【龔成問答信箱】（Q20601-Q20620）
Q20601：
老師我之前睇完你富途訪問，同埋我已睇晒你書，我綜合老師的投資方向，我地最重要是做到以下幾點：
1.平衡配置
2. 買入優質股並長期持有
3. 根據自己年齡去買入
4.以短期負面表面消息買入好股
5.減少支出,增加收入
但我依家最缺乏是心態, 如果比著我一隻股票由16蚊升到80蚊再跌落10蚊，坦白講 我應該80蚊就放左, 我相信80%既人都會放,我覺得技術都是其次,心態先是最大框架令人資產有限化。
Q1 點先可以有你既勇氣同心態
Q2 當年你用80萬買1211 係16蚊時候買入, 我相信已經超過你總收入5成, 我後生 我都好想好似你一樣用一半資金在合理區買入1177/9988買入一隻股票
哩類優質股我相信冇升1倍都有1半,就算坐艇我都唔怕,長遠一定升返上去 可否好似當年你咁做 對一隻股票有信心 就大筆買入並長期持有。
假設比亞迪令你賺到第一桶金, 萬事起頭難, 我都想有自己第一桶金。
最後我想多謝老師你，因為我用你既方法買入股票幫左我好多, 15年到依家我資產已經上升了3至4倍,
好似領展由43蚊買入, 一直持有到依家, 你真的幫助我。只是我想更富有, 我想太太可以冇負擔, 我想做人有更多選擇。
我想辭去依家哩份政府工,然後出去闖, 但我需要有第一筆資金
龔成老師：
太好了！見你有一定的回報！
你之後都要保持知識與財富的增長！
1）對，你的理解正確，其實投資原理並不複雜，但一般散戶就是只懂得炒炒賣賣，沒有一個「組合」、「配置」的概念。
我過往做銀行及證券行，就是見大部分客短炒多，就是佢地輸錢最多。而懂得長線投資的，就是贏錢的一群。
至於你講心態，首先，你要明白我地買入是「企業」，並不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
你要分析你的投資目標，你想潛力股的比例多少？平穩股的比例多少？組合風險程度如果？
即是你想設計一個怎樣的投資組合？長期、優質、平衡、適合你。
如果你心態上，經常集中在這刻的股價，短期股價，就會忽視左真正的財富。
因此，在分析上，如果你想賺大錢，就要著重「長遠企業價值」，而不是當刻的「股價」「賺蝕」。
2）我當中持有比亞迪（1211）已經佔組合一半以上，這是一種「集中持股」的投資模式，我一般不太建議，因為當一間企業發展時，總會有不確定性，我地都唔會100%認為佢一定好成功，因此，對大部分散戶來說，「分散投資」會比較適合，例如單一股票不要過15%。
但如果本身有一定的投資實力，分析到該股好優質，有增長力，同時明白當中的風險，就可以考慮運用「集中持股」的投資模式。
因此，我會建議你用翻正常的分散風險模式投資會較好。
至於是否辭工，最重要都是從大方向都想，5年後、10年後，你怎樣，如果有明確目標，應該做的事，就要去做。
------------------------------------------------
Q20602：
老師，我係你學生，見到你最近有post港燈分析 話現價係合理區頂部 請問你用既預測EPS同PE係幾多左右？
同埋想問下 用DCF計出黎既合理股價係單一數字 唔係一個range 你會上下比幾多%做緩衝呢？
龔成老師：
其實我計港燈，同時用了幾種估值方法，由於佢的盈利暫時為$0.31，不過相信會慢慢增長（因為佢話會加大資本開資），所以，可以比好少的增長佢。
另外，這是一隻典型的收息股，投資者會同時利用佢過往的派息情況，作為估值的基礎，方法就是預測一個有代表性的股息，同時找佢這企業過往的股息率範圍，以此得出答案，如果你用這方法，會計出佢現價大約在合理區中上部至頂位。
至於DCF，可以上下加上15%或25%，去作為一個範圍，最重要是合理區域，能夠包到過往一定的股價範圍，令估值有代表性。
------------------------------------------------
Q20603：
龔老師你好，請問若果信義光能和微盟2選1的話，哪一個質素好d同值博高些？謝謝回答
龔成老師︰
2隻股票係好唔同架行業，好難直接比較。
信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。
現價略貴，如果想入，最好係回翻D先，才慢慢分注。這股股價上落都大，要注意金額。
