吹雪（下）
上集：http://bit.do/fncpB
我應該話畀主人知，我對雪橇嘅渴望，展示作為雪橇狗，與生俱來嘅狂熱。
雖然屋企無雪橇，但辦法總比困難多。
主人一出門，我就咬開衣櫃門，搵幾條連身裙出嚟，將條裙踩成繩狀，再咬住條繩，喺凳腳上轉幾個圈。
主人返到屋企，我就咬住條繩，扯住張凳嚟行，
雖然個動作唔完全似拉雪橇，但就好似人類玩「大電視」咁，最緊要對方可以理解。
初時主人唔明㗎，鬧我整爛佢啲靚裙，仲罰我夜晚唔准食零食。
但勝利總需要堅持，無論受到咩懲罰，我不斷做同樣嘅事，主人終於覺得唔妥。
「你係咪有行為問題啊？」主人一邊摸我個頭，一邊上網搵雪橇狗嘅行為問題。
我緊緊盯住屏幕，我見到好多唔同款嘅雪橇狗閃過，終於，有一張雪橇狗拉雪橇嘅圖！
我即刻撳住主人揸滑鼠嘅手，高聲吠叫。
主人難以置信咁望吓我，再望吓屏幕，諗吓我近排嘅行為，難以置信咁講：「旺財想......拉雪橇？」
我用盡全身力氣去搖尾，表示極度同意。
我唔係旺財，我係吹雪，命中注定要拉雪橇嘅吹雪。
「我搵吓點樣帶你去拉雪橇，你唔准再喺屋企搗亂，得唔得？」主人好認真咁望住我。
我伸出舌頭，露出最可愛嘅狗笑容。
目的達到，我當然唔會再整爛主人嘅衫，每日都乖乖喺屋企。
無幾耐，主人真係幫我辦手續，帶我出國旅行，去有得拉雪橇嘅地方。
雖然我唔鍾意檢疫，雖然坐飛機好孤單，但一諗到有得拉雪橇，我就充滿力量。
落機後，我見到雪，久違咗一生一世嘅雪。
主人帶我去一個有雪橇嘅遊樂園，裡面好多狗拉緊雪橇畀遊客坐。
主人同遊樂園嘅負責人講咗好耐，又畀錢又哀求，負責人先肯畀我拉雪橇。
但係，雪橇上無人。
負責人堅持：「你隻狗無受過訓練，畀人坐上去好危險。」
然後，一羣狗開始跑，我下意識都跟住跑。
我幾乎以為自己返咗前世，冰天雪地、雪花拂面、羣狗奔馳......
但我望向遠方，見到主人拎住手機，好開心咁影緊我相。
我忽然意識到，呢個唔係前世，就算我拉住雪橇，我依然係旺財，唔係吹雪。
人類唔係倚靠我嚟拉雪橇，只係我作為寵物，主人希望我快樂，給予我想要嘅娛樂。
但，我最想要嘅真係拉雪橇？
拉住雪橇，我先記起，一開始我想拉雪橇，係因為前世嘅主人需要，我就願意付出所有力量，為我嘅主人服務。
至於今世嘅主人......我望向凍到鼻都紅晒嘅主人，佢唔需要我拉雪橇，似乎，佢只係想我快樂。
拉完一程雪橇，我跑番主人身邊，仰起頭微笑。
我係吹雪，亦可以係旺財，我可以以唔同模式生活，只要報答到主人嘅愛，
來吧，我什麼都應承。
有咗一個目標，我哋就會搵方法去達到目標，就好似我想報答主人，所以我去拉雪橇。
但當我哋拚盡全力去實行嗰個方法，慢慢就會以為，個方法先係人生嘅終極目的，
甚至為咗個方法，做出一啲同目標背道而馳嘅事。
或者，行每一步，都諗一諗自己最初嘅目標係乜嘢。
勿忘初心，愛你如昔。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #吹雪
玩轉極樂園粵語版 在 #玩轉極樂園- YouTube 的推薦與評價
迪士尼•彼思《玩轉極樂園》預告3 ... ToNick 回憶備份// CoCo 玩轉極樂園可可夜總會// 二次創作 ... 【畫畫說故事】玩轉極樂園| Coco | 一個關於親情的故事- 粵語. ... <看更多>