［苦樂全在主觀的心，不在客觀的事］春美阿媽，當然唔係叫春麗啦！
TL：DR—爛片搵亮點，先係重點。人生都係。
1. 冇乜心機寫文。但，球員冇心機就唔使踢波咩？歌手冇心情唔使開演唱會咩？最多唱第啲歌。（其實，主要係部碌卜個keyboard畀我打到神神地）
2. 01篇文，舊文，但相當好睇（https://bit.ly/2Ns8Eq8）。不過今日唔係講街頭霸王隻game（我可以寫幾十篇文，本人可係16隻都爆機，雖然好基本），亦唔係講本香港漫畫（我居然儲過七色封面）。（＊）
3. 而係，套戲，《超級學校霸王》。01個記者，應該都仲係太年青。或者冇睇套戲？定只係打錯字？佢話「I.T.老闆娘其實是春美，她媽咪苑瓊丹才是春麗。」—大佬，苑瓊丹，梗係唔係春麗啦！How Dare You！點可能唔記得！
4. 正如《等待果陀》並冇一個叫「果陀」嘅角色出場，《超級學校霸王》根本冇一個角色叫「春麗」。點解？睇落去你就明。但想知苑瓊丹叫乜嘅，維基話到你知，唔使好似我咁入場去睇套戲。未睇嘅，記住去睇，YouTube有成套睇。我諗冇乜人care版權，特別係王晶嘅版權，right？
5. 呢套戲，唔算係我一生嘅污點。我入場睇過嘅爛片不少，遠啲嘅有《笑詠春》（堅爛到仆街，自己上網搵），近啲有仲上緊，衞詩雅嘅《熟女愛漫遊》，完全就係一套東京版嘅《笑詠春》。呢套《超級學校霸王》，雖則爛，但都未去到嗰啲級數
6. 但呢套戲，絶對係香港嘅污點。我估仲係好多明星嘅污點。我好有興趣，羅美薇有冇睇過呢套戲（或者，佢地啲賓賓有冇睇）。
7. 套戲，我係在美麗華戲院睇嘅。就當然係香港！唔係台北！唔好睇咁多《春嬌救志明》。咁你大約估到了，冇錯係尖沙咀，諾士佛台個位。我而家先知呢間戲院歷史好短，93年開，03年執，應該唔少同我年紀嘅人去過。而我當年唔知，我去睇《超級學校霸王》嗰時，間戲院新開兩個月（93年7月）
8. 套戲有幾污點？其實好能夠代表香港。求其，惡俗，只講包裝，唔尊重版權，乜都炒埋一碟。就真係fuck that 當年啲戲好有誠意。呢套戲都收2000萬，咁其實都未入票房十大。
9. 你見，真係星光摺摺（特登打錯）。四大天王包咗三個，但郭富城只係出咗一陣（幾咁求其，係咪有第套戲拍？果年佢拍6套戲，得呢套過千萬票房）。仲有香港奇雲培根任達華，唔知點解做咗主角嘅張衞健（我估因為得閒？），奸角嘅鄭伊健許志安，睇女有劉小慧楊采妮。咁你鍾意睇邱淑貞都得。當然睇苑瓊丹都可以。
10. 老嘢，仲要有埋周比利盧惠光段偉倫吳耀漢同阿叻（點會冇佢？），有阿叻你就知真係香港精神。飾演聖育強中學運動會評訹，可想而知品味幾咁惡俗。但都唔夠苑瓊丹揭曉到底「春美」老母（即係佢）叫乜名咁惡俗。
11. 套戲有幾混吉？其實講故事，都唔係真係十分非常差嘅，係有情節的。
12. 但點解污點？首先，套戲，係完全冇拎授權嘅。香港人好尊重創作呀可？亦都因為咁，套戲根本冇「春麗」，只有「春美」。冇軍佬古烈只有掃把頭，冇域加／巴洛克只有鐵面，達賴爾變咗發達星（換著而家就畀人話歧視了），最正都係E Honda 變咗 Toyota．如果而家應該係 Tesla，或者Nikola
13. 仲有，呢套戲，完全係當年嘅香港精神，茶餐廳文化。乜撚嘢都炒埋一碟。何止有唔經授權嘅街霸？仲有叮噹！I mean，冇叮噹呢個角色，但有大雄！仲有忌安！—媽的，我幾肯定，呢套戲許志安從影多年代表作之一！真的—不過，明明個造型就抄阿福。是但啦。
14. 唔止，到最後（係呀，劇透呀點丫），張衞健，aka余鐵雄大法官，仲會變身做悟空！當然亦係冇拎授權，咁你可以話問吳承恩拎咗嘅。
15. 我唯一想知嘅係，呢套戲到底拍咗幾耐？我估好快手，大明星好忙。而王晶亦出名快手。而家當然人人話佢爛，但亦冇人可以否認，當年《賭神》《新哥傳奇》《整古專家》（早排先重睇！RIP 新哥！）十分好睇。其實《鹿鼎記》《新哥傳奇》（上下集！）《赤裸羔羊》都係92年嘅戲，可以講93年呢套戲，王晶就開始勁跌watt—但佢93年一樣都拍咗7套戲。固然而家啲乜乜文青導演十九幾年磨一劍，但掉轉頭，拍得唔好嘅，至少夠快，夠多，都係技能嚟的。明顯我講我自己。