微盟集團（2013）集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。
這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。
信義光能穩陣度會好少少。
------------------------------------------------
Q20604：
龔Sir，你好，我今年23歲，依家係台灣讀書，係台灣冇打工，扣埋今年學費同生活費，可動用現金有hkd58000 & twd120000 & usd6000
讀書前係香港打工賺左d錢，大部分錢買左以下股票
00405越秀
$5.13有10000股
$5.20 有20000 股
回本 : $4.7436
00536貿易通 （發牌至2024年）
$1.15有20000股
$1.24有20000股
$1.23有20000股
回本 : $1.075
01503招商房託
$3.28有27000股
回本 : $3.1932
由於對中國發展信心不大，所以想係回本價既時候放左佢，選擇其他股票/甚至買台灣股票，所以想問龔 Sir 會有什麼睇法 & 建議？
1. 以上股票可以繼續持有，定放左去？ 如果要放，又以咩價位放？
2. 投資組合應該包括咩股票，同要用咩方法/價位入貨？
3. 選擇優質股既方法？
4. 打算買台股，會有建議的股票嗎？ 或者揀股方法？
5. 會有機會買到電子版既書嗎?
感謝龔 Sir！
龔成老師︰
1） 你持有的3隻股票都有質素，但主要係收息，增長力不高。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
因此年輕的你，應先做好增值，去累積一筆財富，而非著重收息。所以，這3隻股不太適合你。
2） + 3） 定"股價平貴"和"選優質股"，其實係一個較深的課題。我在股票班，都要花上好幾小時去說明。簡單而言，就是透過分析企業質素、行業發展、財務狀況等，去得出佢地是否有投資價值和合理價值範圍。
作為初學者，我建議你先用月供去做。因為月供，可以平衡倒你買貴貨架風險。
策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。
選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。
增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。
餘下的另一半現金，我地就等機會，當大市出現較大回調，就加大力度掃貨，然後作長線投資。
4） 其實選擇優質股架方法，在台股都適用。但我自已對台股，無深入研究，無法給你具體意見。
你可以從佢地質素、增長潛力、行業發展、財務狀況等因素，去試分析這些台股，是否有投資價值。
5）部分有出電子書，例如《5年買樓4部曲》
https://www.enrichculture.com/products/9789888599448
《股票勝經》
https://www.enrichculture.com/products/9789888395767
------------------------------------------------
Q20605：
你好老師！近排我見你有建議投資小注3067，佢每手得100，咁小注即是幾多？
唔好意思！我股票真是零知識架
龔成老師︰
安碩恒生科技（3067）每手100股，跟所謂小注係無關。好多時，我講"只宜入小注"，係指只可動用投資在這股票的總資金，其中一小部份。
例如，你打算這隻股票最終會入4-5手，那"小注"你可以理解為1手。
安碩恒生科技（3067）是追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。
不過，現價都唔平，大約在合理區頂至略貴，因此，這刻只能"小注"。最好的策略，就是月供，或自行分注小注慢慢收貨（例如每月買一次、或2個月買可次），以減少價格波動之風險。
------------------------------------------------
Q20606：
龔sir你好，好耐無打攪你啦…
我想問下880同2282。
