《英語神話》陳心遙
《信報》2018年3月28日《視線所及》專欄
上星期國際影視展入面，同一個喺倫敦居住嘅英國人傾偈。佢話而家喺倫敦，有時都未必完全明晒啲人講乜，因為來自世界各地唔同地方嘅移民、留學生、旅居、做生意嘅人都將自己嘅發音同詞彙帶到入呢個體系入面，尤其係美式英語，日常生活要聽到傳統如女皇的英式英文，可能要到較北部嘅地方，或者扭開英國廣播公司嘅電台電視台喇。
英語隨着上世紀盛世，加上互聯網普遍，地位好難動搖，有數據話全球約有十億人學英文做第二語言，我懷疑呢個數字被低估。以往嘅諗法係：英語作為母語嘅國家同人民，喺呢個英語主導嘅世界佔優勢。其實唔一定，就以最近俄羅斯涉嫌干預美國選舉為例，外國黑客可以從英美世界入面，相對更易理解所有機密文件嘅內容，大大小小嘅資訊都可以有效運用，大如國防機密、間諜活動，可以待價而沽，小如情色醜聞又可以透過全世界不限於英美嘅媒體度發放。更有甚者，愈嚟愈多英語人才製造假新聞，反過嚟影響英美世界嘅民意。呢啲消息全部毋須翻譯，你同我都可以即刻理解，然後喺社交媒體以有如細菌繁殖嘅幾何級數傳開去。相反，英文嘅便利令到英國人同美國人相對冇咁積極學習外語，打一場網絡戰，施展相同伎倆，花費嘅時間同成本高好多。一直以嚟，英語霸權等於話語權嘅神話已經破滅。
早前英國脫歐，有歐洲大陸嘅輿論以為，係時候用其他歐洲語言，好似法語或德語，嚟取代英語喇。因為歐盟入面，已經冇一個以英語為母語嘅國家。但事實係，英語根本唔係英國人嘅專利，從來唔需要自認係英國人先可以用英文嘅。掌握第二語言從來唔係一件容易嘅事，你同我都係由出世開始學英文字母。喺歐盟各國入面，冇咗英國，英文仍然係最多人用嘅第二語言，喺德國、瑞典等國家，英文流利程度根本同英美無異。英語作為國際語言，由科學、醫學，到環保、文化娛樂，任何國際會議都主要用英文溝通，捨棄英文，真係談何容易。
事實係，地球上愈嚟愈多人學新興地區如中國、俄羅斯、巴西嘅母語，特別係普通話，好多人睇好喺商業社會可以有取代英語嘅一日。無人知道未來係點，不過有成為一種全球通用嘅語言，基礎就係無遠弗屆、聚沙成塔嘅影響力。要做到咁，首先就係包容，包容變異、分支。所謂「有容乃大」，事事講求規範化，只會距離目標愈嚟愈遠。
#英語神話 #信報 #陳心遙
