［TVB 績後勁升］Like it or not，業務改善緊，股價唔呃人。不如直頭變大陸媒體股算啦。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
1. 純技術討論，唔係叫你買（從來冇買過），亦唔係支持TVB（冇睇電視N咁多年，對上一套睇嘅係溏心風暴）。大把其他好公司，why bother？但純學術討論。
2. 拿，真係Patreon寫到明的，出業績嗰晚已經講，唔係升咗先寫。成個業績Excel我整埋添呀，堅係冇苦勞都有肺癆。固然又係嗰句，第二朝一開市就升（雖然你即時飛入去都執到嘅），未必點幫你賺到錢。但至少判斷消息（呢個情況係業績）後反應，都係一種技能，而唔係只係「唔係升就跌」，照計係有技術含量嘅。
3. 正路地，你望頭條，哦，連蝕三年，冇撚用啦，執咗佢啦。基本上呢三者都正確。但係咪代表業績就差？股價就跌？又唔係喎。同之前講咗無數次嘅「股市同實體經濟脫節」一樣，股價只炒將來，業績就當然係頂多睇「最近嘅資料」，即係下半年。
4. 講白啲，上半年都出盈警啦（都幾意外，陣間講），上半年都蝕到七彩，全年點會唔蝕？但你見上半年蝕咗2.9億，全年先蝕2.8億—即係下半年有微利—擺明係止咗血。好過冇咁咯。但股價就係睇呢啲嘢之嘛。
5. 簡單重溫TVB近年嘅困境，三樣嘢，有外在有內在。首先傳統媒體越嚟越難做，話知你乜立場。但第二當然同政治有關，唔少人唔睇TVB，亦令唔少廣告商唔肯落廣告，肯落都壓你價。第三就自己投資啲圾垃星美債券出晒事，差不多變廢紙。
6. 咁2019年蝕到仆街當然係主要關星美事，亦可以話係一次性因素。但去到2020年理應已經斷尾，因為減值差不多做晒。但去到2020年上半年都要蝕大錢就有啲意外，明明冇咗星美呢舊嘢，都要蝕2.9億，除咗因為頭先講嘅兩個理由，再加埋肺炎疫情啦下。你見啲「核心業務」都輸錢，仲衰過2019年下半年
7. 呢啲就係舊屎。但去到2020下半年，的確見到反彈，你可以睇返2019同2020年四次半年嘅走勢（Patreon我有成個Excel），收入，20億跌到17億跌到12億，但2020下半年彈返去15億，點會唔係改善緊？
8. 毛利一樣係咁，11億跌到4億跌到2.6億，但最新已反彈到6億，點會唔係改善緊？原因係乜就可以再研究，固然減咗啲成本（邊個話冇用？），但上一段都話到你知，係開到源嘅，至少最差情況過咗。咁雖然都係跟大圍，舊年下半年啲市道都好返好多。
9. 不過，正如太興一樣（早兩日寫過）（https://fbook.cc/3Ne1），TVB都係拎「保就業」大戶。拎咗2億！咁差不多全部係下半年入數，所以你亦可以理解，唔係多得「保就業」，都仲要蝕近2億。不過兩點，首先，TVB個「保就業」計落「其他收入」，咁頭先講收入同毛利改善緊，係唔關保就業事。第二，即使你拎走「保就業」，仲係蝕錢，但都係少過之前嘅。
10. 之後點？我都唔知喎，我又唔係曾志偉黃祖藍，但全面投向大陸應該冇走雞（最尾會再補充）。管理層都出嚟講，今季廣告收入勁，亦都有講預大陸收入會超過香港（https://bityl.co/6A6b）。都幾癲，但你睇最近十年，TVB香港收入仲要跌，反而大陸收入升咗10倍（雖然基數低），最新係大陸8億 香港15億，此消彼長下，照計管理層唔係老吹。
11. 仲有睇多樣嘢，財政狀況。好人好姐嘅公司就當然睇增長，但麻煩多多嘅公司（國泰如是，有線係咁，TVB都係咁），睇下生唔生存到先。咁明顯地，TVB根基比另外兩間公司厚得多（雖然國泰叫做實有政府救，不能只睇表面數）。
12. 你之前有啲報導講咩TVB現金只夠燒半年，得罪講句，咪見到唔識嘢，但講真求其個記者都識嘅，你都唔使睇我寫文啦，我個CFA可以拎去堆填區。但冇所謂，讀者鍾意睇呢啲垃圾。但嗰篇報導都2020年頭，唔知而家TVB死咗未？
13. FACT：TVB而家有33億現金。冇錯，都有38億貸款，「嘩資不抵債呀」（你應該唔會咁戇鳩架可？講真埃汾戶口長期都唔會過10萬蚊，而我爭銀行200萬，我又「資不抵債」呀可？）
14. 你睇個net debt to equity，8%，「即係高定低？」。近四次業績最低，2019年中時講緊30%。咁明顯財政相當健康，健康過陳健康。
15. 仲有，Book value．因為不停蝕錢，固然近四次半年業績，61億跌到55億跌到50億，但最新反彈返去51億。固然因為唔派息，又拎咗「保就業」。但我當你一年蝕幾億貨仔，都仲有排玩。況且，照計之後唔會要蝕咁多啩……
16. 當然再講一次，講咁多，純學術討論，唔係叫你買。亦唔係支持TVB（CLS）。但到公司業績越嚟越差，就唔使事實了。至於節目垃唔垃圾，扯，麥當勞年年都搵大錢啦，米芝蓮餐廳先蝕錢。你憎間公司一回事，但股價係另一回事。如果你鍾意佢佢就會升，就唔會咁多人早排叫晒救命啦
17. 最後補充，純個人意見，不喜物插。我在星展年代（講緊2017—18年），有位同事係力推TVB呢隻股票的。咁首先該人係香港仔，亦唔見得會睇TVB，而去到而家當然應該知道錯得很。雖然佢年紀細過我，梯圖又低過我，資歷又淺過我，但我十分崇敬呢位同事的，勁人。嗰時佢講樣嘢，換著係其他公司，同騰訊等等等合作，股價一早飛天啦。
18. 的確係咁，我大膽覺得，TVB個問題，「亦同好多港企甚至港人返大陸發展差不多」，你兩頭唔到岸反而唔得。索性豁出去，當自己大陸媒體股，就肯定唔止咁嘅PE啦，係咪先？人地當你香港股就梗係唔過癮。如果TVB真係大陸收入多過香港，我估管理層分析員都會咁定位。係投共，就徹底啲嘛。我見我啲返大陸嘅同學，撈得最掂嘅，就徹頭徹尾變咗大陸佬，開車都同大陸佬一樣。
＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
溏心風暴3 38 在 溏心風暴3 38/40 - YouTube - YouTube 的推薦與評價
溏心風暴3 38 /40 | 黃宗澤、王浩信、李司棋、夏雨、米雪、關菊英| 時裝商戰倫理| 粵語中字| TVB 2017. TVB Best Drama 熱播劇場. ... <看更多>