見吾友 君子馬蘭頭 - Ivan Li 李聲揚 咁成功，又學吓佢筆觸撩幾件字隨筆先。
話說，今日濠賭股洗倉。是咁的，所謂嘅政策市，只有一個原則，就係無原則。
剛好呢幾日我身在 Las Vegas。目測嘅結論係，除咗文武同尚氣，我應該係方圓幾百里極少數嘅 Chinese。我真係巡過啲百家樂枱，全部收晒檔。
「嘩，Vegas 咪好慘淡囉？」是咁的，如果唔係一支公可以 walk-in 去 bar 枱，我都唔會整返件 Beef Wellington 嘅。聽帶位講，正路 book 枱要早一、兩日。嘩，乜料呀，Gordon Ramsey 咋喎，兩日？
又，走到一里長街，極目之下都係人。另外一個觀察就係好多黑人；就連街上面同人影相嘅森巴舞孃，八成係黑妹。我可能睇落似十環幫，佢哋見我行過都彈開幾呎。
呢幾日其實我係出席一個叫 Money Show 嘅美版財演 conference，我嘅題目係「神奇國度的地緣政治」。同場有位朋友名曰 Saber Rock，佢真係阿富汗人，過去十幾年係美軍駐當地嘅盲公竹；講到一帶一路，佢嘅 comment 係：「塔利班都搞唔掂塔利班喎。」
另外，酒會上有人叫我留意一隻叫 FRDM 嘅 ETF；Freedom ，呢隻嘢嘅宗旨係投資神奇國度影響唔到嘅新興市場。作為分散風險嘅工具，都係一個低成本嘅選擇。其實呢隻 ETF 最重倉，一曰台積電，另一隻係三星。（補充返先，呢個資訊，不構成推介或邀約；投機有輸有贏；必贏嘅就唔係投機。）
其他正經嘢，就留返 unsubject 同 Patreon 寫；唔貼 link 喇，有心人要搵，一定搵到。
