［瀨尿牛丸］LV買Tiffany？可能係全香港第一篇分析（多圖）
1. 利申先，潮流嘅嘢，我識條鐵。奢移品我都識條鐵。對我嚟講最奢侈就係時間，同埋睡眠。我心目中我個Mont Blanc卡片套都好奢侈架啦—但其實我以前有個LV卡片套添，都好奢侈，當然兩個都係囡囡送。
2. 並唔係我樸素或乜，主要係因為冇錢。「唔係買唔起，但唔抵」（即係買唔起）。我有十億八億應該唔介意崇拜名牌的。
3. 講返，週末嘅大新聞，就係傳媒爆出 LVMH 想買 Tiffany（https://reut.rs/2pW0Zb9）。Tiffany就固然係嗰間Tiffany。LVMH嘛，LV就固然係LV，M係 Moët， 毛for毛澤東，Moët & Chandon 。H咪軒尼詩，軒尼詩VSOP個軒尼詩。中文就叫 酩悅軒尼詩－路易威登，我懷疑有冇人會講呢個名，大陸佬都唔會。 其實LVMH呢堆嘢一齊咗成三十幾年，而旗下仲有好多好多其他品牌，可能有啲你都唔知係LVMH（或者只係我唔知）。
4. 事實奢侈品嘅嘢，講就好似匠人精神幾百年工藝家族傳承設計師靈魂乜鬼。幾百年前可能係嘅，而家？絶大多數都係鬥Marketing，代言人，收買傳媒同KOL，啤機，流水作業，大量生產。上市公司嘛，要同股東交代。LVMH已經好少少（下面解點解），但，最後都係美心帝國，多品牌經營，是真的。以下張圖就係LVMH帝國嘅牌子，子孫繁洐，未能盡錄。
5. 或者鍾意嘅，睇維基百科都得。
6. 冇所謂，對手都係咁，即係有美心就有King Parrot，譚仔都係丸龜。以下嘅圖係眾多品牌，其實嚟嚟去去都係嗰幾間大公司。未必最update，有錯勿屌，唔順超嘅自己整張。
7. 你以為有得揀？全部都係仆街跨國集團啫，嘻。其實同餐廳差唔多，要做得大當然全部係味將軍集團，你去原宿開間Sushi Bar（識唱一齊唱）就可以匠人精神，LVMH 2000億歐元市值嘅大集團，老闆都未必數得晒啲牌子，講呢啲？
8. 講返，小的縱橫情場多年（邊個唔係？），就真係冇送過LV畀女，一次都冇（有嘅舊相好可以出嚟提返我）。潘驢鄧小聞，錢最多五份一，溝女嘅嘢，使用錢架咩？講才華架嘛（明顯係因為我冇錢又冇潘亦冇驢先咁講）。師傅教落，洗錢冇所謂，但千萬唔好送嘢畀女，LV Prada iPhone都萬萬不可。因為，可能轉頭佢就賣咗佢折現，都算，最仆街係拎去貼MK仔呀！埃汾大愛，但都只係肯助養少女，助養少男要等下一筆研究撥款拎到先。
9. 小弟冇買過LV，倒係Tiffany 就買過幾次。原因？平咯！而我其實唔知LVMH同Tiffany 會有乜synergy（商撚常講，但其實好cliche），亦唔知有乜共通點或共異，除咗兩間都開在置地（好似係？），可以叫 置地記者寫下，由LM Reporter變成 LV Reporter．
10. 我甚至其實唔知呢啲奢侈品多品牌有乜synergy（都話fashion識條鐵），可能易cap水掛，又或者方便印公仔紙收購。餐廳我理解丫，可以一齊入貨，員工又係嗰啲友，我徒弟話齋，包雲吞又嗰條友，包意大利雲吞都係嗰條友，分分鐘啲雲吞皮都一樣（唔得架？），紙巾（包雲吞當然要紙巾）又可以用同一堆。但，最多名店sales可以調嚟調去啫（但得唔得架？我識LV未必識Rimova），但斷估冇可能間廠又做LV又做Rimowa掛。話說回頭，其實啲名牌手袋，亦真係好多都OEM，大陸啲廠。Made in Italy？塊Made in Italy牌就係，冇呃你。
11. LV袋貴過Tiffany 啲鏈好多（明顯我買最平嗰隻，旺角一街老翻），市值亦都大好多（唔係必然架下）。LVMH講緊超過2000億美金市值，Tiffany係100億美金多啲，20倍，所以吞佢落去，都十分簡單。
12. 有乜synergy，就實在唔知。亦有講話趁佢病攞佢命，呢啲亦係商業常態。有話Tiffany其實係貿易戰輸家之一，銷售數字唔多靚仔，中國又加關稅，加上調低咗銷售稅，中國客在海外買少咗嘢，如是我聞。如果冇睇錯，Tiffany都仲係以美國為主，一半咁滯。
