一年前嘅今日，終於終於好辛苦咁捱過4，5粒鐘，忍住痛咁生你出黎。
到依家呢刻對作動，生產嘅畫面仍然瀝瀝在目，每次諗返起喺產房，後產房，坐月嘅畫面，我都會忍唔住😢...
記得我生完第二日先有少少力可以落床，被老公拖住，行咗大概20分鐘先行到去原本只係數分鐘嘅路程去到兒科（當日畫面的確同bb來了見到一班喪屍行路果幕係100%一樣），行到其實已經喘晒氣加上血壓低，其實行兩行就已經想暈，但一路靠住意志力同感覺到有把聲叫我堅持行落去，我知道你都好掛住已經分開咗一日嘅媽媽。
當我第一次親手抱起你，你係一pat野而且有啲陌生，唔敢相信你就係我肚入面住咗十個月嘅寶寶，但係好多謝上天派妳來做我嘅寶貝，讓我重新再學一次做人。
雖然初生頭幾個月，我完全被她擾亂，每日每夜都無得瞓，每1次睡眠大概只可以維持2小時多，加上各方壓力，唔如意事情，親餵唔到，塞奶，孩子常哭，身體累，唔想應酬。覺得生仔呢件事根本就係挑戰人體極限，有時覺得自己係發緊夢，又會灰到想返返去未生之前，果時每朝早我都話要同呢個女仔絕交。又記得有一晚忍唔住喺廳爆喊，我以為佢唔鐘意我...個心好似穿咗個窿...
但日子越耐，原來我越花多啲耐性陪佢，佢真係會感受到我對佢嘅愛。加上佢每日都好努力適應呢個世界，對任何人都笑卡卡，越黎越可愛同古靈精怪，越黎越識表達，越黎越得人鐘意，學野越黎越快，我同佢嘅感情都越黎越好！
雖然呢一年，我流過好多傷心嘅眼淚，但係到呢一刻，我得到嘅快樂亦都很多，睇住佢成長，學識每一樣野，真係好有滿足感。被女兒重視，被需要嘅感覺真的很好，我好快樂！
然後覺得自己真的不是公主病，我真係識得照顧人，我人生無咩特別事覺得自己係特別成功，但現在我好驕傲自己係貝貝嘅媽媽！
陳貝螢，我愛妳，一歲生日快樂🎂！妳一定要繼續做個開心寶寶！
我會繼續陪住妳成長，盡量見證妳每個特別時刻，以後請繼續多多指教，做爸爸媽媽嘅推動力💨希望你同樣也愛妳的爸爸媽媽！
FB: 貝貝Alice-小寶貝夢遊日記
IG:bowl_lam
#貝貝Alice #90後媽媽 #香港媽媽 #新手媽媽 #新手爸爸 #女兒一歲了 #不再是bb #肉麻無罪 #大個要畀貝貝睇返 #給貝貝的信 #說著說著又被感動到 #其實生日真係應該要多謝媽媽 #生仔真係來回地獄又折返人間 #搵命博
