(呢個係一個直入式廣告)
-
是咁的，千呼萬喚始出來，好朋友塵阿力終於出書，書名叫《星塵画報-遇見90位香港電影女角色》。書裡面有90位香港電影女角色嘅插畫，由《秋天的童話》嘅[茶煲]到《狂舞派》嘅[阿花]，都有。幅幅都係心血，筆筆都係努力，我要幫佢宣傳，就係咁簡單。
-
同阿力嘅相遇，好奇妙。為咗理清返我哋嘅關係，我特登喺FACEBOOK嘅對話紀錄入面，搵返我同阿力相識嘅「經過」。無錯，喺一段頗長嘅時間入面，我同阿力係素未謀面嘅網友，用FACEBOOK去溝通，透過網絡去合作：我寫文，阿力畫畫，然後喺兩個人各自嘅平台 ——「港唔斷戲」及「塵阿力映畫」上面分享。
-
不善交際嘅我，其實從來都無諗過要同咩人合作，或者要將寫作嘅興趣發展去到咩層次，想寫就寫，唔想寫就罷就。但而家諗返，好感恩當初阿力搵咗我，然後衍生出一系列嘅合作，亦發展出一段獨特嘅友誼。
-
同阿力嘅第一次「雙劍合璧」，係《逆流大叔》，2018年香港本土電影嘅一個票房奇蹟。畫呢套電影，係我提出嘅，當初好純粹係諗電影就快要上畫，我會幫佢寫影評，如果可以配合畫作，就更好。結果一星期之後，阿力如約交稿，我亦將評論文章放上網，再過兩日，阿力就同我講電影公司同佢聯絡，希望想借畫做電影宣傳，唔少名人明星都有分享到阿力嘅作品。後來電影聲勢愈來愈浩大，票房一星期比一星期好，令人振奮。呢個成績當然同我哋嘅略盡綿力無太大嘅關係，但呢個就係我哋嘅第一次合作。
-
合作一不離二，《翠絲》、《G殺》、《淪落人》、《幻愛》等等等等，從此，當有令人注目嘅電影上畫嗰陣，就有我同阿力嘅合作，呢種合作關係一直維持至今。
-
而喺多次嘅合作當中，我睇到嘅除咗係阿力一幅又一幅極具個人風格而又亮麗奪目嘅畫作之外，我亦睇到阿力嘅為人，睇到點樣去做一個「人」。《論語》有句說話：「君子以文會友，以友輔仁」，交友嘅其中一個目的，就係用嚟完善自己，而阿力就係咁樣嘅一個能夠令我進步嘅好朋友。坦白講，我哋嘅交流其實唔算多，但每當我睇到佢又喺網上展示自己最新畫作嘅時候，我都會反省自己，點解佢可以咁勤力？係天賦？定係後天嘅堅持持？其實，人生本來就唔應該係行屍走肉，為咗搵食而無咗自己，而應該好似阿力咁，堅持做自己鍾意嘅事，唔求回報，只求喺世界上留下一點點存在過嘅痕跡。
-
自古以嚟，「文人相輕」係常事，可能係基於互相嘅誤解，亦可能係大家要鬥，唔妥對方。但我同阿力，一個係作者，一個係插畫家，能夠互相欣賞，亦係一個珍貴的緣份。幾時會再合作?只要仲有香港電影，我同阿力都會喺度。
-
塵阿力映畫
-
#睇完本書
#發現大家原來差廿年
#大叔的愛
#但我唔係田田
#阿力亦唔係KK
狂舞派3票房 在 電影狂人-影評情報交流平台's post - Facebook 的推薦與評價
〈狂舞派3〉終於有故事內容同劇照發放電影公司未有確實排期，希望今年上到啦第一 ... 由黃修平執導，2013年上映的電影《狂舞派》叫好叫座，香港票房逾1300萬，更榮獲3 ... ... <看更多>