《由鬥黃講到黃色經濟圈的生存策略》
-
-
前陣子有讀者喺Patreon話想我講吓藍黃問題，話想我講吓政治，特別係喺社會咁撕裂嘅環境底下，其實藍/淺藍/淺黃/黃嘅人到底個價值觀有乜嘢分別嘅呢？我自己就覺得呢個係一個好問題，但更重要既係我作為一個黃絲，我希望我既想法，我既文字可以幫得到成件事，好過真係齋評論，冇實際意見提供得到。加上近日由龍門同渣哥之爭，膳心小館勞資糾分，到龍門告前員工誹謗。都睇得出黃店又好，黃絲又好，都唔係好理解點樣對待「黃色經濟圈」呢樣野。
其實「黃色經濟圈」呢件事操作上黎講原理上並不複雜，但係實行上難度好高，特別係7月1號之後，已經較難做到我以前文章所講訂立一套客觀可見的準則去做。所以最近大家見到之前係黃既就繼續，新店比較難變黃，呢個都係影響到「黃色經濟圈」可持續性既問題，令「黃色經濟圈」擴展遇到樽頸。
-
-
鬥黃係致命傷
由龍門事件我地可以學到好多野，例如，我地對黃店既標準係唔係定得太高？而且不切實際？「黃色經濟圈」同其他戰線從根本而言就十分唔同。要分類，「黃色經濟圈」簡單黎講算係「補給線」，而比起其他線，呢條線既原則性本身就唔需要咁強，意在團結大家，將資源作更有效既利用。即係話，我地希望個「黃色經濟圈」係廣，而非深。當然，冇人會介意你好深黃，但呢一刻黎講，多黃店，係好過得幾間，但果幾間好黃。大家同唔同意呢點先？
再推一層，我又問問大家，其實鬥黃到底係客人要求商戶鬥黃，定係商戶之間鬥黃？鬥黃係邊度黎，而鬥黃又有咩客觀既效果？係唔係同我地想行既方向一致？首先，我之前講過，黃店既定義大家要搞清。係我既心目中，你公開到自己係有同一價值觀，以前我提議過最易應就係你印d字句係張單度，或者你貼文宣，咁你就係黃店啦！而家因為字唔可以亂貼，所以要清楚清明係難左，但又唔係完全唔可行。例如，商戶可以唔播TVB，播下黃色kol既野，貼下d唔敏感既文宣，辦法總係有。咁好喇！因為新店難變黃，加上人有種隋性，本身係黃店既，就一定冇死，大家都去果d黃店。慢慢，就變左，如果你唔係深黃到出面，就冇人幫襯。大家會見到，知名黃店日日大排長龍，而三日唔埋兩日就有小開店叫救命。係唔係小店唔夠黃呢？有時都唔係，但小店之所以係小店，就係因為佢地力弱，我舉個例之前大家登蘋果廣告，幾間大黃店成版成版咁登，係唔係代表佢一定黃過其他人？唔係呀，只係代表佢地真係有錢，主要原因係佢地日日大排長龍，賺到錢先可以做到咁。小店一版幾萬蚊既錢，分分數等於佢一個月既生意額了。
所以，鬥黃係一個因為係疫情之下激發出黎，一個要生存而吸客既結果。事實上好地地商戶係冇必要鬥黃的，個人本身黃，放左工做左乜係唔洗話你聽。好似我咁，我作為黃店，你連我公司係邊間都未知，係咪？咁鬥黃既結果係咩？就係大家加強左因為商戶「夠黃」而得到既利潤，而令普遍黃店既數目係短時間內減少。呢個係唔係大家想見到既結果？「黃色經濟圈」講求既財富分配，令所有黃人都生存落黎，一個不能少既精神，有違背嗎？大家想一想。
-
-
黃就唔批評得？
正如我頭先所講，「黃色經濟圈」簡單黎講算係「補給線」，同其他線唔同，其他線打緊仗，可能真係團結少少會比較有效率。但係「黃色經濟圈」係一個講可持續性為主既部份。當你做一樣野要有可持續性，其實免不了係不停檢討改進。我以成波之路對龍門既食物作出批評呢單野做例子，龍門d野好唔好食，大家自有公論，我唔會俾意見。但係有人提出呢間名店唔好食，係唔係有問題呢？呢個就關係到成個「黃色經濟圈」既生態。我係之前有講過我對黃藍店既對待方法，簡單黎講就係，藍店，幾好食都唔會食。黃店，唔好食既盡可能唔食，由好食既黃店開始食先。同佢夠唔夠黃冇關係，佢只要黃，我就一視同仁。點解呢？因為呢個係對「黃色經濟圈」最好既生存策略。
