【大嶼皇帝本紀（四）明日大嶼：香港空前絕後的遷都計劃】
之前一連三篇一直提出，所有反對明日大嶼人士嘅問題，就係成日都孤注一擲作為反對填海嘅最強論點：咁作為共產黨好簡單，只需要令成個計劃唔超支，又或者斬件上檯令市民感覺上有利可圖，咁反對聲音就會減滅大半──於是香港我哋家有限公司主席王兟就撲出黎提出眾籌分擔政府開支成本，完全將董建華套老舊基建方案比下去。
即使目前政府無話全盤接收王兟建議，但已就公私合營大開綠燈，咁剩番落黎嘅問題就只剩番：憑空起一個人工島點會值錢？王兟計劃眾籌成千億邊有發展商咁蠢會落搭？
呢樣嘢我地可以由紅色資本早排響香港不停投地開始講起。眾所周知，中共而家對香港就係實行殖民換血策略，其中一個手段就係搶哂香港啲黃金地段，將傳統華資地產商邊緣化。
後來佢地發現，咁樣做好無效率之餘，華資地產商本身囤地嘅數量係就算佢地停止投地幾十年，都一樣可以響土地供應上面扮演舉足輕重嘅角色。而更加唔駛講嘅就係因為內地經濟放緩，好多紅色鉅企接連爆煲，又或者要將資金調去其他地方救火，所以搞搞下，你又發現紅資搶地熱潮比起幾年前冷卻咗唔少。
但咁樣並唔代表中共經已放棄紅色資本搶地計劃，只不過與其同有大把地揸手嘅四大地產商競爭，點解唔索性填海起個新城市出黎？而家政府就響度呃大家話明日大嶼主要係愛黎起公屋，然後就有班傻西走去附和「起完啲公屋夠50萬人住，咪就係比呢十年申請黎香港嘅大陸人住哂囉！」
當你以為明日大嶼會係第二個天水圍？人地經已打算成為第二個中環。
喂而家明日大嶼講緊嘅配套係用高鐵連結大灣區，人地大陸人落黎香港直頭唔駛驚羅湖皇崗過關，而係直入人工島入境；作為典範，響人工島落成一刻，成個政治總部、立法會同高等法院就會集體搬哂入去；各大中資鉅企自然都會將總部設響島上面；島上大部份起成高密度商業區兼中上產住宅，再加部份公屋養住班為有錢人服務嘅基層。
跟住我想問，任何響中環、西九呢啲商業區攞住哂啲甲級寫字樓，仲有乜嘢意思？中資如果可以一舉控制香港新首都，相比起黎幾千億又算得係乜嘢？到時四大地產商大量拋售囤地套現，香港高地價政策亦可正式宣佈玩完，唔計大量中產跳樓燒炭，香港人人有平樓住，都未嘗唔係一件好事。
聽落好似好理想，但問題仲有一個，就係香港對中央究竟有乜取態。明日大嶼提出當日，香港仲未有反送中抗爭，中共可能仍然對於香港嘅獨特性有所期待。但而家蒼天已死，國安當立，香港特殊價值消失，中共可能索性將香港矮化成一個邊緣城市；中產爭相賣樓移民、外商撤資，亦可能令興建新首都嘅重要性大減。
但政治一日都嫌長，明日大嶼要正式動工，起碼仲要幾年時間進行各式各樣嘅前期工作，如果到時中共態度有變，王兟嘅眾籌計劃就可以立刻上馬，到時一戰功成令香港建新都，佢作為大嶼皇帝自然名留千古，響各大報章刊登嘅頭版廣告費，自然係濕濕碎了。
https://www.patreon.com/posts/da-yu-huang-di-46605151
明日大嶼反對論點 在 學者對反對聲音之全面回應。希望了解明日大嶼所爭何物者必須 ... 的推薦與評價
質疑「明日大嶼」方案增闢1700公頃土地的論點主要有四個：首先，土地供應專責小組（以下簡稱土供小組）的報告，認為香港土地短缺約1200公頃，上屆政府 ... ... <看更多>