因為兩隻我都係太約15蚊入嘅，如果個價返到家鄉後，我其實應該繼續持有，定走咗佢呢？
我自己本身都睇好濠賭股，我覺得賭業係澳門嘅經濟核心(希望我無分析錯)，所以長遠睇應該仲有增長空間，只不過係因為呢幾年疫情受到影響。
等你回覆，謝謝
龔成老師：
兩隻都是有質素的，都有長線投資價值，不過，並不是賭業股中最高質。
澳門最差時期已過，之後會慢慢好轉，你持有可以，唔好太著重過往買入價，賺蝕數，最重要睇長期的組合增長。你可持有。
不過，你都唔能夠太過集中在同一行業的股票。
------------------------------------------------
Q20607：
老師你好，我今年33歲，股票投資新手，無意中發現到你fb,就不停喺度學嘢，多謝你一路嘅分享。
我最近買左1211 （1手@239），175（6手@20.7），比亞迪買咗就係咁跌，老師哩兩隻股票我應該放還是揸長線？謝謝！
龔成老師：
比亞迪（1211）是潛力，業務無問題，不過你在貴的價位買入。這股可守的，但你唔好再心急加注，佢與合理價有一段距離。
至於吉利（0175），這股可長線的，有質素。
另外，你唔應該集中在同一行業，要建立一個平衡的組合。
------------------------------------------------
Q20608：
你好，龔老師
我是投資新手
資金只有一萬蚊
請問我可以投資哪個股票？
謝謝
龔成老師：
坦白講，建議你多少少現金先進行，因為我地唔能夠無晒現金在手的。
你可以到有$3萬，買一手盈富（2800），如果能承受風險，就加一手3067。同時留少少現金。
由於你資金不多，投資上述ETF會更為適合。
------------------------------------------------
Q20609：
龔sir你好～我啱啱28歲，月入18000，啱啱上年年尾開始接觸股票，亦好慶幸自己啱啱學就遇到你。。我本金唔多，揸住40萬現金，到宜家都淨係敢動用10萬左右買股票。
因為上年年尾覺得新經濟股有啲貴，所以選擇咗
2手金沙@28
2手盈富@24.6
2手中生製藥@7.45
2手雅生活@30.5
睇你個page之前試過短抄兩次金蝶，一次揸一個禮拜，一次揸一個月，雖然都幾千蚊賺，但宜家睇返如果當時冇放會賺得仲多。
所以之後買嘅股票都一直揸住唔放，雖然係會俾人笑賺得少賺得慢，但暫時我都冇後悔跟你學呢種方式投資。
我知我宜家個組合唔夠平衡，雖然新經濟股最近有啲回調，但都仲係偏貴，想問龔sir我係唔係應該繼續留現金等再跌多啲先入呢？我留4分3現金係唔係太保守？
龔成老師：
短炒好難賺錢的，長線一定好好多。我地只是睇下全球最賺錢的投資者巴菲特，佢的方法就得。
以你的年齡，可以進取少少，不用持有太多現金，如果你擔心風險，就投資較多在平穩增長股就得。
現時你的持股，都是有質素的，可持有，無問題。
我建議你動用多$10萬去投資，你可以在3個月內動用，平穩增長股仍合理，不用擔心。但你最好都買翻少少新經濟股，如不懂選股就3067，只要慢慢分注入就得。
------------------------------------------------
Q20610：
Hi 老師, 一直以黎只有儲蓄同小量基金作投資. 最近創業未有穩定收入 ,一直只靠積蓄維持
但覺得錢放銀行只會貶值所以諗住試下投資, 希望可以有少少穩定嘅回報幫補下。
年紀35-40, 流動資金大概$10萬, 應該點開始好?
龔成老師：
如果你現時剛創業，同時未有收入，宜留多D現金，唔好動用，投資股票始終有不確定性，以及要長線投資先得因此，建議你留金。
到你業務穩定，無乜資金壓力，就可以動用部分現金，投資平穩增長股，你的年齡可以投資這類，例如盈富（2800）、港鐵（0066）、領展（0823），同時可以加少少潛力股，如不懂選股就3067，最簡單。
------------------------------------------------
Q20611：
龔sir 如果睇你的書後有初步選股能力, 又不買2800既話, 我想自己的股票組合會有賭業股(0027銀娛),再加多1-2隻平穩增值股, 但我有點疑惑
0066港鐵/0014希慎/1929周大福/1972太古地產 呢幾隻我都想入手, 其實資金不多既話應該選哪2個先會好一點?
