【吉劈】
夜更的士行走距離往往比早更多，去到夜晚，好多時人口流向都係單向，吉車去返人流密集點係必要。日頭時，全香港都有人走來走去，荃灣去觀塘老母，塞到On99再上客過海，北角車個保險經紀去大角嘴，跟手入咗屯門，再可以有客出市區，早更嘅小確幸就係咁撲實無華。
夜晚呢？尖沙咀入屯門，吉車出市區，好運嘅過一過海，然後再來一次送那誰回家。馬路上車少，與其喺住宅區白等，好多司機寧願吉劈出市區，用氣錢買時間，於是夜晚嘅屯門公路、馬騮山、吐露港，都有空載的士One made race，近年混能加入，盛況空前。
之前空運正常時，偶然會出現機場客多車少嘅情況，講緊機場極多乘客而無的士。平時的士喺機場平均輪候時間至少一個鐘，一旦機場人等車，對司機而言係極為吸引，即使機場路途遙遠，氣錢都係投資，只要成功載客至少都出荃灣青衣，收入不俗，等於幸運大抽獎，我哋唔少司機都會吉劈入去，有錢就有人狗衝。
喺經濟不景嘅時候，只要有客，吉劈賺少啲，好過無錢搵，重點係吉劈後，目的地係人等車，咁我怕咩吉劈。深夜空載的士嘅速度，反映住兩個地方乘客量嘅差異。呢個行為實在係正常做生意現象，你睇下英航，唔俾載客嚟？我吉機劈過嚟都要接香港人走啊，香港去英國，大概係大疫情時代，唯一班班滿載嘅航班，吖，可能去加拿大、澳洲都多嘅，吉劈來港嘅飛機，只會愈來愈多，搵食車同搵食機，永遠唔會死錯人，我哋嘅數據就係最貼地。
