［閱讀後感］週末休息（其實係你地休息，我週末仲忙，睇書寫文同埋訓覺）。求其寫啲．
因為睇晒報紙，馬哈蒂爾本《The Malay Dilemma》又越睇越悶。咁星期五打邊爐，知唔知要有乜呀？梗係要有讀物啦。最後買本信報財經月刊睇
有睇我平時貼啲嘢都肯定有留意我日日睇信報（十蚊一日架），但信報財經月刊怕怕。主要係N年前睇過，悶到仆街。但我都唔記得係幾多十年之前。
咁正如我中學年代一樣覺得信報悶到仆街，甚至經濟日報都係。中學年代只睇蘋果同明報。拿，明報又OK喎，又唔覺悶喎。所以明顯地我其實係個金融盲。甚至去到大學時我都唔係好知金融嘅嘢，中國移動幾多號冧把我去到做銀行先知。
到我做銀行時就開始睇信報啦，咁梗係唔覺得悶啦。
所以證明，都係屎忽指揮腦袋。至於後來點樣做嗰行厭嗰行就後話（但你見我其實而家都仲成日寫，就都未真係好厭嘅）
講返本嘢，你地可能以為係個封面故事吸引我，因為我呢排都寫緊類似嘅東西。但其實信報本身都有寫類似嘅嘢（咪又係嗰班友），所以主要都真係因為打邊爐冇書睇
咁睇落睇落，丫，OK好睇喎，可以跟進喎。唯一嘅問題（亦係所有人嘅問題）就係時間得咁多，睇得呢樣唔睇得嗰樣，我自問已經睇好多東西。
另外其實想講，嘩屌，四十五蚊本。「當自己economist呀」 (後來我返屋企，即係而家，拎本Economist上手先知而家賣九十蚊。我係訂戶就梗係唔係呢個散買價啦下，所以唔知價，後話）
嗰一刻係覺得，嘩，你當自己Economist咩。咁就梗係買得起啦，咪玩。但，「自己Economist咩」
但然後我再諗下，其實好多其他濕鳩雜誌都要三十四蚊本架啦。咁以信報財經月刊嘅水平，即係唔係話直竪舞子，但又冇理由話四十五蚊貴啫。叔叔叫隻扇貝都唔止啦，幾撚咁荒謬呢。
然後再同時諗，其實（當其時我以為賣五十幾六十蚊）Economist真係好Q抵睇。你睇人哋嗰啲文幾咁高質，真係嚇都嚇死人
（題外話：我唔知佢地有冇自己分析過，Economist嘅文，明顯比起十幾廿年前我初睇時，短同淺咗唔少。咁淺咗你可以話因為我勁咗，唔係乜都唔識嘅學生。但短左應該客觀量度到。另外佢地亦都用少左好多外文。係架，以前成日都要整啲拉丁文葡文term，冇註解的）
所以講咗咁多，幾個結論。
1:價值可以係相對嘅，你同其他嘢拍埋比，自然知道抵唔抵。個危險當然係可以成堆嘢同時underpriced （例如你心目中嘅自己）或者同時overpriced（你老細心目中嘅你哋）。
2 :唔好話香港，全球嚟講，賣文都係慘撚過西。仲係有極多人好驚訝我日日科水買報紙。唔止，我訂埋電子版添。仲有訂Economist 同 FT添。Medium添．可能訂 WSJ添
有人覺得，喂，夾埋成皮野喎（計得到啦）。問題係，你一年去幾次旅行都止呢個數啦，一個月食少餐貴飯都返嚟啦。但你肯定你去四國睇漩渦開眼界會多過你去多閱讀？
3. 但當然，其實唔係個個咁反智（雖則都有唔少人）。
優質資訊咁賤（收你一舊水一星期仲唔賤？你去嫖妓打個冷震都成千銀啦大佬），唔係因為人唔要資訊。而係因為，劣質而免費嘅嘢太多。而好多人根本唔介意—亦講真，好多時唔係咁易分。
（循例利申：我都覺得好反智，但再講一次，絶無收受任何利益，呢份嘢嘅入面人，我識都唔識）（作者就有個別我識，但唔係果回事）
