大嶼皇帝本紀（二)：王兟的明日大嶼眾籌狂想
上回講到王兟橫空出世，竟然連《蘋果日報》都郁得倒幫佢登埋頭版廣告，來頭當然唔細。貧家出身，一直到牛津畢業，番黎香港響TOM.COM成為周凱旋頭馬，之後再響金融界打滾。接受傳媒訪問果陣都講咗啲同情年青人嘅說話，但無可否認就係一個藍絲，吹捧中國成功值得香港學習之類；而且將社會問題完全歸咎於土地問題亦未免太過簡單。
但要講呢啲背景，主要係想講以佢嘅江湖地位同人脈，並唔係好似之前果個乜嘢「千萬求一路」咁，搭個棚出咗風頭，然後連數都唔找就潛咗水算數，而係背後一定有啲Hidden Agenda。
響講王兟本身個瘋狂計劃之先，其實佢同董建華檔香港團結基金，最大嘅分別就係在於集資問題。董建華作為前特首，諗法就係同當年起膠鐵同港豬噢大橋一樣，有咩就由特區政府拎財政儲備填氹，反正蝕尻哂都係香港市民嘅錢同佢無關。問題卻係在於，而家對儲備肉痛嘅，唔單止係貧苦大眾，仲包括商界同公務員。商界好清楚，當你儲備搾乾搾盡，下一部就係加稅；政府啲儲備本身亦應該用黎津貼中小企呢樣果樣而唔係單單益哂啲紅色資本發展商；
至於公務員呢，其實從來佢地嘅理財哲學都係「庫房嘅錢即係我地嘅錢，梗係愈多愈好」，明日大嶼要駛庫房咁多錢，同割左佢地忽肉係無分別。雖然響今時今日共慘黨一黨獨大嘅情況下，無人係敢提出反對聲音，但唔反對啫，唔代表唔可以響行政程序當中作出各種拖延家嘛，甚至仲可以利用民間輿論製造障礙，所以點解成個明日大嶼推黎推去都係局限於林鄭為首嘅幾個官員；垃圾會審黎審去都只係批咗5億做前期研究，個原因就係如此。
而王兟就響呢個時候出場。簡單黎講，王兟建議先成立一間NGO「全體香港人合資有限公司」，然後向全港700萬人以一人一股方式集資，每位市民派發一股可轉讓免費認股權，再加埋向國際投資者推銷，最終籌集1000億起動基金。然後再以此作為基礎，發債1萬億作為明日大嶼填海工程全數費用，換黎嘅就係填海完成後嘅土地使用權，到時所有持股人都能夠按賣地賣樓收入獲得股份分紅，債權人收倒利息兼債本，政府唔駛錢就完成成個填海工程，各取所需，皆大歡喜，幾咁完美！
「咪住！呢個計劃一定有問題！」相信絕大多數人聽到呢度，一定係有咁嘅反應，而且跟住落黎必然係有排山倒海嘅質疑。
但我覺得好多人就住計劃嘅可行性提出反對，係搞錯哂方向，亦唔明白王兟背後嘅動機亦唔單單係在於起成明日大嶼咁簡單，所以我先幫佢改咗「大嶼皇帝」呢個封號。
https://www.patreon.com/posts/da-yu-huang-di-46431291
