【龔成問答信箱】（Q16921-Q16940）
Q16921：
老師,其實我自覺睇中長線嘅股票都幾準，但係衰在自己心急,
經常忍唔到手短炒..導致輸晒錢
往往一段時間之後睇返自己之前睇中嘅中線股都升唔少,但係自己經常短炒輸晒本所以無貨..
我已經嘗試唔睇股市,但係忍唔到手..
經常都係咁嘅時候真係好沮喪..睇住自己離目標愈來愈遠..
請問可唔可以教下我點做..我真係唔想成世人都係咁..
自己嘅心態都慢慢因為想追數而變咗賭博心態..知道自己
問題但改唔到真係好辛苦..
唔該老師
龔成老師：
如果你有一些手機程式，好方便你睇股價，就刪左佢。
現時的人太方便，你好易因為一時衝動而做錯決定。騰訊（0700）多年來升左過百倍，但好多好多人，都因為「賺少少」而賣出，就是心急所致，明明有得賺過千萬，都自己放棄，這是香港人的特性，我過往做銀行見好多。
另外，建議你「寫報告」，我都是這樣教股票班的學生，因為我會有一份「6頁紙的企業評估表」派比佢地，佢地每次買賣股票都要寫。
由於要寫得好仔細，因此，佢地每次買賣的決定，都好小心，想清楚先會進行。這是大大提高回報的方法。因此，你可以每次買入、賣出時，都要自己寫報告，列明原因先進行，這是一個好方法。
------------------------------------------------
Q16922：
成哥，你成日解答我地問題，又分享經驗，你唔覺得好煩咩？
龔成老師：
盡力而為啦，網友信得過我先會問。
世界好神奇的，你今日種左一粒種子，日後就會有一顆樹。
------------------------------------------------
Q16923：
龔老師，你好，想請教家人有10萬儲蓄，購買什麼股票好?
謝謝賜教!
龔成老師：
要睇佢地的年齡及風險承受能力，如果年齡較大，可以投資較多收息股，目標並不是財富增值，而是現金流方面。
投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。
可以建立一個收息股的組合，目標是6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
------------------------------------------------
Q16924：
老師，如果1359和267想作長線投資邊一隻較好？
多謝龔sir解答！
龔成老師：
中國信達業務包括不良資產經營，投資及管理、金融等，這類業務都較為賺錢，比其他的金融機構賺得更多。
不過，當涉及這些不良資產的業務時，就一定會有較大的潛在風險，當經濟及金融市場出現逆轉時，對佢的打擊唔少，到時股價亦會較為受壓。所以這類股的優質度唔算太高。
由於佢有規模，因此又未至於好大問題，中短期的波動一定有，所以，如果你投資金額不大，小注投資，都可以的。
至於中信股份（0267），質素一般般，好多年前見佢投資虧損巨大，都知佢的企業管治、風險對沖方面做得唔好，睇翻近年的情況，表面上的數字不差，但實際的賺錢能力不強，企業價值多年都無法提升。
坦白講，上述兩間公司，質素都不是太強，中國信達風險較高，但如果經濟好轉，佢回勇力度較大。而中信股份就一般般。
------------------------------------------------
Q16925：
想問下現時手持
舜宇光學科技(2382)
長和(00001)
中國移動(00941)
太古股份A(00019)
香港情況雖然略有影響，但估計接着幾年仍有上升空間。
這樣分析正確嘛？還是需要調整現時持有的股票？
龔成老師：
上述都是有質素的股票，可以長線持有。不過，太古A（0019）的質素不算好高，反而太古地產（1972）會更好。
香港的情況，長遠發展仍有變數，但暫時分析，未算對企業價值造成好巨大的影響，最多只是略為扣分。
只要你這刻同時持有現金，其實你的組合唔需要特別調整。
------------------------------------------------
Q16926：
