《開估：我同爸媽去左紐西蘭呀》
記得細時第一次出國係跟團去日本。嗰陣八歲。爸爸係咁叫我買野，但係我唔知怕咩羞，其實好想買部玩具指甲油機，但唔敢出聲，最後只係買左個龍貓公仔。仲記得喺Hello Kitty Land 玩到忘我，唔記得左出口喺邊，盪失左路。行到出去，見到我地架旅遊巴走左。我當時好驚，喊到癲左。但係爸爸同我講：「使乜驚，爸爸媽媽都喺度。」然後喺日本街頭行到攰，爸爸就會抱我，我就會好安心咁訓著左。
轉眼間，爸爸今年已經75歲。呢幾年帶佢地去左好多旅行。但係角色完全轉換左。自由行真係好辛苦。由出發前book機票酒店、安排行程到旅行開始，睇地圖、搵路、餐廳叫餸食飯都要自己搞掂。但每次去完旅行見佢地睇住d相係咁回味，就好想再帶佢地去旅行。今次黎紐西蘭都係即興見到平機票衝動之下作出嘅決定。所以事前無做足功課。今日去左好多電影嘅拍攝場景教堂海灣，去之前淨係見到相好靚。開車去到先發現要行45分鐘路程。中間要上斜落斜仲要行樓梯。媽媽拎住柺杖行得好辛苦，我叫左佢幾次不如放棄啦，行返轉頭。但係媽媽都話：「我得架，慢慢行就得。唔去睇少好多野。」45分鐘嘅路我地行左個幾鐘。但係我發現慢慢行嘅時候，睇多好多野。世界好似用慢鏡播放咁。見到平時唔會注意到嘅花花草草，仲有花花草草上面嘅昆蟲。原來世界上咁多奇形怪狀嘅植物。然後隻蟲飛左上媽媽個頭，見到媽媽成頭白髮。呢個媽媽同廿年前去日本嘅媽媽嘅外表唔同左好多。除左成頭白髮之外，媽媽矮左，定係我高左呢？我捉住媽媽隻手，以前佢隻手包實我隻手，而家到我捉返緊佢。不過外表點唔同，媽媽仲係善良嘅媽媽。由細到大，媽媽都無做野，細細個帶我走遍香港。小學中學日日都會煮早餐同午餐畀我，風雨不改。識我嘅朋友都一定識我媽媽。大學嘅時候住宿舍，佢會無啦啦朝早出現話要幫我執房。（利申：我無點媽媽架）去旅行嘅時候，佢坐飛機一定坐中間，佢話咁樣我同爸爸就可以用佢膊頭做枕頭。每次去到酒店，去完個廁所出黎，媽媽已經主動幫所有手機相機充晒電。媽媽嘅細心程度已經唔係常人可以理解。大家仲記唔記得椰青的故事😂（https://www.facebook.com/whereisfaroeislands/posts/304341550038341）前幾年去算命，佢話媽媽係善良嘅人，會長命百歲。係就好啦☺️因為我仲想帶佢去好多旅行，計劃緊下年帶佢同爸爸去法羅群島！
爸爸話佢有睇我個page，佢話我成日寫錯字，又用口語，不中不英咁 XD 但我知其實佢係我忠實粉絲。上禮拜同佢慶祝生日嘅時候，佢同舅父講：「我個女話佢搵到幸福啦。」爸爸一直唔係好支持我同大地之子，佢講呢句嘅時候我真係眼濕濕。佢有次投訴我做咩淨係寫同大地之子嘅故事，佢同媽媽就隻字不提。我份人怕羞，唔會成日同佢地講我愛你。但我係好多謝你地架，希望你有睇呢篇啦。我應承你地，就算你地以後行得幾慢，都會繼續同你地去旅行。
今日去完教堂海灣，爸爸話：「真好，又完成左一程路啦。」嗯❤️
---------------------------------------------------
想睇更多法羅群島靚相同我同大地之子仲有魚蛋嘅日常大小事，請follow ig: whereisfaroeislands
https://www.instagram.com/whereisfaroeislands
