讀出荔枝角手足女朋友的信：
大家好，好多謝大家今日出席集會為裡面既手足集氣。我係其中一位手足既女朋友，今日12月20號，係佢黎到荔枝角第45日。好抱歉今日我無法出席，但都可能係件好事，因為咁我先可以喺情緒OK下完完整整地寫呢一段文字。
45日，對於外面既人可能只係眨下眼既時間，但對佢黎講，呢個半月係人生中最難捱既45日。
懲教呢度有好多規矩，每日幾點要起身、幾點沖涼、食飯、去活動室、返房瞓教等等都有哂時間表。而我地家屬可以俾佢既野，每一樣限住款式，限住數量，而每日探監只係得十五分鐘。
難捱，唔單單係失去自由；難捱，係在於每日過住重複又重複既生活，面對住外面每日萬變既社會既一種無力感。好多時候去探佢，都會提及外面發生既事，佢總係好無奈既樣子。佢好想親眼見證，而唔係靠睇活動室裡面既CCTVB。
裡面的消息傳播係好慢，除左每朝十五分鐘時間既探訪，佢同我地既溝通方式就只有書信。因為信件需要比懲教呀sir檢查，所以每封信寄入去平均會delay 5日。
朝早探完，一日仲有大半日時間，大半日可以發生好多事。就好似當日男朋友明明仲同我text緊，原來過多幾分鐘就被拘捕，自始每次見面都要隔住塊玻璃，加埋嗰部監獄風雲既同款電話。
早兩日發生左單交通意外，而我咁岩就係住上水粉嶺個頭，當然我無穿無爛，但當日既佢並冇其他方法知道我有冇事，一睇到新聞就好想喊，足足擔心左成日，直到尋日見到我先鬆一口氣。
十五分鐘，聽落好似唔算好短，但當你有好多好多事情想講，就會發現十五分鐘，真係講兩句就完左。太多太多事情On the list要講，有時講正經事就講唔到私事，就只有靠書信；而書信又delay好多日，變左佢想感受一下外面既世界，知道外面既事情，就好似IE或者林鄭咁，等到件事過哂氣先知咩事。呢種感覺，對於一個關心社會、身邊人既人，感覺真係好難受。
大會想我地講下佢還押期間既感受，除左對社會大小事既無力感；其實感情方面都係好大好大既無力感。可能大家未必好有興趣知，但係廿幾歲既人，除左親情，都係愛情大過天。特別出事之後，人往往更加會知道自己最珍惜既事係D咩、最重視既人係邊個。
由第一封佢寫俾我既信開始，已經講如果有一日我離佢而去，佢會好明白，唔會有任何怪責我既成份。佢話，當佢自己被囚禁既時候，唔希望無形地囚禁埋我。試想像，每一日都喺度為自己做好心理準備，想像自己所愛所重視既人將有一日唔再喺自己身邊；然後要好努力咁去說服自己，咁樣係對大家都好，嗰一種矛盾，嗰一種感受，其實係好痛苦自虐行為。
係裡面，唔單止係失去自由咁簡單，係你無辦法為自己既人生再爭取Ｄ咩；要眼白白望住事情發生，而冇能力去改變。嗰種唔甘心又無可奈何、只可以默默接受，係一種好痛苦既情緒。每日唔只重複住一樣既生活，更加活喺呢個情緒，而且係無限、無限咁loop.
佳節將近，就到聖誕同大除夕，呢種無力既情緒逐漸蔓延……撞岩我係十二月生日。
上月中佢上訴高院申請保釋失敗，聽審後響高院臨時探訪時，佢向我道歉，好抱歉陪唔到我過生日、聖誕、倒數；聽完之後，我喊到收唔到聲。
每次探訪個timer會計時，倒數十五分鐘，每次道別都係好倉猝咁電話突然無聲，扁哂嘴做口型地講byebye。
太多太多平日以為理所當然既事都變得好遙不可及，摸下對方塊面，拖下對方隻手，都係跟住幾年內冇可能做到既事。我眼中既最遠既距離，應該就係唔能夠好好見面、好好地傾下閒計。
太多太多次睇信睇到又笑又喊，坦白講，我地都唔知道聽日會發生咩事；可以做既只係珍惜每一日，每一次探佢既十五分鐘。
早前我睇到有人討論：到底做個痛苦既人？抑或做隻快樂既豬？我都有寫信同佢分享過，佢話，佢依家係隻痛苦既豬。我想借呢個機會同佢講：如果你仲知道自己嘅痛苦，你無論如何都唔會係一隻豬。
最後，我懇請大家唔好選擇做隻快樂既豬，而忘記呢一班喺裡面既手足。引用一句梁繼平既說話：真正連結大家一齊既，除左係大家既價值觀之外，仲有就係「痛苦」。我地生而為人，應該要有保持人既特質，唔好淪為畜牲，失去思考同反思既能力。quote返佢封信裡面嘅一段說話：「縱使依家嘅境況有一道好大嘅阻隔，會感到特別無力，特別失望，亦會好攰，心力交瘁；但因為這些「苦、痛、心酸」，我感覺到自己係生存緊。
再次多謝大家今日出席，為係裡面既佢地打氣。
睇到又笑又喊 在 《雷神奇俠4：愛與雷霆》影評睇到又笑又喊嘅超級英雄爽片 ... 的推薦與評價
可惜電影篇幅所限，各個部份有硬塞之感，導致到喉唔到肺的結果。#雷神#雷神奇俠#愛與雷霆#雷神索爾#無劇透#雷神4 #Marvel #Thor #LoveAndTh... ... <看更多>