Search
#彰化木棉花開始了 🔥🔥
去年已經提早的東螺溪木棉花，今年也一樣提早報到了！#目前花開約五成囉
🚩在哪裡︰https://13blog.tw/changhua-tourism-200304/
⭐️目前花況︰五成開(最美花況會在3月中~3月底)
⭐️最新賞花資訊就看「 13's幸福食光」按讚追蹤才不會錯過每一段精彩的旅行故事哦！
#歡迎轉貼分享 #可以追蹤👇
🔹ⒾⒼ→https://www.instagram.com/shine5413/
🔹ⓉⒼ→https://t.me/shineblog
※ 本單元是公共電視及李江却台語文教基金會合作製作。歡迎大家 link 做非營利教學使用。
新聞標題：寒熱袂定著 玉荷包僫牢果
Kuânn jua̍h bē tiānn-tio̍h, gio̍k-hô-pau oh tiâu-kó
牢果 / tiâu-kó：華語「果樹開花後著果」
上市著等五月節 一公斤兩百箍起碼
Tsiūnn-tshī tio̍h tán Gōo-gue̍h-tseh tsi̍t kong-kin nn̄g-pah khoo khí-bé
起碼：華語「起算、算起」
諺語：人gâu，毋值天咧做對頭。
Lâng gâu, m̄-ta̍t thinn teh tsò tuì-thâu.
雖然目今ê農業技術蓋進步，毋過，天時一下變，收成仝款會受著嶄然仔大ê影響。
內文：
*高雄大樹區農友
都落了矣
To lak-liáu--ah,
就這幾欉仔才有爾
tō tsit-kuí tsâng-á tsiah ū niâ.
賰的攏落了了矣
tshun--ê lóng lak-liáu-liáu--ah.
樹枝頂懸干焦零零星星（原底過音「只有賰零零落落」）
Tshiū-ki tíng-kuân kan-tann lân-lân-san-san
猶未大粒的玉荷包
iáu-buē tuā lia̍p ê gio̍k-hô-pau.
原本應該愛生甲真厚（原底過音「結實纍纍」）的玉荷包
Guân-pún ing-kai ài senn kah tsin kāu ê gio̍k-hô-pau,
今年受著氣候的影響
kin-nî siū-tio̍h khì-hāu ê íng-hióng,
雖然花開甲誠濟
sui-jiân hue khui kah tsiânn tsē,
但是留落來猶未大粒的玉荷包真少
tān-sī lâu--lo̍h-lâi iáu-buē tuā lia̍p ê gio̍k-hô-pau tsin tsió,
差不多無到三成
tsha-put-to bô kàu sann-siânn.
*高雄大樹區農友
都連鞭寒連鞭熱
To liâm-mi kuânn liâm-mi jua̍h,
舊年像這陣咧做肉矣
kū-nî tshiūnn tsit-tsūn teh tsò bah--ah,
差不多閣一個月就遏得啦
tsha-put-to koh tsi̍t kò gue̍h tō at--tit-lah,
今年攏晚差不多一個月啦 (「晚」白話音讀mńg)
kin-nî lóng mńg tsha-put-to tsi̍t kò gue̍h--lah.
農民表示
Lông-bîn piáu-sī,
原本往年會使收入差不多一百萬
guân-pún íng-nî ē-sái siu-ji̍p tsha-put-to tsi̍t-pah bān,
今年可能連三十萬攏無
kin-nî khó-lîng liân sann-tsa̍p bān lóng bô.
面對玉荷包盛產期咧欲來矣
Bīn-tuì gio̍k-hô-pau sīng-sán-kî teh beh lâi--ah,
但是農民煞無荔枝通收
tān-sī lông-bîn suah bô nāi-tsi thang siu.
農會嘛表示
Lông-huē mā piáu-sī,
今年大樹區的玉荷包產量再度減少
kin-nî Tuā-tshiū-khu ê gio̍k-hô-pau sán-liōng tsài-tōo kiám-tsió,
比舊年仝期
pí kū-nî kāng kî,
大約閣減一成半到兩成左右
tāi-iok koh kiám tsi̍t siânn puànn kàu nn̄g siânn tsó-iū.
*鄭金強 高雄大樹農會推廣股長
牢果率舊年約其略四五成
Tiâu-kó lu̍t kū-nî iok-kî-lio̍k sì gōo siânn,
今年pān-phue是三成彼跤兜（pān-phue：華語『預期』）
kin-nî pān-phue sī sann siânn hit-kha-tau.
玉荷包逐年送禮的季節
Gio̍k-hô-pau ta̍k-nî sàng-lé ê kuì-tsiat,
就是母親節和五月節
tō sī Bó-tshin-tsiat hām Gōo-gue̍h-tseh,
母親節拍算食袂著玉荷包矣
Bô-tshin-tsiat phah-sǹg tsia̍h-bē-tio̍h gio̍k-hô-pau--ah.
目前已經會使確定
Bo̍k-tsîng í-king ē-sái khak-tīng
母親節送禮期間
Bó-tshin-tsiat sàng-lé kî-kan,
民眾是食袂著大樹的玉荷包囉
bîn-tsiòng sī tsia̍h-bē-tio̍h Tuā-tshiū ê gio̍k-hô-pau--looh.
產量期大約會出現佇咧端午節過了後
Sán-liōng-kî tāi-iok ē tshut-hiān tī leh Tuan-ngóo-tsiat kuè liáu-āu,
到時產地價數可能是每公斤兩百箍起碼（原底過音「會上看每公斤兩百箍」）
kàu-sî sán-tē kè-siàu khó-lîng sī muí kong-kin nn̄g-pah khoo khí-bé.