16. 呀，勸世文嘛。十分慚愧，我好似睇咗套戲兩次。咁固然當年啲品味比較低（而家都係），但點解睇多次？就係睇，劉小慧同楊采妮！喂，show some respect，93嘅劉小慧楊采妮喎！固然唱歌十分難聽，但佢兩個嘅碟我都有買，兩個都唔只一隻，我就係fans（亦都fuck that 當年啲歌手好有實力）。喂，劉小慧同楊采妮著校服扮學生妹喎。你估下佢地老公有冇拎返出嚟睇？
17. 仲有，首歌，張學友嘅，《總有一天等到你》，亦係好歌，但張學友好似唔太多在演唱會唱。照計你搵人數張學友，廿首，三十首，甚至五十首，都未必首到呢首吧？
18. 教訓係乜？王爾德話頭，我地都在屎坑中，但有人選擇仰望星空。改變唔到世界，就改變你自己，改變唔到你自己，就改變你嘅諗法。
19. 再講白啲，今日端午節，屈原話嘅（其實唔係）。條河乾淨嘅，你咪洗腳皮。條河污糟嘅，你咪洗包皮！套戲好睇嘅，咪睇戲。唔好睇嘅，咪睇楊采妮睇劉小慧聽張學友咯。
20. 我是十分認真的，香港呀，政治呀，世界呀，都係如此。有啲人總係見到唔好嘅嘢，但我就見到啲美好嘅嘢，例如93年著校服嘅楊采妮同劉小慧。
21. 咁當然啦，其實93年，我係特登由屯門出到去尖沙咀入屎坑，然後先唯有仰望星空嘅。根本就可以唔跳入屎坑。拉什廸/魯殊廸（Salman Rushdie，友版飛田新地嘅偶像）話頭，well, you have done a lot of work to be offended （https://bit.ly/3dvZ7ci）
22. 呀，for those 懶過西嘅，苑瓊丹，春美老母，叫乜？自己睇，（https://bit.ly/31pA34v），1:25。
（＊）可能有啲人會少少奇怪，畢竟埃汾係學霸，而學霸好似唔會做呢啲嘢，至少我學校另外三大學霸都冇。但呢度唔係講埃汾天資幾高，而係想講，我係一個火麒麟（＊＊）周身癮嘅人。好聽啲就係好奇心旺盛（似企鵝），興趣多。我中學成績咁好，明顯因為未有得上網，我遲十年出世應該就唔會係學霸。證據？我去到大學成績就一落千丈，勉強拎個碩根撈華。原因？除咗溝女（中學都溝啦，溝唔到之嘛），主要就係因為上網。上網做乜？就係寫文。寫咩文？其實同而家冇乜分別，而家附注嘅東西，當年係正文。
（＊＊）無獨有偶，應該係93年7月，我睇《超級學校霸王》咁上下時期，我一生人第一次自己買嘅鹹書，就係《火麒麟》，明顯係佢召喚我。甚至唔係《龍虎豹》，而當年亦未有定未夠錢定未識咩Beppin之類。不如有機會寫多啲呢啲。但講返，我買完嗰本《火麒麟》，仲去咗華都（屯門）租咗套《天龍八部》返屋企睇。果然係《火麒麟》周身癮，又要睇鹹故（唔通睇相？）又要睇金庸。又，唔好膠，《天龍八部》（＊＊＊）當年係五本書，如果冇記錯，神鵰射鵰都係四本。
（＊＊＊）忍唔住再講。當年另一中學同學，都睇緊《天龍八部》。有次唔知佢串親我定乜，結果我爆咗《天龍八部》個結局畀佢知，踢爆咗主角身世之謎，佢掩耳都掩唔切。我深感後悔，唔明白自己點解可以做出咁惡毒嘅事。我好似咁耐都冇同佢道過歉。其實我地在中學同學whatsapp群都仲有傾計，希望佢睇到呢篇文。自此我亦明白咩係「劇透死全家」。但我估，佢應該唔記得咗呢件事。嗯，魯迅呀，《風箏》— 『有過這樣的事麼？』他驚異地笑著說，就像旁聽着別人的故事一樣。他什麼也記不得了。
————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。
入面有埋圖，有埋恒指標普目標價，教埋資產配置，有埋6隻心水股。有港股有美股有大有細。
請去呢度睇：https://bit.ly/37S4iC5
課程編號：CC002
客服whatsapp: 63832145
東京雲妮媽咪 在 中薬・生薬・漢方｜人在東京 雲妮媽咪 (中医国際薬膳師) - Pinterest 的推薦與評價
雲妮媽咪 さんのブログテーマ、「中薬・生薬・漢方」の記事一覧ページです。 · Más como esto ... ... <看更多>