2019年，有啲嘢笑下玩下冇所謂，
但動機不良、太黑心嘅就無謂做了。
唔知嘅嘢、唔識嘅人，
並不會成為你包裝自己包裝得好孤高嘅花紙。
你可以選擇你唔知、唔想知、冇興趣知，
但如果呢個「唔知」
變成你「藐視」一個人一件事，
咁就好危險了，
因為你用咗「唔知」去做武器，
去「唔尊重」別人。
累積落嚟並不是好事。
我都要提醒自己
我選擇知與唔知，
只係單純地屬於自己嘅選擇
而不是借此嚟傷害其他人嘅存在同努力。
我知到咗今日仲講叱咤頒獎好Out，但有一點不得不說，要多謝艾粒呢part，帶出咗一個近年積咗喺心好耐嘅問題：「喂，點解你可以無知得咁串？」我真係聽過無數次類似嘅說話... 「我真係冇一首歌識喎」「呢三個其實係邊個呀」「呢套戲咩嚟㗎？真係未聽過...」以上嘅說話，在我耳邊聽到嘅時候，都唔係一個問題，而係好有骨咁講... 即最尾唔係「？」而係「！」
細個嘅時候，阿媽、老師都會教，唔識就去學多啲，增值多啲、識多啲嘢、多啲墨水，做個有用嘅人。但而家從大家帶住「！」嘅語氣，背後嘅意思應該係「我唔識你唔係我嘅問題，係你唔夠紅令我認識！呢個係你嘅錯！」嗱，等我理解一下先，我唔識你，係你嘅錯，呢個係一套點樣嘅價值觀？一個人要有幾自我膨脹先代入到呢套思想？
我真真實實地聽過，有位年輕人企喺劉德華演唱會海報前講：「好心啲老人家唔好再阻住地球轉啦！」你後生，你鍾意聽JW、胡鴻鈞係冇問題、好正常，但點解要咁去講一位你口中嘅「老人家」？真心，一位「老人家」有清福唔享而走出嚟繼續同你跑跑跳跳，我佩服佢都嚟唔切。點解你唔識佢，就包容唔到佢嘅存在？點解喺我哋不斷追求要有自由、平權嘅年代，我哋對身邊事物嘅包容程度會越來越低？
Swing《大大公司》呢首歌裡面有句歌詞我好鍾意：「不懂欣賞，不必醜化」你唔識嘅，你可以去認識，認識完都唔鍾意嘅咪算囉，冇人迫你一定要鍾意。你可以發聲表達意見，同時亦請尊重身邊唔同嘅聲音。你反映咩聲音，通常就係最直接地反映出你係個咩人。我哋唔係百科全書，無知唔係錯，但拜託唔駛將你嘅無知放到咁大去俾人睇啫...
