關於 溝女iq題 ，我們在網路上蒐集到這些相關的討論、資訊與評價

《人生的成就解鎖》

唔經唔覺出左黎做野踏入第十個年頭，同時今日係我同窮太拍拖十年的紀念。亦即係話我由初出黎做野同而家，都係同窮太一齊，事業第一個十年不易，因為這是你職涯上的跑道揀錯了，人生聽講就會行多好多冤枉路。但我認為愛情上嘅第一個十年更難，我唔知道我喺職涯上有冇行錯路，反正岩又好錯又好，行左十年生活都還可以。而肯定就係最少我認為我喺愛情上都冇行錯路。幾多喺職場路上走得風風光光嘅人，喺事業以外都賠上左愛情同家庭？反正呢十年我同窮太都行過了。

十年前我地初初喺一起，common friend唔多，但佢地無一看好我地呢段感情。事關我地真係唔同世界，佢係典型內向乖乖女，我係喺街跌大嘅黑面毒L。記得窮太同我講過第一次見到我個面口黑到佢以為我係黑社會黎，所以都驚驚地我。咁唔夾嘅兩個人，初初好多朋友都覺得我地過唔到一年，so what？今晚我同佢慶祝十週年紀念。

事實係我係工作同愛情上抱嘅態度都係，你有幾投入，有幾鍾意，唔係用把口講。愛唔係得把口，係要做嘅。你今日為你喜歡嘅人同事，Plan左幾多，又實行左幾多？曾經係不同事情上兜兜轉轉，其實係你知唔知自己想要乜野嘅問題，縱使計劃100％趕唔上事情嘅變化都好，計劃始終係必須，今晚我同窮太可以坐係度舉杯慶祝，我認為當中努力嘅部份大過運氣，一段關係開始果陣可能是完全嘅心動，非理性。但日子耐左，要維持就靠大家嘅IQ同EQ交錯使用，我覺得呢一點同投資都幾類似。

十年過去，我地都唔再係以前果個廿歲嘅小朋友，我成日提窮太，你都三張野架喇！睇住佢由一個甘於平凡，本身打算讀個書，出黎打份office工過世嘅佢。變到今日試到咁多野出黎，仲會同我講佢有野想做，想試。證明我已經成功兌現當初承諾，我十年前同窮太講：「同我一齊，我保證你好難舒舒服服過日子，但同時我都保證你以後嘅人生唔會悶。」呢段日子我地同香港一樣，走過高山低谷。如今我相信係香港呢十年嘅最低谷，但感覺我地嘅生活比早年容易得多，呢個就係我地努力累積、增值嘅成果，無論係財富上，感情上都係一樣，我相信長線持貨的威力。

有朋友甚至網友問我係愛情上有咩心得，我真係冇咩心得，我冇出現過「溝女」呢二個字好多年，呢d都係我讀書時候嘅事，我唔記得架喇其實。但係如果你問我係點keep一段關係，我自己嘅回答同投資心得都係，心態係重要過技巧。係云云咁多對象入面，我一定唔係最好果個，同樣佢都唔係。但係我地好可能係最適合大家嘅人，投資同愛情都係，冇好唔好，只有適唔適合，而呢個係用時間驗證出黎。每個人都會有佢吸引人嘅地方，你要換個更好嘅對象一定可以，因為人比人，將所有人量化成一堆數字，一定有人高分過你同我。但呢d喺我黎講都係唔吸引的，因為冇獨特性。一段感情嘅獨特性，源自你同佢嘅經歷同回憶，係你曾經年輕嘅時候，大家一齊做過嘅傻事，甚至苦日子。呢種無可取代嘅過去形成左兩人強大嘅羈絆，令感情變得獨一無二，不能量化，變得無價。飲杯！

p.s：張圖我對電影《十年》的海報進行二次創作，其中意念來自電影《十年》其實係講緊變化，一種對未來變壞嘅恐懼，一個對時代嘅悲觀預測。事實上呢十年我地又何嘗有好過呢？時代從來唔由我地決定。但我想講嘅係，就算未來十年，時勢真係好似套戲講到咁壞，我同窮太，有咩未見過，有咩未捱過！驚你呀？大你十個十年呀！

