［恒指季檢嘅嘢］Patreon寫咗篇週末大作，就反而唔得閒寫呢個。而且stand alone呃一篇文又唔夠內容，所以放埋呢度益大家。當然之後個Excel我會放返上Patreon，但其實你自己整都好快
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
1. 講返，上星期五恒指季檢，係「大改革」後第一次執位，充滿變數。結果亦令好多人跌眼鏡（都包括我）。大熱嘅京東9618同網易9999都冇入選，關永盛（我知退咗休，但正如考試局梗係要叫返考試局，蔡熾昌梗係蔡熾昌）當然冇話你知點解。兩隻嘢仲要星期五都炒咗上嚟，咁你估到了，星期五晚美股當然回調返（知道有上美股架可？），但，都未嘔突星期五升幅，算幾溫和。始終兩間公司業務都扎實。
2. 其他出出入入，都列晒出嚟。唔止，有啲比重升跌嘅，都列埋。當然啦，綜合各方媒體報導。但要自己做都好易，甚至更好。因為比重變動大嘅未必真係最大影響（講乜？陣間解）。但我一來無Bloomberg用，二來懶，就用返報紙報導算。喂我都拎咗幾廿蚊去買報紙喎。
3. 但講返，恒指公司有話你知執位前後嘅百份比（新貴咪由零開始，踢出咪歸零），咁而恒指公司又有話埋你知有幾多資金追蹤呢啲指數（BTW，其實好少），咁你咪計到有幾多流出流入。
4. 咁但，只係比重轉變大，唔代表對股價影響大。你仲要睇埋隻嘢平時幾多成交嘛。例如美團話幾十億被動資金追，但，平時都幾十億成交架啦。所以要計埋平時成交。然後一除，咪睇到「要幾多日消化」
5. 不過，由於時間關係，又冇Bloomberg用，我只係用咗星期五嘅成交。「咁肯定唔太準」。理論上應該用30日或90日，但咪話咗冇Bloomberg，懶計。咁明顯，例如騰訊咁啱星期四出業績，仲要麻麻地，星期五梗係大成交，240億。平時應該係100億上下的。但，懶計，一唔係你畀錢我裝Bloomberg
6. 得出嚟，就係呢堆嘢。比較要多日子消化嘅，黃色highlight．留意比亞迪入兩個指數，但夾埋都唔夠2.0，所以冇highlight．
7. 碧桂園服務入恒指，夠晒意外。至於友邦要下調，一早預咗，主要係因為個比重太高超過上限，要調返低。但十分老土一句，呢啲嘢同基本因素完全無關，如果股價因為咁回調，就係買入好機會添。
8. 科指嘅，隻汽車之家，其實我聽都未聽過。同時間仲入埋恒生綜合指數，即係理論上夠資格入「港股通」，有北水表叔買貨—不過如果我冇搞錯的話，隻嘢第二上市，應該唔合資格。但只係入科指呢舊都應該有啲買盤。況且隻嘢夠晒細，1000萬成交……（但成830億市值，玩乜？）（星期五仲係比較多成交嘅一日添，有時得幾十萬！）
9. 至於中興同鴻騰嘛，就踢出去的，都要兩三日先消化到。
10. 講到尾，今次換馬，雖然有京東網易大熱倒灶，但其他出山入入嘅，對股價影響應唔係太大。以前有啲真係計數要搞十幾日先消化到。
11. 至於係今日已經股價郁丫，定去到臨換嗰日先郁？以前好似多數係後者，而家變咗前者。市場不斷進化。以前試過睇隻信和，被踢出嗰時，涉及資金好大的！應該係平時一日成交十幾倍。但，當日股價又冇事喎。睇返成交？又真係有十幾倍。但點做嘅呢？見到全部盤後交叉盤的，似乎一早同其他基金傾掂數。
12. 留意，完全冇講國企指數，因為堆嘢唔使幾耐消化。但另一個問題係，國企指數根本就邊緣化，變到好似恒指咁，「咁我不如買恒指」。
13. 事實你留意下，追蹤恒指嘅被動資金（主要係盈富基金2800，但仲有其他的，甚至外國都有），規模大約220億美金。國企指數呢？50億左右。但最有趣係，科指都有成30億美金．而睇後勁，似乎係科指勁好多，應該有機會過埋國企指數頭。但國企指數差不多廿年歷史喎！科指先一年貨仔未夠。
14. 不過順手又講埋，追蹤恒指嘅被動資金，220億美金（當中過半係盈富基金，仲有啲2833以及其他），聽落好似好多。但，同其他地方比呢？追蹤標普500指數嘅被動資金，大約係50000億美金，即係恒指嘅200倍以上。固然美股市值大過港股，但邊有爭咁多（美股市值大約係香港10倍左右啦）
15. 順手講埋，追蹤標普500指數嘅被動資金，就大約係50000億美金（所以之前Tesla入標普指數都好大件事，因為好少公司係養到咁大先忽然入去，一入就變咗十大）。道指呢？我一時好似搵唔到實數，但應該係標普指數嘅10%都冇。亦證明咗，識睇一定係睇標指。
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
（＊）
