上星期講我打算去做Food Panda，好多人以為我講笑，但我今日已經開左工喇😂
呢個體驗，只需要200蚊加上你既時間，但我諗唔會有人想大熱天時三十度去做到身水身汗，所以等我分享比大家知啦
1）是日工作時間11-6
2）搵幾多？比我預期多，成700蚊
3）我做左幾多單？23單
4）攰唔攰？我可以形容，同疫情前去日本陪老婆行足一日shopping咁攰⋯⋯
5）難唔難接單？我做完之後會叫少好多外賣，根本單接單無停過，廁所都無時間去
6）其實唔需要去廁所，因為汗都流晒出黎🤭
7）最難既單係咩？送日用品，兩大袋，重到我要搭巴士過幾個街口
8）最輕鬆係咩？接左張餐廳係個客對面，我由接到送到都只係十分鐘，都成廿幾蚊🤑
9）是日飲左兩支寶礦力，兩支700ml既水
10）我以後都唔駛比錢gym，想操同減肥就送外賣，仲有錢收
11）客有冇禮貌？全部都好好禮貌，但鬼佬最nice，笑住咁出黎拎同講88
12）有冇西客？其實無，勉強講就係一個叫左個點心既，送到樓下先取消，但其實我好快就到左，我都照上去諗住照比佢，佢開門講左句取消左就關左門
13）咁個點心點算？係我背囊放左幾個鐘，都無職員同我講點做好，所以我食左，大不了比錢，反正我餓
14）有冇西舖？暫時唔覺，可能我好彩，全部都好好聲氣
15）最遠行幾遠？油麻地去大角咀
16）有冇趣事？一間食店叫左另一間既外賣，我入到去佢以為我拎外賣，搞左一陣先知有同事係奸細
17）有咩唔好叫？凍野都唔好叫，我見住杯有雪糕既飲品融晒，望到我都過意唔去⋯⋯保溫袋都無用嫁！
18）有冇甩漏？有一個麵我打瀉左少少湯，嚇到我，遞比佢個陣我先發現，sms左個客同佢講唔好意思，佢話小事唔緊要
19）我同時接左三張單，唔係我想⋯⋯我唔接會扣人工，接完之後其實佢既路線都係make sense既，但始終都係算法，計唔到好多意外
20）意外係？去到樓下部電梯壞左，客係15樓⋯⋯心諗有冇咁黑啊，打比客，佢派左個仔落黎拎，八九歲左右，年輕真好，十五層都面不改容！
21）要同一個等pizza既人講聲唔好意思，因為要等客搞到遲左，我好明肚餓叫左外賣等到唔餓個種感覺，cut單都好合理，如果睇到既pm我我請你食pizza（唔好白撞）
22）仲會唔會做？我諗一星期最多一兩次當做下運動都唔錯，我諗我都係係冷氣房打字舒服d
23）利申，無廣告，如果foodpanda想搵我賣廣告請pm！
24）表面野講住咁多先，體會方面既野之後再寫文講！
25）依家我係按住腳咁打，見到有按摩師傅叫外賣，我心諗，我送外賣咁辛苦比錢你按摩，你按摩咁辛苦又比錢叫外賣，這就是互相傷害吧！師傅，唔該大力少少，我真係好攰啊！！
是日工作 在 林奕匡Phil Lam - 是日休息絕不工作(Official MV) - YouTube 的推薦與評價
林奕匡（Phil）早前推出新作〈 是日 休息絕不 工作 〉, 想帶出「今天要休息, 不要 工作 」的輕鬆生活態度, 日前Phil為新歌拍MV, 但今次絕不輕鬆, 他更指是 ... ... <看更多>