【Kongner編輯室】
瘋子愷：2019 Happy Kongner 小事回顧
2019年話咁快就到咗尾聲啦，今日亦都係本人今年最後一次喺Facebook出文，所以本人都喺度先行預祝各位喺2020年可以做到自己想做嘅嘢，未搵到目標嘅都祝各位搵到自己熱衷嘅事，而且下年大家都可以繼續以香港人嘅身分努力落去。
今日開始網上都出現咗唔少回顧2019嘅Tag，而正好本人都對於每次出文都係鬧狗官嘅呢種情況感到沈悶，所以今次就由本人開個頭，試下回顧呢個垃圾台喺2019年做過啲咩啦。各位有興趣都可以留言分享吓你哋喺呢一年同我哋一齊渡過嘅時光，又或者分享下自己今年嘅難忘事情㗎（其實係幫輕下本人，唔使寫咁多）。
Yahaaaaaaaaa, it’s rewind time.
本人認為2019年嘅Happy Kongner係探索同嘗試嘅一年，而亦因爲承蒙大家嘅支持，得到咗唔錯嘅成績。首先就要提到對於好多觀眾嚟講我地台嘅主打嘅節目，亦即係 米迦 Micah 嘅《美帝的籃球》（20分鐘）成功過渡到《𠝹櫈電影學會》（30分鐘）同《做乜嘢懶人包》（40分鐘）。除咗多得眾多弟兄支持之外，更加得到各方好評，不過最重要嘅影響當然係愈來愈少人問「幾時出美帝」啦。
而《公仔書與卡通片》嘅主持亦成功由本人瘋子愷順利交接到新主持奧雲手上，到最近更加去到幾乎無人記得有呢個節目嘅存在。由於反正都無咩人睇，所以對於本人來講，實在係可喜可賀也。
至於 @MK．Ringo 嘅《成王之路》系列亦保持超高水準，成為對於想重溫《海賊王》劇情嘅人來講不可多得嘅一個系列。隨住《海賊王》劇情愈來愈明確，箇中牽涉更多嘅政治元素，相信下年睇嘅人都會愈來愈多，除非佢地睇唔明啦下。
而更重要嘅當然唔少得我哋除左 Hoki the Kongner 呢位異常瀟灑嘅創作者之外，再有兩位創作者嘅加入，就係做《6mm生活雜誌》嘅班Nteven長 @Steve_in_Kongner 同《網球角落頭》嘅Delon。佢地每一位除左都有著係自己範疇嘅知識之外，更加有著本人無可比擬嘅創作熱情同耐性，實在令本人汗顏。本人亦都要對平時成日對佢地份稿諸多要求呢樣嘢講聲唔好意思，雖然下年都會繼續咁做。不過講真，請大家多多支持佢地啦。
過去呢六個月，香港人嘅公民意識直線上升，呢個係之前無人可以想像得到嘅。而更難以置信嘅係睇我地台直播嘅觀眾亦有顯著嘅上升，本人相當感激各位嘅支持，我地一定會繼續努力做直播，無論係心事台定深宵，或者係嚟緊將會復出嘅直播節目都好，我哋都會繼續好好利用呢個同觀眾互動嘅平台，日日被人被分化，晚晚被人被熱狗。
最後，當然係要多謝各位支持呢個Facebook Page。本身呢個Page嘅原意只係作為Youtube嘅後備通訊平台使用，但最後得到超乎預期嘅回響，實在令人鼓舞。不過睇返Youtube果邊，垃圾台Happy Kongner今年內依然都係到達唔到10萬訂閱，抵啦。
2019年，相信將會係對於香港歷史來講重要嘅一頁。而呢一年發生過嘅嘢，將會作為重要嘅經驗使我地進步，多謝所有香港人係2019年嘅付出！本人希望到咗2020年，香港人唔需要再乞求一個無人性嘅獨裁政府「回應」五大訴求，而係靠自己將我哋應得嘅嘢爭取返來，我哋2020年再見，Bye!
（本欄逢周一、四更新。敬希讀者垂注）
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-
HappyKongner 招稿喇！！！
我哋嚟緊會喺逢星期五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
網球角落頭 在 網球角落頭Tennis Corner - YouTube 的推薦與評價
Share your videos with friends, family, and the world. ... <看更多>