《我塊面青過稅局封信.....》
一返到屋企，就見到個封，同 Kero Kero Keroppi 一樣咁青BI BI 嘅報稅信。我真係嚇到塊面青過稅局封信，啱啱先寫完689張支票，又要報稅。今年封 Kero Kero Keroppi 仲要印有基本法頒布25周年LOGO，真係礙眼到不得了。
「做過的不可再做」？
街又訓過，不合作又不合作過，依然半點也改變不了，到底係唔係要再不合作？
我最憎填表架......
我有填表恐懼症架，唔可以見到未填嘅格仔架，開 excel 都打冷震架，唔搵工都係驚見工要填表渣。我冇錢架，可唔可以唔報稅？
《天天寫，張張寫滿689的我怨你》
今個聖誕，我準備左份大禮比香港政府，我用左兩個星期，分拆支票交稅，參加不合作運動，增加政府嘅行政成本。
我總共寫左 689 張6.89 嘅支票，由於我係一個窮得只有時間嘅窮撚，所以我無訂造印仔，手寫左689張。朋友仔問點解唔雕印仔，但就算雕，頹極都要去街市買兩個薯仔，咁又係要錢，所以決定手寫。
※※※※※※※※※※※※※※※※※※
由於我嘅恆心低過689嘅智商，中途真係好想放棄，689張支票比我想像中大鑊好多。689 個英文名真係同佢個人一樣咁煩，Six dollars and eighty nine cents only 玩死左我。我簽銀行簿係用中文全名，呀爸又同我改個咁多筆劃嘅名，真係簽到柏金遜。我亦由當初嘅楷書，寫寫下變左草書。
※※※※※※※※※※※※※※※※※※
到底有無用：
呀媽鬧我：「白痴仔，哂時間」。確實係好哂時間，但我反問自己，D 時間唔用喺寫支票度，會唔會用喺其他地方，可以表達爭取民主，689落台呢D 訴求？我諗唔到其他，所以我參加分拆支票行動。
呀媽又鬧我：「本身間房都同將軍澳堆填區咁，飽和架啦，仲訂咁多支票簿...」。聽到佢咁講，更覺得咁做有用。呢幾百張支票去到稅局，增加唔到職員工作，都佔領左佢個工作空間。我真心希望經手職員如實反映比上層知，不合作運動帶比佢地行政不便，令政府有一絲內部施政壓力。
「玩死D 銀行職員同稅局職員啦你」。香港是我家，瀨野齊參加，除左sorry同唔好意思我唔知可以講咩。怨有頭，債有主，唔好怪我參加不合作運動，要怪就怪搞到市民咁不合作嘅政府啦。
今次我嘅行動，最少令一個人思考政府施政問題，就係我呀媽。呢兩個星期，我一路寫，我一路好似唐三藏念「色即是空」一樣，瘋狂感化同啟蒙呀媽，呢個可算係最大嘅收獲。
※※※※※※※※※※※※※※※※※※
我真係好想多謝小學3A班嘅 miss lee，唔係你一星期罰我 n 次罰抄，我真係冇意志力完成呢個行動。我見到呢疊紙，真係熟口熟面，呢疊野真係好似拜山燒衣個疊溪錢，如果可以的話，我真係唔想交去灣仔，可以直接燒比689 你話幾好呢。
PS. 有關申請N本支票：我係幫襯開痕身銀行，e-banking 只可以click 一野申請一本，card center 職員話唔可以電話申請多本，你可以喪click e-banking 個掣，一本有30張，想參加分拆支票交稅嘅朋友仔，自己安排下申請支票簿啦。
簽到簿excel 在 01.基礎簽到表製作 - YouTube 的推薦與評價
【Word教學】如何從 excel 將報名姓名貼到word 簽到 表中. 蔡明和•2.4K views · 1:20 · Go to channel · 【基本操作】E009010秒完成細長表格 簽到 表. 程錦•334 ... ... <看更多>