林忌：一年幾以來，就2019冠狀病毒嘅「抗疫模範生」台灣終於失守，走失病毒入社區造成本土大爆發，親中傳媒一改過去一年，對台灣抗疫視而不見嘅態度，也漠視了習近平於2020年9月所聲稱「國家競爭要守住道德底線，反對把疫情政治化」嘅態度，卻對台灣政府窮追猛打，對疫情問題落井下石。
抽水還抽水，呢一年來，中國外交部以至大外宣不斷聲稱，反對「把疫情政治化」、「信口開河發表謠言」，之但係今次親中大合奏，不但係信口開河，以至真係隨口就吹，可謂乜都佢哋講晒；例如咩「批當局只顧排外」，吹到台灣失守係因為「花太多精力搞邊境管控，不注重篩檢和提升民眾防疫意識」，老屈人哋「誤導民眾以為只要把外地人都趕走，台灣就安全了」，真係屈得就屈，點解成日投訴「假新聞」嘅，都扮睇唔到呢堆擺明造假嘅新聞呢？
一如香港、新加坡最近嘅疫情失守，都係衰在檢疫酒店感染出事，再把病毒流入社區；同樣道理，台灣最近疫情嘅爆發，其中「華航群組」嘅源頭，就係華航嘅印尼籍貨機機師，以及供佢哋過境休息嘅諾富特飯店。而出事前夕畀人鬧爆嘅措施，就係台灣當局於4月15日起，將本國航空公司抵達台灣嘅機組人員隔離期，由5日居家檢疫，減為3日（3月時本為7日）。
病毒唔會「無中生有」，一定係境外流入；咁點樣流入呢？相比起香港對機組人員要求嘅隔離14日至21日，台灣則在短短2個月之內，由7減到5再減到3，4月嗰時成班親中傳媒，仲力撐機師工會罷工「機師壓力快崩潰」，仲有咩「連洗牙都唔畀」，要求減少檢疫日數，家下就倒轉槍頭，話政府要為減少日數導致爆疫症「負責」。
明明係源頭嘅華航機師係印尼籍，黨媒可以老屈係「台灣籍」有特權而「排外」；明明出事正正係「邊境管控」唔夠嚴，漏洞搞出大頭佛，黨媒可以倒轉話係「花太多精力搞邊境管控」；又倒轉頭睇，香港禁英國、印度、巴基斯坦等國嘅航班添，來自外國要21日隔離，飛中國就14日，再對陸路以至「來港易」要免隔離，講咩「差別待遇」，香港嚴重得多，仲好意思去質疑台灣呢點？冇嘢呀？
何況唔單止傳媒抽水，連民建聯嘅立法會議員陳克勤，都親上Facebook貼圖，聲稱「蔡英文執政近5年令台灣無水、無電、無疫苗」，講到台灣好似人間煉獄咁，咦？之但係人哋搞到咁大頭佛，確診數字都遠遠低過中國與香港喎，咁係咪我哋仲衰多兩錢呢？
台灣唔落雨怪政府，咁早前廣東省唔落雨嗰時，唔通又怪政府？陳克勤呢頭笑人哋「無電」，呢幾日廣東省自己都要限電，例如東莞有企業要「開五停二」，咁唔通又要怪中國政府？更好笑係政府仲話要同廣東省聯網，話要同廣東買電添，人哋都唔夠，仲要搶大陸嘅電來用？究竟邊個唔愛國呀？（未完，全文按連結，請訂閱壹週刊）