Hello 想問少少唔關股票但有關財富管理既事。想問你自己係咪有買晒醫療保險，人壽保險，危疾保險同意外保險？除咗月供股票，係咪都應該額外用幾千蚊買保險？
謝謝
龔成老師：
其實保險是好個人化的項目，你按自己需要去買就得，保險的原理，就是將你某些不想承受的風險，轉嫁比保險公司。
在理財中，我地應該攻守兼備，保險是防守性產品，有購買的需要，我自己都有買，但買那些，就要視乎O你那些風險可承受，那些想轉嫁。
另外，保險不用買得太多，足夠就得。
------------------------------------------------
Q16927：
Hello，我有些問題想問下老師，我打算21年尾/22年頭有足夠資金移民，我好唔好把剩低嘅現金買股好？定繼續儲現金？
如買股票，老師有什麼股票推介？
現年25歲
龔成老師：
如果你將會在1、2年內要資金，就最好持有現金。
投資股票，就是買企業，企業增長要長時間，而中短期的股價，一般只會受當刻的市況影響，無人知你需要資金的那一刻，股市情況如何。
因此，你應該持有較多現金，在這時候盡力儲，
如果要買股票，小小好了，盈富（2800）是最好的選擇。
------------------------------------------------
Q16928：
龔 Sir, 近期政治因素影響到香港經濟及前景不明朗，引致有不少人申請離岸戶口。本人沒有想關概念，想請教以下問題：
1. 一般在什麼情況才有需要申請離岸戶口？
2. 離岸戶口有什麼作用？
3. 申請離岸戶口要考慮什麼因素？
希望賜教
龔成老師：
簡單來講，離岸戶口就係指，存款人在居住國家或地區以外的地方，開設海外銀行戶口。
離岸戶口的資金轉左後，就不再受本地去監管，而是根據離岸戶口所在地的司法系統監管。
其實，唔少人去外國如留學、工作假期、海外投資，都需要使用海外戶口方便在境外使用。
其實開設離岸戶口，透過銀行或證券行，不過證券行風險就可以會略高，選擇銀行較好，例如匯豐卓越理財或運籌理財、花旗Citigold、Citi Priority等。
------------------------------------------------
Q16929：
龔sir, 過去幾年也有月供滙豐,10多年前曾於13x買入, 請問現在應如何處理?
龔成老師：
匯豐（0005），你要接受，佢賺錢能力與增長力已不及過往年代，股價亦難以返回高位。
這股只能視佢為收息股，唔好對股價有特別期望，你要計翻，自己的匯豐，佔組合比側多少，如果太多，可能要慢慢減翻。
同時，要睇翻你自己，如果之後只是收息，股價無特別增長，是否可以。
------------------------------------------------
Q16930：
知道，多謝老師既意見，我好希望可以好似你甘，係5年內有100萬，然後達到財務自由，不過真係好難。
我好努力的，老師，我再想請教您，如果我用我果D錢去供月供股票，好唔好?
定係一次過入一隻股，我乜都唔識，都係想一切過買盈富基金。老師，請您給我一點意見，謝謝。
龔成老師：
要財務自由，說難不難，說易不易，但就一定要比其他人努力，否則好難做得到。
如果你肯比其他人更努力5年-10年，之後的人生就會行得好順，會比其他人有更大的享受，這個你可以自己決定。
至於投資，一定要做，單持有現金只會不斷貶值，你要學。這刻先做月供股票，盈富（2800），每月幾千作為一個開始，只要你同時持有現金就得。到你資金較多及有經驗時，才一手手買。
另外，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q16931：
阿sir,你好！剛剛上完你課程，多謝你分享了這麼多有用的知識，令我大開眼界。
最近我買了樓，總負債比率係60%，由於現時沒有太多現金，打算月供股票投資（每月一萬）。我已經40歲，你可以對我嘅組合提供意見嗎？
水桶1（40%）：銀娛0027， 中生製藥1177，比亞迪1211，福壽園1448
水桶2（40%）：盈富基金2800， 領展0823， 港交所0388， 港鐵0066