因為港鐵有有少少會因為地產業影響, 房託又係, 以上幾隻都係優質股, 其實都全想擁有..請問如何解決呢種既疑慮呢? 謝謝
龔成老師：
盈富（2800）是給無選股能力的人買，如果本身有選股能力，就可自行選股。
你可以加入港鐵（0066），以及希慎（0014）都得。當然，你應該建立一個更平衡的組合，上述都是較傳統的經濟，你可以考慮加入新經濟類，如阿里（9988）。
------------------------------------------------
Q20612：
龔成老師，你好。
本人30歲，想請教一下如何調整現有投資組合，邊d可以長揸，邊d應該沽出/減持？
股票組合如下：
中國鐵塔（788）4000股 @ 1.54
高陽科技 （818）33000股 @2.71
石藥集團 （1093）3200股 @10.66
洛陽玻璃股份 （1108）2000股@10.16
小米集團 （1810）200股@23.5
恒生科技 ETF （3032) 1000股@7.53
華夏恒生科技 （3088）1000股@9.17
另外如果想加入比亞迪電子（0285）、海爾智家（6690）作長線投資，現價可入嗎？
謝謝老師指點。
萬分感激
龔成老師：
你30歲，可持有「平穩增長股」+「潛力股」，上述股基本上都可以的。
高陽科技（0818）上落大，不宜持有太多。中國鐵塔（0788）雖然有質素，但增長力比過往略減，你可持有，但不要加注。至於其他股，無問題，長線就得。
海爾智家（6690）現價合理區頂，都可分注小注。
比亞迪電子（0285）就略貴，回翻D先小注。
現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q20613：
老師，我買左1789 一手@13.12 一手@12.22 依家跌到落11.幾。請問老師點睇呢隻股前景....
我應該再補一手，定淨係繼續等佢升返？
龔成老師：
最重要不是睇「賺蝕」，不是睇「買入價」，而是睇質素。
你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。
愛康醫療（1789），以長遠業務分析，正面的。
佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。
睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。
這股業務不差，有增長潛力，盈利增長，這反映企業有實際的價值提升。
不過，投資時要考慮價格風險。現價合理區頂至略貴。
所以，要睇這股佔你組合，如不多，你加一手可以。
------------------------------------------------
Q20614：
龔sir，我剛畢業儲了現金一萬五左右，請問我可以把這些錢放到那裡投資（除了月供）讓財務更自由？
謝謝你
龔成老師：
你首先要有一定的備用現金，你要按自己的情況去決定留多少現金，餘下在中短都唔會動用的資金，就可以投資，因為投資一定是長期的。
最簡單你買入ETF，因為組合可以平衡風險，當中股票不差，以及有平穩增長力。
一般來說，盈富（2800）是最適合。
如果你可承受風險，希望回報高D，就可考慮恆生科指ETF（3067）。
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
------------------------------------------------
Q20615：
老師～ 想問下依家投資航空股合適嗎？例如293 國泰航空
龔成老師：
坦白講，國泰（0293）的質素只是一般。
其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。
另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。
就算佢重組，得到新資金，只是比佢「捱過這一關」，並不是賺錢能力方面有改善。
------------------------------------------------
Q20616：
你好龔成老師，我今年24歲，去年中開始接觸股票。之前玩吉利175及阿里巴巴9988牛證，賺過少少之後現在還在虧蝕(共接近2萬)......
