關於 涼粉 邊度 買 ，我們在網路上蒐集到這些相關的討論、資訊與評價

涼粉（下）

真係大家咁熟先至講，涼粉製作呢家嘢，都應該唔會做第二次！因為真係好辛苦好辛苦好辛苦！其實我之前有焗過麵包、又搞過好多同煮飯有關嘅嘢，程序好多同好繁複下嘅都玩過，但係就真係冇整涼粉咁辛苦！

首先講個購買過程，真係唔係邊度都有涼粉草賣，行餐飽！

之後係個製作過程，嗰啲涼粉草其實係柴咁款嘅，你洗嘅時候真係會拮到隻手損曬，之後卒佢又淥親，冇錯我係淥熟咗隻手咁滯嘅！蠢到死，唔記得咗可以搵啲凍水座住個煲嚟捽，咁就淥親啦！

另外捽嘅時候亦都係會擦損手皮，我隻手其實用得好粗，但係都擦損咗！

之後到隔渣，呢個先至係辛苦之中嘅辛苦，我又係蠢咗唔用魚袋，其實倒入魚袋一扭就搞掂，我懶係仔細咁，攞個紗網慢慢刮，真係搞到天光！都未計滾瀉咗抹灶頭嗰個辛苦法！

終於，製作完成，但係都係得果咁嘅兩三碗！真係非常之唔合乎經濟效益！

未完！仲有清洗過程，佢唯一好處係唔肥，好易洗，但係佢嗰啲涼粉草碎真係無孔不入，而捽涼粉草嘅過程又會唧到成個廚房都係涼粉草嘅膠質，似去釣墨魚咁隨時會俾啲墨射親你，又好似案發現場咁明明抹完抹淨，又突然發覺好似仲有啲痕跡喎，又要繼續抹，真係好佩服嗰啲殺手，殺完人之後點樣清理現場呢，應該一槍爆埋去，啲血會唧到周圍都係喎！

製成品可算十分成功，確實係好乾淨，亦都有外面買嘅嗰種彈牙。咁會唔會繼續整呢，應該唔會，除非會！依家屋企仲有80g涼粉草，你邊個要就PM我啦！

#何嘉麗callmegaga #何嘉麗 #為食路上
#自嘉製 #涼粉 #冰凍涼粉 #冰凍雪糕涼粉
#街邊涼粉擔心唔合衛生
#罐頭涼粉好多都加咗糖
#涼粉粉都加咗糖
#呃like之作 #不可一不可再
#自嘉製涼粉係非常之不切實際
#自嘉製涼粉浪費時間但係衛生
#自嘉製涼粉可一不可再

🎵屯馬開通很興奮🎶！興奮嘅除咗嗰位未出世已經等屯馬線開通嘅少年之外，仲有實在太多人！包括我！

一心其實諗住去九龍城搵嘢食，有鐵路，至少唔使搵位泊車！去到宋王臺站，見到全部都係人、全部都係人、全部都係人，真係想走人！

既來之則安之，原本諗住慢慢搵嘢食，結果都係唔好，因為大大小小嘅食肆，門口都有一條不少於10個人嘅長龍！於是我就喺宋王臺站出口嗰間小店W..Burger度坐低食。佢有好多款漢堡包，聽講都少有名氣，不過我喺香港唔食牛，於是我叫咗豬扒意粉，點知又幾好食喎。件豬扒大大件，有湯有飲品都係$80，生意難做啊！

跟住我就喺九龍城上上落落咁樣兜咗一個大圈。以前行九龍城係揸住架車，心目中想去邊度買嘢，就揸架車停喺門口，買完就走，今日冇開車可以閒逛，雖然身邊好多人，真係好似行緊花市咁，但係都有少少遊客心情，特別係去到嗰條泰國街，見到啲蛇粉同埋拳王油嘅時候。

不過實在太熱，啲汗好似都好想喺九龍城玩咁走哂出嚟，好彩每隔幾步就有一間開住冷氣嘅唔同類型嘅舖頭，於是我係唔係都入去睇吓，其實係過冷河！

九龍城原本都好旺，不過係某幾條街，而家差唔多成過九龍城都旺晒，唔怪得啲鋪租越嚟越貴，最後，由義香美味嘅豆漿同埋紅豆涼粉作結。佢哋依然保持價廉物美，坐係坐得迫啲，熱係熱得厲害啲，但係喺風扇與汗水之間食住冰涼嘅紅豆涼粉，同埋煎到熱辣辣嘅三寶，嗰種冰火感覺，你一定要去試。義香，咁多年來保持水準。

#何嘉麗callmegaga #何嘉麗 #出街玩
#屯馬線 #九龍城 #宋王臺站
#屯馬開通很興奮
#為食路上 #WBurger #義香豆腐食品

【面斥不雅之阿強也不過是龍五】
(微劇透)

看黃子華楝篤笑完場，看他在紅館四個角逐隻誠意拜謝，然後回到那大型升降台離開，真有很強烈一去不返的訣別感。就像認識一位好友，本來已經疏落到每四五年一聚，彼此儲蓄了很深厚的歡欣和喜悅，現在他從此𠺘口不幹，說明跟你開開心心埋這一次，可以想像最後這一晚就快消逝的離愁別緖有多難受。