水桶3（20%）：香港電訊6823，中電控股0002
另外我有份BCT強積金有80%係投資盈富基金，所以以上組合有需要再包含這個嗎？
另外，進階班課程好吸引，但我10月份星期五晚上完全不能出席，希望到時有幸可以上第三期的課程,謝謝你！
龔成老師：
你買了樓，之後的的財富配置，應該集中股票方面，當然，如果你這刻買樓後現金不多，其實應該先增加現金，因為你現時負債增大左，有一定的流動資金，就會較好。
你先計好這方面的數，之後就可以進行分配。
至於水桶123，配置無問題，可以進行，但就要留意個股的平貴，可以先投資一些投資值博率較高的股。
至於強積金，你可以獨立去睇，因為這是長年期，在中短期內無法取出的，所以可裡為另一部分。當你年齡漸漸增加時，就可以慢慢調整風險度。
至於進階班，下年的年中，應該會搞第三期，有可能是星期六班，你可以留意。
------------------------------------------------
Q16932：
你好老師. 本人30歲. 都算有一般的投資經驗 但總是在股海浮浮沉沉 想救指教一下. 現時手上有現金4m. 想分段入市
但見很多股都升回疫情前價位 心目中有幾股 700 2382 1093 和想以小博大的775 請問老師覺得應如何部署。
龔成老師︰
你所選的股票都有質素，也適合你年紀。由於現時大市只是合理區中下，你現有400萬資金可以先投入一半，用「分注」形式買貨，慢慢入。餘下一半資金，就等大市出現一定程度的下跌，才大力度掃貨，然後長線投資。
但留意翻長江生命科技（0775）從事產品之研發、製造、商品化、推廣、銷售及投資，涉及的項目和資產涵蓋保健、醫藥及農業相關業務三大範疇。
農業相關業務和人類健康分別佔總收入約4成和6成，農業相關和保健產品業務這2個範疇，相信未來會平穏發展。而集團主要潛力，來自醫藥研發部份。
這部份成功會有好高回報，失敗就變得好差。這部份會係潛力所在，同時也是風險所在。投資只要控制注碼，都可以。
另外，我建議你加入盈富（2800），並以佢作為組合主力。佢係包括50間質素不錯上市公司股票的組合，有助你平衡組合中的風險。
------------------------------------------------
Q16933：
先多謝老師你 隻1177 5蚊買 令我鑊利不少 因為本人不想追熱炒股 本人想問問2186質素有下降跡象嗎？ 見股價不斷下試 是否可以小注？
另外本人想再問問0669 算貴還是合理 感覺跌唔落 好似去唔到平 謝謝
龔成老師︰
中生製藥（1177）有質素，長線持有無問題。
至於，綠葉製藥（2186），雖然業務不算差，但近年的增長力有所下跌，市場對佢的發展有點失望。
佢主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。
但近年佢質素的確有少少轉弱，但不是全無質素，不過，這股本身的風險較高，唔建議投資得太多。現價只是合理區底部位置，如果你小注可以的，但要長線持有。
創科（0669）有一定的優質度、有增長力，但又未到潛力股，只能視為平穩增長類，因為佢最高速發展的時期相信已過，現時已有相當的規模，相信往後只能平穩增長。
這股會較受美國樓市、中美貿易及疫情影響，雖然中短期有不確定因素，因以長線角度分析，企業仍是好有質素的。
現價計己經略貴，你用月供或分注形式去儲貨，會比較好。
------------------------------------------------
Q16934：
龔老師,您好! 想向您請教下關於資金管理同投資的問題, 今年32歲, 月入24k, 之前有事用光所有儲蓄, 現時冇物業冇積蓄冇投資冇保險都冇股票, 而家想立心從零出發.
現時每月可草1萬, 目標在3年內草到60萬, 想向你請教一下該如何利用自己的資金:
1） 除月供股票之外, 還可選擇其他方式投資嗎?
2） 該買儲蓄保險嗎?
3） 如入手股票的話, 應考慮派息股或穏定股票如港交所嗎?
4） 由於沒有太多備用資金, 該入手哪些股票較好呢?
5） 可俾少少意見可如何利用或分配每月1萬作投資嗎?
萬分感謝!
