【沉冤待雪】一頭貓B昨日於寵物節被一隻柴犬咬斃，柴犬主人事後懷疑不顧而去，更一度關閉社交平台。貓貓主人事後已報警。而柴犬主人凌晨出post，向貓貓及貓主道歉，但否認不顧而去。毛城城呼籲目證事件的朋友盡快同警方聯絡，還貓B一個公道。
被咬斃的貓B是一隻約一個月大的男仔貓，貓主是寵物節其中一個參展商的工作人員。貓主事發後在「天下貓貓一樣貓群組」發文：「我因為反（返）工又要餵奶比bb，用心口斜咩袋帶住bb，但有一男一女用2架寵物車帶住4隻柴犬，有隻柴犬塞個頭入袋咬死左我隻貓，咬住貓貓黎fing（揈），令貓貓頸骨斷左而死， ＊個主人仲話佢隻狗不嬲會咬貓＊，但完全無帶帶帶口罩，發生事後亦不顧而去」。貓主事後已報警，並一度有警員進入會場調查。
至於柴犬主人凌晨出post向貓主道歉「好對唔住，貓貓，好對唔住，貓貓主人。今日發生既意外，無任何人想見到，好對唔住。」但就否認事後不顧而去，又否認有講過所養的柴犬會咬貓「成件事發生好快好突然，我地當刻除咗一個主人追去搵事主，亦有問店員急救站喺邊，因為我地想去急救站了解貓貓情況，絕對絕對無任何逃避意思，cctv可以証明發生之後我地並冇不顧而去。我地重申無講過我地隻狗會咬貓依句說話。」
事發時，毛城城嘅同事亦在會場內做直播，雖然未有目擊事發經過，但在活動期間，亦曾多次與貓貓及貓主碰面。聽到消息時，我們嘅同事都非常傷心。我們已聯絡到貓主，並向她致以深切慰問。而香港寵物節的主辦機構亦有代表向貓主表達慰問同時，並會盡力協助貓主及配合警方調查工作。
我們呼籲當時在現場目擊到事發經過的朋友，盡快聯絡警方提供資料，令事件能早日水落石出，還貓貓一個公道，好讓貓貓能早日安息。
= = = = = = = = = =
【MEWE: MoCity 毛城城】
【Facebook: https://www.facebook.com/MoCityHK】
【Instagram: https://instagram.com/mocityhk】
【YouTube Channel: 毛城城MoCity】
= = = = = = = = = =
一站式 #寵物 資訊平台
✨想分享溫馨動人毛孩故事，或者得意相片影片？
歡迎FB Inbox #毛城城 或者 IG DM❣
