女朋友一發脾氣就會死（上）
「啱啱隻喪屍衝埋嚟，你點解拖住我跑？你拖住我，即係我喺後面，即係我會俾喪屍咬到先，即係你唔愛我啦！」女友晴晴高亢嘅聲音喺我耳邊響起。
我有氣無力地解釋：「我哋都走甩咗啦，你都冇俾喪屍咬到。」
晴晴繼續鬧我：「我唔係講今次，係講你愛唔愛我，講你個心啊！」
唉，都已經係末世，喪屍橫行，人類苟延殘喘，女朋友仲掛住發脾氣。
我忍唔住鬧咗佢兩句，晴晴一怒之下，居然衝出營地。
佢一手推開營地嘅大門，點知門外咁啱有隻喪屍，伸手捉住晴晴，一口咬落佢條頸度，鮮血四濺……
「Game Over！」
一行大字喺我眼前出現。
下一秒，嗰行大字變成「Game Start！」
坐喺我身邊嘅，依然係晴晴。
我仲未從佢俾喪屍咬到嘅驚恐中回復過來，晴晴已經搖我隻手：「我哋已經被困三日啦，點算？」
一段記憶出現喺我嘅腦海中，我同晴晴去旅行，點知發生地震。
我哋被困喺瓦礫下，足足三日，只靠背囊裡嘅少少水同食物維持生命。
饑渴瞬間佔據咗我全部嘅注意力，我個腦完全郁唔到，有氣無力咁答：「等囉。」
「等等等，一日都係等，你係咪男人嚟㗎？你條女就嚟渴死啦。」晴晴大發脾氣。
我問番佢轉頭：「咁可以點啫？」
晴晴一怒之下，將背囊狠狠擲向旁邊嘅瓦礫，唔知撞到邊個支點，頭上嘅瓦礫紛紛跌落嚟，好似雪崩一樣……
「Game Over！」
下一場，係末日前夕嘅設定。
地球即將面臨末日，各國政府合作，整咗好多架「方舟」，會飛去外星避難，延續人類文明。
但方舟數量再多，始終都唔夠容納全人類。
每個人都為方舟嘅船票而不擇手段，街上充斥住攞唔到船票而瘋狂嘅暴民，打架、搶劫、強姦……
「我哋兩個人，得一張船票咋，點算好？」晴晴催我：「你快啲出去搵船票啦！」
我正想答佢，你以為出去轉個圈就會有船票？依加出面咁亂，行出去分分鐘連命都冇埋。
但話到嘴邊，我忽然諗起一件事。
前兩次，都係晴晴一發脾氣，就會有人死，我哋就會Game Over，進入下一個末日。
我當然唔想喺各種末日中穿越，我想返去平靜美好，有外賣有WiFi嘅世界。
暫時嚟睇，要返去正常嘅世界，首先就要確保我同晴晴唔死。
要做到呢一點，首先就唔可以畀晴晴發脾氣。
於是，我按捺住駁嘴嘅意欲，好溫柔咁同晴晴講：「你講得啱，我依加就去搵船票。如果搵唔到，我會將生存嘅機會留畀你。」
晴晴好感動，感動到眼都紅埋。
我即刻衝埋去，緊緊攬住佢，唔畀佢有發脾氣嘅空間。
攬咗一陣，晴晴突然講：「喂，你攬咁耐，係唔係唔想出去搵船票？」
「點會呢？」我賠笑住打開門，臨走前不忘畀佢一個飛吻：「就算死，我都會保護你。」
晴晴眉頭一皺，有少少嬲：「唔准亂噏，你唔會死㗎。」
突然間，三個拎住斧頭嘅暴民從走廊衝過嚟。
其中一個暴民大喝：「嗰度有女人！」
佢哋衝向晴晴，順手一斧頭斬落我條頸度。
一陣劇痛……Game Over！
有冇搞錯？嗰吓晴晴分明唔係真心嬲我，只係扮吓嘢想我小心啲，咁都要Game Over？
我望一望呢一局嘅設定，係「生存遊戲」。
所有參賽者身處一個荒島度，荒島上有各種各樣嘅物資同武器，但食物只夠畀一半參賽者生存一個月。
一個月後，倖存嘅參賽者先可以離開，拎到一大筆獎金。
「你仲唔去搵嘢食？」晴晴望向我。
下集：https://bit.ly/38shK1r
將專頁設定為「搶先看」/ "See first"，最新故仔馬上睇！
從不卸妝：https://goo.gl/GyV86H
從女朋友割傷手指講起：http://bit.do/ePLoX
#短故 #短篇 #小說 #陳美濤 #廣東話 #粵語 #tomatochan #女朋友一發脾氣就會死
礫 方舟 在 【明日方舟】【悖論模擬】礫- 柚子狸攻略~Arknights - YouTube 的推薦與評價
【明日 方舟 】【悖論模擬】 礫 -我來了我走了沒人知道我曾經來過|| #柚子狸 攻略~Arknights. 9.6K views · 1 year ago ...more ... ... <看更多>