龔成老師︰
1） 如果你對投資知識不高，或無定平貴能力，月供模式去進行投資，可以平衡價格波動風險，會對你最有利。
2） 保險只係理財中防守部份，買足夠保障就可以，增值可以留比優質資產（如優質股、物業等）去做。
3） 係分配投資項目時，會因應番你的人生階段。年青人，可以"平穏增長股"+"潛力股"，但已近退休之年，就應集中在"收息股"去創造平穏現金流。
以你年紀，應以增值為主，故"平穏增長股"+"潛力股"會較合適。
4 & 5） 你可以用每月儲到的$10000，一半先去做月供，其餘先儲起，用一邊月供一邊儲蓄的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、粵海（0270）、領展（0823）、希慎（0014）、太古地產（1972）或潛力股︰比亞迪（1211），中生（1177）或福壽園（1448）。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
以恆指過去年平均回報10%計（連股息再投資），你每月投資$10000，3年後大約會增值至40萬。要做到60萬目標，就要加大供款或時間。
但由於3年唔係一個長的時間，就算優質股也有機會出現波動，影響到你最終回報，你要明白有這個風險。如果可以係5年或以上，回報波動會較少。
若用同樣回報率假設計算，5年會有約73萬。
------------------------------------------------
Q16935：
您好龔老師，想請教一下，我現時的投資組合有什麼可以調整的地方，我今年的目標係投放最多50萬的成本在股票，在適當的時候放一啲，再等低位買入，將買入價拉低，唔知哩啲想法是否不太成熟：
以下總成本約43萬：
2800 6000股@24.15
1038 2000股@44.75
2378 500股@75
1211 1000股@37.05
1299 600股@67.717
2388 1000股@22.1
1928 800股@29.85
945 200股@97.35
龔成老師︰
你這個想法錯誤，我地投資唔好去「估走勢」。同埋唔好比「買入價」限制。
無人知將你沽左貨之後，會唔會一如你預期咁再跌，佢可能會反而大升，到時你就會進退失據。
我之前做了銀行與證券行多年，見到好多散戶用這方法投資，最後得到「贏粒糖，輸間廠」的情況。
我地應該去了解企業質素和前景，當佢係優質，就再用其平貴，去定入市策略。
你組合中的股票都有質素，係值得長線持有。現時大市只在合理區中下，由於你已投入大部份資金在股票中，餘下的7萬預算，你可以等大市有明顯回調才再入資，會較穏當。
暫時分析，你持有的都是有質素的。
------------------------------------------------
Q16936：
老師，我可唔可以請教你點睇1088神華？
未有貨可持有？
龔成老師：
中國神華（1088）質素中等，過往較有質素，近年有減弱情況。
佢始終有一定規模，但政策不是好支持行業，的確會對佢有影響，但已經在股價反映左。
所以整體來講，這股不差，但又不算非常好，唔好對股價有太大的期望。如果是收息的，都可以，但就唔建議太大注。
------------------------------------------------
Q16937：
請問你有計劃會在澳門開課嗎？
其實我都仲有一個問題想了解下，每月出糧後，扣除基本開支後，一有閒錢就會想將佢買晒股票，呢個心態正確嗎？有段時間擔心自己會唔會變左似病態咁，請問該如何調適
龔成老師：
原本打算在9月開，但現時疫情有變數，所以唔敢講幾時。
你應該每月出糧後，部分買股票，部分留現金。
你方向不是錯，但就比較進取，現金根本不是財富，因此應轉成有質素的資產，但你心態可能好想錢搵錢，心急不是好事，如果大市出現大跌市，你就會無資金入市。要創造真正的高回報，就要懂得這點。
------------------------------------------------
Q16938：
老師 我其實想問下如果有錢俾首期買樓 究竟買樓好定投資股票好
我自己已經有樓自住 我知道買股票既回報率俾買樓收租高
但就係攪唔明一樣野就係 如果我買樓就算個市點跌 好差都好 我都有層樓揸手 點都有實物係手
但係如果買股票 感覺上好似冇野揸係手 好危險甘 又或者個市好差 例如我買港鐵 如果真係跌到停左牌 甘我咪乜都冇晒? 感覺上好漂浮甘
我意思係 如果買樓我點都有實物係手
如果買股票冇野係手感覺上好似危危地甘
我一路有追開你POST 知道投資要長遠 我比較傾向平穩股 因為要工作冇時間日日睇 但我就驚就係唔知以後個市會點 好多野都可以發生 就算我投資平穩股公用股我都驚佢跌停牌 乜都冇
所以想問啊SIR你點解甘有信心相信股票市場 以及長遠投資就算你投資公用股 係就唔怕公用股都可以輸到乜冇晒?