原文：
http://www.poorlhk.com/2020/04/06/我們的十年/

IG ：
https://www.instagram.com/mr_mrs.poor/

網路媒體已經不是新興行業，但要經營一個成功的網路媒體還是要用上比新興更新興的方法。

什麼方法？

只略懂皮毛，不敢班門弄斧。

但可以肯定告訴你的是，想知道哪一間媒體能夠闖出一條血路 (是的，做媒體要流好多血，即係花很多錢)，最簡單的做法就是看看幕後老闆。

不用看得太深入，看年紀便行了。

做媒體老闆是老的好還是嫩的好？

舊媒體越做越沉，是正常不過的自然現象。做媒體即是做訊息，在一個訊息萬變的年代做訊息，最重要是「適應力」。

咦，不是說 content is king 嗎？內容不是媒體的重中之重？什麼適應力，竟然比內容重要？

是的，適應力比內容重要。

所謂媒體，都是有血有肉的生物：「內容」是大腦，當然重要，但要是整個身體狀況不能適應周圍急劇轉變的環境，那怕大腦的轉數是 IQ 160，也是死路一條。

「最近」有家媒體，面世還不夠十八個月，純碎以面書的 engagements 計算，影響力已經超越了所有老牌財經媒體。一直很想認識背後的神秘玩家，苦無渠道，但這個神秘玩家最近居然委託一個中間人主動找我。

原來他們想做第一輪融資。

就這樣，兩個神秘人在一家神秘的意大利餐廳進行了一次神秘會面，相認的 dress code 是黑衣牛仔褲配白波鞋。

一看，原來神秘人是一名薯仔；他進來餐廳看見另一個神秘人，竟然是一位靚仔。

薯仔的表情有點靦腆，靚仔的笑容是如常親切。

「你好，」我站起來伸出手。

「葉生你好，」薯仔說，手心冒汗。

坐下來，他點酒，我點菜。

然後直接入正題。

「睇過你個 deck，」我說，「你想玩大佢？」

「趁自己仲算後生，梗係想玩大佢。」

「你幾大？」

「二十八。」

「Wow，講吓你嘅故事。」

他顯得有點錯愕，「葉生面前，點敢講故事。」

「唔使咁謙。」

「葉生知唔知北角邨喺邊？」

「叫我 Marcus 得喇，」我思考了一會，「唔知。」

「海璇有冇聽過？」

「三萬蚊一呎嗰度？」我有印象。

「係五萬蚊呎，」他說，「北角邨以前就喺嗰度。」

成功的創業家都有很多共同點，其中一個是，他們都很會說故事。

「你喺嗰度大？」

「係，三百呎，一家六口。」他說。

「你諗住由你出世講起？」我笑著問。

「可以由四年級講起，」他倚著椅背認真地說。

有一天放學回家途中，一輛法拉利在渣華道駛過，他覺得很酷，然後他的同學說了一句：「望咩啫，你呢世都買唔到啦。」一頭冷水，讓他人生第一次「努力」起來。之後他進了一家有名的英文中學，然後「又再頹過」。

他解釋「又再頹過」的原因：「一個人如果只得一個目標，當你達到目標之後，就等於冇咗目標。」

「之後點？」我在記事簿上寫了幾隻字。

「葉生有冇聽過寶馬山五嶽？」

我忍不住大笑起來：「五嶽？唔係金庸小說嚟㗎咩？」

「北角寶馬山最惡嗰五間中學，人稱『寶馬山五嶽』。」

我沒有說什麼，被他的劇情吸住了。

會考十分，不能升讀原校，中六正式成為五嶽派弟子。

「寶馬山風涼水冷，」我想像，「幾好呀。」

「都真係幾好，」他苦笑。

地理堂，班房後面有人點煙；老師看見皺眉，以為老師會阻止，怎料老師一臉誠懇地說：「我氣管唔好，你可唔可以入廁所食？」 同學算有品，「妖」一聲之後，口擔住煙，離開咗班房。