黃子華說自己生於香港最黃金時代，好應該叫自己做黃金華。的確在那時代，明天要憂慮的事情不算多，要報仇等多十年亦未為晚也。地球還沒有嚴重暖化，空氣仍然很清新，動物不會隨便吞吃膠袋，我們還有陽光很燦爛的明天，我們還有餘閒肆無忌憚一邊做好心，也一邊做些未至於傷天害理的壞事。我們看來還有許多空閒，我們只玩食字已經足夠笑餐懵。也的確在那時代，最值得驚恐就是在街上一不小心眼望望昭中黑社會陀地，很容易被捉入冷巷盤問：「你邊X度？」然後你最好收埋三五首不同字頭的黑社會詩句傍身。正所謂在學校唔識默書唔會死，走進別人陀地的屋邨唔識背詩就分分鐘被人閹spring pocket。

七十年代每個公共屋邨至少有一瓣黑社會陀地，每個字頭亦必有幾款不同詩句。除了問你邊度？爛仔們亦要問你「身受何職？」，好地地大部分年輕人都自認是入門的「藍燈籠」，極少人像陳惠敏般敢自認「雙花紅棍」。再來最基本你響朵後要識得背誦代表字頭的「招牌詩」，又好搞笑當有人懷疑你響流朵時，你便要背誦證明自己是堅嘢的「流詩」，也有為路過貴境無心「踩格屎」惹事的「自保詩」，再離奇是明明沒有女友都要學埋保住女朋友安全的「保女詩」。不知為甚麼，小學時代跟同輩唸過的黑社會詩，到現在仍然全部識背。當年住在葵涌石蔭村，唔識陀地和合桃的招牌金句根本唔使出街，想走遠點過去石梨邨買汽水涼粉，你必要學會當地十四K的：「龍飛鳳舞震家聲，十#號令天下響……。」又有需要到梨木樹打金絲貓的話，你最好學埋和勝和的本門金句：「本門自號和#和，風吹雨打誰不怕……。」等等！

回想當年真的幾過癮，你走在街上明明有人㩒住想打鑊你，只要你識幾句詩詞，會有一半機會放過你，其實都幾文青幾黐膠花。明白大家想學嘢，但我唔肯定寫曬黑社會詩句出來，究竟代表我記性好定等同我犯法，所以只會隨便寫幾句，記錯亦唔好搵我尋仇。其中最發神經是到今日都唔信背出來就冇人搞你條女的保女詩：「此花不是非凡花，乃是紅門義氣花，此花乃是仙人種，義兄採花別處採！」啲中文壓韻流暢到一個極致。更荒唐是故意說反話代表自己是堅嘢的流詩：「說我是流不是流，三年河水萬年流，低頭飲過黃河水，你說我流你亦流！」等等。小那巴被人盤緊仲要口震震咁背啲非常挑釁的詩句，其實係非常咁內心交戰。

對了，當年大部分仇怨可以背詩解決，反而沒今天人面獸心。如黃子華所言，今昔最大分別，是當年即使你有錢，你是社團大佬又好，你有本事請動香港一級天王巨星拍電影也好，人人心𥚃自然有把呎，亦有一定知識水平，既開明也包容，做壞事不會太猖狂，蝦蝦霸霸還會有幾毫米分寸。豁出來喇說得再明白，你姓向也好，叫阿強也好，能夠叫得郁周潤發拍《賭神》也好，作為大老闆亦只會知情識趣飾演龍五，乖乖地做高進的保鑣，身手係幾好槍法係幾準，但最有型的還是留給發哥去演。誰都沒夠臉皮學馬雲，親身飾演中年武神，可以接二連三打贏吳京、甄子丹、李連杰之類。如黃子華所說，就算打平手甚至打輸都未夠資格啦！當年惡人惡極，也不會蠢，不會以為觀眾低能！因為讀過小學都明白「面斥不雅」，唔好去到要人當口當面媽你至安樂。

如今金盤𠺘口，是大環境不容易笑得出聲，好難有事叫人真心開懷大笑。現實情節太荒謬，積存深厚的怨恨讓我們要看到對家仆街才會感到半絲興奮涼快。所以就算今次最後楝篤，如果期待純粹好笑是錯誤期待。反而是你會真正看到五十七歲的黃子華，一直以來像透余樂天般嬉皮笑臉口甜舌滑佔盡便宜，沒想到三十年來他對這片地方愛得最深，對香港重要事瑣碎事都一件一件放在心上，都看得重。他也願意肩負既沉重也不討好的擔子：借一個楝篤笑舞台交出自己良心，說幾句立場鮮明的公道話：政制需要改革、暗角打人是錯，靠有錢打贏甄子丹屬於面斥不雅！聽他說完，人心大快，但就是完了。從此再沒有人諸事八卦，苦口婆心走過來提醒我們小便該射準些，叫雞要對性工作者心懷尊重，陳冠希最錯不是太多女而是太靚仔……，這一切看似瑣碎卻牽涉核心價值的是非判決，他都一一臨別贈言講清講楚。他𠺘口走了，香港具幽默感和娛樂性的敢怒敢言從此灰飛煙滅。再沒有人把我們的憂愁稍稍轉化為情趣，沒有人伴著我們對醜惡作出嘲笑指摘！再沒有那個人情味！沒有那個對人性的透徹通達！沒有當頭棒喝！也沒有人教懂你自省然後會心微笑！我們再難由衷地快樂，連苦中作樂那技術也要失傳，隨著他轉身離去！