龔成老師：
如果你這刻已有物業，在財富的平衡上，其實應該投資股票。
你對股票無信心，是由於你認為股票是一個「數字」「一張紙」，但股票背後是一間企業，你可以透過分析企業，去研究當中的價值。
簡單來說，如果你買層，你會認為好安心，如果這層樓上方市，在港交所交易，你會不安，你這明顯是心理的問題，因為你不明白上市後，佢背後所代表甚麼，你無研究過，當然好虛。
如果你研究過港鐵（0066），就會發現佢擁有好多物業，資產是我地其中一個分析點，你可以計到這些物業值多少錢的。因此，股票並不是虛，只是股民不明白，從來從來無計算過企業價值，所以覺得虛！
------------------------------------------------
Q16939：
成哥 想問黎緊 經濟倒退 大熊市 個投資策略係點
諗住買樓 同 買股票
股票到想知買咩好 買返原有既月供股票823/2388個d
定買類似科網股/5g 博佢反彈勁
有咩跌得深同值得入
龔成老師：
全球經濟會轉弱，但在大量印銀紙的情況下，股市、樓市不一定下跌，只能話，投資市場一定會好波動，所以，要集中投資有質素的資產，把握一些下跌時機買入，然後長線投資。
香港樓1、2年內可能會向下，你可以留意下，而長遠會向上的。
可能股市間中會出現下跌情況，心理上的壓力會較大，但只要長線投資，這反而是機會。
領展（0823）、中銀香港（2388）都是可投資的。至於5G，例如鐵塔（0788）、小米（1810）都可考慮。
不過，如果你本身打算買樓，資金上就要準備，不能將太多資金投資於股票。
------------------------------------------------
Q16940：
成哥, 想請教你幾個專業的問題,
第一條問題係. 你對樓價長遠落去的睇法? 根據我的分析, 短期依一年會跌, 但長遠黎講會升. 原因一, 因為剛性問題, 供求少於需求, 香港人對樓的需求好大.
原因二, 錢的購買力會下降, 因為量化寬鬆, 錢印得愈多, 個價值就愈下降, 咁姐係物價會上升, 樓價係其中一樣.
原因三, 之前有內地人買樓唔睇價錢, 盲目咁幾錢都買, 所以會升. 但長遠對將來黎講, 個價會升, 原因一同原因二可以繼續, 但原因三應該會減少, 什至係無.
第二條問題係. 根據以上分析, 總結係咪依家買到樓就好買, 但其實毎一樣野有回報就有風險, 咁買樓的風險係咩野?
第三條問題係. 將來如果樓價跌, 其實有咩可能的原因? 仲有係有咩野係可以導致到樓價跌?
唔好意思，問題太長，謝謝你的回答
龔成老師：
1）你大致正確。
香港經濟轉弱，中短期樓市會向下，但長遠來說，香港樓仍會因供求問題而向上。因此，1、2年內可能是一個中線下跌期，但預佢唔會跌很多，之後會向上翻。
2）其實，現時都可以留意，我相信這1、2年是機會，不過，會跌多少，過是跌多D，無人知。
3）全球經濟弱，如果出現持續性，失業率向上，香港堂樓都會受壓，始終會有人供唔到樓。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
種子紙價錢 在 WOOPAPERS 蕪蕪紙創- 【價格調漲公告】... - Facebook ... 的推薦與評價
【價格調漲公告】 感謝WOOPAPERS的朋友粉絲們ㄧ直以來的支持！由於近年原物料成本上漲，為維持商品品質，WOOPAPERS將於03/01(日)起，色彩種子紙及手工 ... ... <看更多>