孖兄弟，缺一不可。正常比例為2:1，最有利鈣吸收。食物中含鎂較豐富有杏仁、腰果、黃豆、穀物、鯖魚、龍蝦、黑麥、小麥等。
高鈣3寶
講番補充鈣質，一般成年人每日應攝取1000毫克鈣，年過50歲以上，建議1000至1300毫克鈣。食物中，含豐富鈣質有奶製品、豆類、乾果及綠葉蔬菜等。眾所周知，奶製品含鈣量多，不過有人對奶敏感或討厭「騷」味。唔飲奶嘅話，食乜先可以攝取較多嘅鈣呢？有種食品大家可以考慮多食，就係硬豆腐、芝麻和杏仁。按衞生署資炓，每100克芝麻有989毫克鈣質；每100克硬豆腐有320毫克鈣質；每100克杏仁有266毫克鈣質。飲一杯240毫升脫脂奶，只有299毫克鈣質。其實飲奶得到嘅鈣唔算多，食100克罐頭茄汁沙甸魚連骨都可攝取240毫克鈣，只係大家由細到大都被灌輸飲奶多鈣嘅概念，因而認定奶係吸鈣嘅最佳途徑。