13. 你睇Tiffany 股價，就唔係太差的。舊年就極差，但今年其實反彈兩成半，絶對唔係點財困。所以我理解係掉轉，對手強勢，LVMH實在太強，就係時侯諗下收購。股價咁強都唔諗，唔通等股價插水先諗？唔得閒睇，但LVMH好似唔係特別多現水，印公仔紙買嘢，絶對唔奇。咁就梗係等股價好時印，正如之前寫過華潤置地（1109）配股（http://bit.ly/32RIeEj），股價舊年升三成今年又升三成，而家唔cap水等幾時？
14. 頭先講過Tiffany 股價唔失禮，但同LV比就真係失禮了。你望下兩個圖，Tiffany挫上挫落，但LVMH近乎係四十五度角咁上，正到不得了。Recession？What recession？絲毫無損乜滯，香港示威？大陸人咪去第度買，之前LV出啲數冇乜受影響，股價新高。係喎，同Tiffany唔同，LVMH最大收入來源地，係Asia ex Japan．你估邊度？孟加拉？至於靠賣乜，下面圖亦都有，明顯皮具一類係主打
________________________________________
15. 呢排富豪真係多新聞，講嘅梗係最富嘅富豪。星期五六寫過亞馬遜同微軟，光頭佬同標基（http://bit.ly/31KeCre）（http://bit.ly/2WgXhVE）。但其實，LVMH，一樣關超級富豪事
16. 舊文都提過，光頭佬同標基係地球上唯二身家1000億美金嘅人（http://bit.ly/2WbUHjK）。但其實唔只係兩個玩，係三頭馬車。反而第四五嘅畢菲特同小朱，仍需努力。後者大把青春，前者，時間有限啦喎。
17. 第三位，法國佬 Bernard Arnault。乜水？估到啦，今篇文講得，正係LVMH嘅老細，大股東。其實之前佢身家一度係超過1000億美金，一度過咗標基頭。相信上返1000億美金身家只係時間問題
18. 但留意， Bernard Arnault又唔係L又唔係V（唔好笑，Louis Vuitton當然係一個人，不過廖創興就唔係一個人），做乜變咗大股東？就要講少少歷史，十分重要，好似好多人都唔知。
19. Bernard Arnault原本擁有嘅，係Christian Dior（以下簡稱CD）。死未，CD都係美心集團之嘛。點解佢會最初買到CD就不講。但要講，LV同MH，1987年先合埋一齊。命水唔好，之後就股災。好重要，好撚重要。
20. 拿，呢度真係好重要要講三次，等攬炒等股災等沙士嘅，不妨睇下歷史。每次股災，都係財富再分配，洗牌嘅機會—當然係有錢人嘅機會，富者越富（http://bit.ly/2m3Ib7W）。嗰次股災， LVMH大插，亦陷入危機，Bernard Arnault就密密掃貨，拎埋LVMH嘅控制權，踢走原本班友．The rest is history．唔肯定當年LVMH仲係咪 Vuitton家業，但硬係令我諗起胡仙當年賣埋虎豹別墅畀李嘉誠，聽講喊足一晚，因為敗咗祖業。See？都話危機一定係洗牌，唔夠有錢嘅有錢人就畀好撚有錢嘅有錢人清洗。
________________________________________
21. 係喎，順手講下，我係睇明報見到新聞的（http://bit.ly/32P5qmQ），但覺得有少少誤導，順手講埋。因為關CD事
22. 睇上文我講，或者你可能都知，其實係CD擁有LVMH，CD係老母LVMH係仔。To be more precise，CD渣LVMH四成多啲，但有超過一半嘅投票權（對，惡名昭彰嘅同股不同權，你估大陸佬先有？由歐洲佬去示範係咪型啲？）。而CD大股東，就正係Bernard Arnault。唔止，Bernard Arnault本身亦都再直接持有LVMH，不過唔係好多。
23. 咁明明CD係老母，何來LVMH 會「2017年以70億美元收購Christian Dior」?