因此想開始長線投資，現在持以下股票：
中銀香港2388 1000股 $23.8
永泰生物6978 2000股 $14.0
京東健康 6618 100股 $142
我另有一個需要供5年儲蓄人壽保險，每年6萬，今年供第三年，所以手頭現金不多，只有幾萬元。
看過你的文章後，想開始月供股票，可能先每月$2,000，請問你覺得月供小米、港交所、比亞迪還是銀行股比較好？謝謝！
龔成老師：
衍生工具始終唔易玩，唔建議。
中銀（2388）、京東健康（6618）無問題，可長線。。
永泰生物（6978）為國內細胞免疫治療生物醫藥公司。佢主要從事Ｔ細胞免疫治療的研發及商業化，當中包括實體瘤治療及血液癌症治療。
此股唔敢話佢無潛力，但由於佢上市唔算耐，要些時間才能見到真章。佢未有盈利，但市值都唔細，很大程度上高估值係來自對佢"未來"估算。
若然藥物研發成功，可以好賺錢。但失敗，回報則變零。此股算有危有機，你可以投資，但只可小注。
至於月供股票，現時已可開始。你24歲，可考慮有增長力的，而銀行股就未必好高增長。你可考慮小米（1810）、港交所（0388）。
------------------------------------------------
Q20617：
想請教一下，如果買入優質股後，股價上升，如果隨著成長，未必會再返返合理甚至平既價位，咁點判斷咩時候可以再買入？
龔成老師：
我地會久不久，重估企業的價值，如果佢業務有成長，有幾會調高佢的價值，就有可能由貴變為合理。
有時，優質股不斷成長時，股價都會不斷向上，我地的確較難追貨，這刻，建議用月供或小注分注的策略投資，始終股價不斷上有可能貴，這刻大手追入又有可能面對下跌風險，因此，以月供模式投資「不斷成長的優質股」，是較適合。
------------------------------------------------
Q20618：
龔成老師，因緣際會看到你的文章，才開始想嘗試月供股票（本人之前無任何投資經驗）。
27歲，月入2萬2，心感起步太遲，打算現在起每月10000月供股票
請問建議 5000 阿里，5000 盈富
還是 5000 阿里，5000 領展？
因月供是用來平衡風險，那之前儲的一部分錢入手盈富不是更化算嗎？至於月供就選擇中短期有波幅，但值得長期持有的。請賜教
龔成老師：
你可以月供盈富（2800）$5000，阿里（9988）$2000，恆生科指ETF（3067）$3000，會比較適合你，始終盈富是一個組合，有平衡風險的效果。同時你年輕，仍可以進取少少。
只要長期進行就得。
月供的好處，就是平均買入價，減少一次過在高位買入的風險。你可以同供同時留現金，當見到大市跌，就動用現金一手手買入。
------------------------------------------------
Q20619：
龔成老師你好，舊年年中入左2手1789（ 22.7入）， 今日收市睇已經跌好多，曾經爬過2月5日的Po文，當中有看到您分析1789，你當時話有點貴
目前我應該繼續持有還是斬倉呢？可以給點建議嗎？
新手股民感謝
龔成老師：
愛康醫療（1789）本身不是無質素的，只是之前炒作太多。
這股經常處於少少貴的水平，這是最大風險，就算現時，都成30倍市盈率。
睇翻最近情況，自2018年「4＋7帶量採購」開始後，令醫療材料開始降價，降幅基本在50%左右，甚至更高，預計未來3年帶量採購在醫用耗材領域會持續，會常態化，影響佢的賺錢能力。
以長遠業務分析，正面的。
佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。
睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。
這股業務不差，有增長潛力，盈利增長，這反映企業有實際的價值提升。
不過，投資時要考慮價格風險，這股唔建議持有太多，如果2手佔你組合比例較多，宜有較大反彈時減1手，餘下再守。如果2手佔你組合比例好少，就全部守。
------------------------------------------------
Q20620：
龔sir 求助指教 想問下呢 之前買咗隻660瑋俊一手 100000股 之後話咩十合一 但變一手20000股 但正常十合一吾係一手10000股？ 但顯示我得10000股 現在賣吾到
龔成老師：
瑋俊生物科技（0660），經常出現虧損，加上企業無太大獨特性，投資價值低。
佢10合1後改每手數，明顯是唔想散戶賣出。
這股本質不佳，建議你賣出，現時你是碎股，你以碎股的模式賣就得。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