我覺得你d野唔好食，有人提議，其實有不滿可以私下pm龍門，唔洗出個食評去批評龍門d野唔好食，我認為呢個有少少本末倒置左。成波之路係一個食評為主既Page，佢既責任係透過去唔同地方試食，介紹返唔到餐廳既好同唔好，令資訊透明，俾消費者自己選擇。你會見到成波之路係黃既，你冇見到佢會去藍店試食，都冇幫藍店做宣傳。佢只能去黃店做試食，咁係唔係佢以後就唔可以講任何餐廳唔好食呢？佢你係咪想佢為左成就黃店而執左個page佢？因為自此以後佢個page就冇全何參考價值了。
再跳出黎由黃店同消費者角度睇，市場資訊透明，到底對邊個冇利呢？如果你本身間野d野係唔好食，我食左一肚氣，有個錯誤期望，對所有人都冇好處。所以，呢個世界市場資訊透明係絕大部分情況都好係事。如果你係鍾意某一間餐廳，佢好唔好食唔重要，咁就算幾多人同你講唔好食，你都會去。但係如果有一家人，黃既仔女想帶藍既父母去食黃店，而你d野唔好食，咁黃仔女既計劃就失敗了。我地係需要有好食既黃店，令藍絲欣賞到黃店既真材實料。如果你做盤生意本業都做得唔好，就因為你黃就成功，咁你不如上前線，你唔應該留係「黃色經濟圈」，咁只係一場資源錯配，你有更加岩你既崗位，一間餐廳食物水準ok係常識來的。如果咁都得，我地就係真正懲罰緊同我地理念一樣，又好俾心機製作好食食物俾我地既黃色商戶了。
-
-
明星黃店fans互片
我個人講野好直，開名都唔怕。其實呢兩三個月，龍門同渣哥陣營既互相攻擊，其實係好傷害到「黃色經濟圈」，呢d就真係內訌了。其實窮生我聽左網台咁多年，呢d私怨是非真係睇慣，人類總係犯同樣既錯誤。我亦跟得唔貼，唔想批評任何一方。我只係想講一件事，就係大家有大家既信仰，有d野如果係有證據，就公開出黎俾大家睇，咁就證明有人扮黃呃錢。如果未去到呢個位，大家就冇謂互相攻擊。大家既fans大可以支持返自己果邊既商戶，你誓死唔幫襯對家都冇所謂，自由市場。
比較起一班「好貼市」既fans，更多人就好似我咁，係一般黃絲。人世間有好多野就係有理說不清。所以如果我地有懷疑，我地就更加會流向小店去幫襯。呢個又去返我上一段講，敝除藍店之後，點解食物／服務質素始終最重要。因為你開得餐廳，我真係當你係食物專業。你賺到錢，你要回饋，可以請手足，可以派飯，用自己專業幫人。如果唔識，就出錢俾專業既去搞，呢個係交易成本最低既方法。一陣你d野唔好食，我因為你黃所以迫住食，你賺到錢，又用冇效率既方面幫手足。咁成件事幾蠢，幾冇效率呢？
其實呢件事件，都正正值得大家反思，大家呢年搞「黃色經濟圈」，有冇太過放大某小部份黃店既影響力，忽略左成個「圈」既宏觀發展？我係幾個月之前都講過黃色經濟「圈」不是黃色經濟「點」，我地要既野生態系統，而唔係建造神殿。我以為咁基本既野大家都會明，但我都必須講一句，Common sense isn't actually common…
延伸閱讀：
《消費就是用鈔票決定「把社會交到什麼人手上」的行為》
https://www.patreon.com/posts/xiao-fei-jiu-shi-38145994…
《黃色經濟圈的實際操作考慮》
https://www.patreon.com/posts/huang-se-jing-ji-37871728…
膳心小館黃藍 在 勞工組- 【無良Agape Garden 膳心小館- 好大嘅官威呀！】... 的推薦與評價
無良Agape Garden 膳心小館- 好大嘅官威呀！】 面對揭露黑心黃店，勞工組都掙扎左一段時間，希望盡最後努力溝通，希望拖欠手足代通知金嘅黃店膳心小館可以亡羊補牢， ... ... <看更多>