24. 答案係，2017年，LVMH買嘅，唔係CD，係Christian Dior Couture（http://bit.ly/2plFSiq）。故事有點複雜，但當年LVMH其實已經有CD嘅香水業務，即係買埋其他嘢咁。所以不能完全話明報寫錯，而反正而家CD差不多所有（應係？）業務都係LVMH下面。老母云云，主要掛個名啫。都係Bernard Arnault，都係美心，唔使分咁細。（話時話，「美心」餐廳呢個名原本都係法國名，但當然同香港嗰檔無關）
25. 真係最後啦，見唔見上面個圖左上角有啲好奇怪嘅嘢？係喎，愛瑪士。被譽為真正奢侈品，仲未美心化嘅愛馬仕。其實都係上市公司，心碎未？
26. 不過重要嘅係，愛馬仕，暫時都未變美心集團。愛瑪士大股東，仲真係愛馬仕家族，亦都基本上係單品牌，真係少有嘅清泉，傳說中的家族生意匠人工藝精神（但依然要上市）。但，你睇圖見到了，其實Bernard Arnault一樣渣住愛馬仕，唔止，LVMH都有十幾二十巴仙。根本傳LVMH買起埋愛瑪士，係非常之合理。Bernard Arnault多次否認咗，但俗語有云，你唔諗住買起佢，掃十幾二十巴仙嚟把撚？愛馬仕嗰邊多次表達不滿，叫LVMH減持，但LVMH一於少理佢。你話想點？
27. 幸而，愛馬仕都真係爭氣，你睇股價表現，全不遜色於LVMH，亦都夠晒大，差不多係LVMH三份一，單品牌咋大佬，所以真係名不虛傳，最後的貴族，名牌中嘅名牌。
28. 況且，愛馬仕家族渣住咁多股票，仲要再搞同股不同權，基本上係冇得敵意收購嘅，唯有等愛馬仕真係財困，但觀乎咁賣得品牌咁強，都真係幾難。
29. 但另一方面，你代入下Bernard Arnault嘅想法。錢又有，幾乎做到全球首富（仲有機會的）。仲會諗乜？梗係Legacy，留芳百世或遺臭萬年，統一天下，全球霸主，前無古人。LVMH嘅多品牌戰略，應該係佢核心思想。Tiffany應該係小菜，有固然好，冇都冇所謂。但愛馬仕真係最後一塊拼圖。Bernard Arnault先七十歲，仲有得玩下，搞唔掂我估都係死唔眼閉。「其實有千億身家都唔係咁開心」「聽朝記得準時返工」
瀨名泉分析 在 靠北ES 的推薦與評價
到瀨名泉的身上罷了。 不僅是瀨名泉，關乎合奏裡的所有角色，我認為日 日日也都將他們視 ... ... <看更多>