英文堂，班房後面又冒煙，不過今次唔係有人食煙，係打邊爐。老師見到，對住個學生好大聲咁講咗一句：「唔該，save me a sausage！」

「好有電影感，」我喝一口他點的紅酒，嚐到醉人的玫瑰香味。

「唔係你想像中咁差，其實好似間茶餐廳咁，有人食煙，有人食腸，咁我咪睇報紙囉，因為我真係好鍾意睇報紙。」

當他說到這裏，我忍不住問：「你之後有冇讀大學？」

「有，科大。」

瞪大眼睛的我，倒抽一口涼氣。

「本來冇諗過讀大學，」他拿起一個麵包，「每日渾渾噩噩其實都幾寫意。」

「後來呢？」

「有一日，上緊中文堂嗰陣，煲煙嘅如常煲煙，打邊爐嘅繼續打邊爐，我照舊睇我嘅《明報》，然後突然之間，聽到『澎』一聲，嚇到全班一齊尖叫。」

原來隔離班有位同學不滿老師「寸親佢」，於是一手抬起那張教師桌，然後把那張教師桌從五樓扔到操場。

「澎」一聲的巨響之後，立刻跟著所有同學走出班房，然後從五樓看著操場上那張支離破碎的木桌，呆了數秒，「終於醒咗」。

「醒係咩意思？」我問。

「我同自己講，如果我再唔努力，下場肯定會同嗰張木枱一樣。」

「粉身碎骨？」我不解。

「係變成一件垃圾。」

發奮讀書，進了科大 BBA 的他，卻錯過了很多人嚮往的大學生活，因為他與兩位港大及中大學生一起開了一家補習社。

「三十幾度著住黑色西裝喺其他小學門口派傳單，我哋嘅口號係『保證全部三大院校師資』；高峰期每個月淨袋六萬幾蚊，係每人。」

「難以置信，」我喝一口清水，「咁成功嘅創業經驗，學到啲咩？」

他想了半天：「有一次，我教個學生重組句子，我一路教，佢一路玩，叫佢做一次，佢又唔識，我話之前咪教過你囉，佢好寸咁話，『有咩證據你教過』。望住佢嗰個死人樣，我終於忍唔住，成本作業『車』向佢塊面，佢當場喊出嚟，然後孭住書包走咗。」

「咁大鑊？佢阿媽有冇搵你尋仇？」

「隔咗唔夠半個鐘，阿媽好嬲咁拖住個仔衝入嚟補習社，佢個仔當時仲喊緊。仲記得嗰陣咁啱落堂時間，有幾個家長企喺補習社門口，佢哋好似等睇戲咁樣。我個樣依然好堅定，但其實已經驚到腳痺。」

張力十足的情節。

「嗰個阿媽一隻手鍊住我膊頭，另一隻手捉住我手臂，然後話：『陳 sir，多謝你，我轉咗咁多間補習社，都搵唔到一個阿 sir 治我個仔，今日終於畀我搵到。以後個衰仔靠晒你，求吓你，千祈唔好趕佢走。』我由一個虐兒犯變咗孔子，你明唔明嗰吓有幾震撼。」

笑到天翻地覆的我，好半天才能冷靜下來，問：「咁你即係學到啲咩？」

他說得尤其認真：「就係無論一個老闆幾叻都好，佢都冇可能預計到市場反應。」

我又大笑起來，但他很認真地繼續：「但我哋個平台可以估算市場反應，因為我哋嘅 engineer 整咗一套數據分析系統出嚟，可以估算到乜嘢類型嘅關鍵字當下會吸引最多人討論，而我哋就專門谷嗰一啲新聞。」

「你以前做過記者？」我問薯仔。

「未，」他說。

「你點解會咁識做媒體？」

「葉生，你都有寫過啦，要揸 Formula One 揸得好，最好之前未揸過私家車；一啲人哋以為需要嘅訓練，其實係多餘；做記者需要訓練，搞媒體需要觸覺，訓練太多反而會冇觸覺。」

面前的薯仔簡直是金句王，好比一個 skin head 黎明。

「言下之意，而家嘅媒體老闆冇觸覺？」

「我唔敢咁講。」

「咁你想點講？」我問。

「葉生，有冇睇過《縱橫四海》？」

「張國榮嗰套？」

「唔係，亞視出品，陶大宇嗰套。」

「未。」

「陶大宇本來係有錢人，然後生意失敗，乜都冇晒，豬欄都要住，真係同豬一齊住；餓起上嚟，餿水都食。」

「你想講？」

「我就係嗰啲，餓起上嚟，餿水都照食嘅人。好多大媒體，經歷過傳媒最風光嘅時期，要佢哋今日改變打法，佢哋放低唔到身段。有啲人係烏托邦居民，我係真實世界嘅人。」

「但好似都有唔少傳媒人，有幾多好嘅 idea。」

「有 idea 唔代表有料，幾多人就係覺得自己有 idea，做埋啲不切實際嘅嘢，眼高手低，唯有後果自負。」

招牌的紅蝦意粉上枱，薯仔開始啟動，食相比哈利王子更王子，很難想像他會吃餿水。

「想問，餿水都願意食嘅 determination，就係因為出身夠窮？」

「唔係，而係因為我娶咗一個，愛多十世都嫌少嘅女人。」

忍不住又笑起來：「Determination 來自真愛？」

「點敢喺溝女界 KOL 面前賣弄感性。」

「我 sell 性感，唔 sell 感性。」

他笑一笑，問：「葉生一定知道邊個係蔡崇信啦。」

我點頭，他繼續：「好多人以為蔡崇信放棄高薪厚職去幫馬雲，係因為佢有眼光，其實佢當然有眼光，但其實蔡崇信嘅外父都應記一功。」

「唔明。」

「蔡生外父係富豪，所以就算蔡生有幾高薪厚職，都冇可能超越外父，所以蔡生先要搏一搏。」

「太淒美了，」我乾了一杯說，「原來你唔想衰畀外父睇。」

「只係想話畀外父聽，無論佢個女上半生有幾幸福，我都會令佢下半生更加幸福。」

由真愛孕育出來的媒體，大概可以走無限遠的路。

IG= marcusyip55
#攻關

【IQ題的專家】樂仔溝女無數, 點解溝唔到牛奶妹？