《微縮模型》陳心遙
《信報》2018年2月28日《視線所及》專欄
一連有兩個微縮模型嘅展覽，相信好多朋友同我一樣都鍾情呢啲微縮模型。細細個企喺模型舖門口，睇住啲火車穿梭車站、郊野同埋山洞，合乎比例嘅迷你人仔，神情、姿態、動作各有唔同，可以睇好耐都唔厭。連帶新樓售樓處嗰啲模型我都好鍾意睇。
首先係第一次嚟香港開展覽嘅日本藝術家田中達也。你唔能夠唔佩服佢嘅毅力，唔知由幾時開始，佢每日都會做一件微縮模型。佢嘅創作模式係用上一件實物，成為個模型嘅環境或者道具，再用人仔去呈現效果。三百六十日風雨不改咁做，睇都睇唔晒。佢嘅作品睇落好有詩意。譬如佢會用綠色嘅一件冷衫，上面放啲迷你模型馬仔，冷衫即時成為一片綠油油嘅草地。另一件作品，將一本筆記簿打開，喺上面放上好多架迷你單車，串起筆記簿上嘅一個個小鐵環，就變成一個單車泊車位，匠心獨運。仲有一件更簡單，佢用兩塊SD卡呈45度角黐埋，加上腳同埋演奏嘅人仔，SD卡就成為一部鋼琴，因為SD上面嘅凹槽好似琴鍵一樣。此等心思，一定係一個好留意生活細節嘅人先會有。如果田中先生唔係做模型，定必係一位擅長寫景訴情嘅俳句詩人。
另一個就係由一班香港藝術家同情景模型愛好者嘅綜合展覽，共通點係每位都以香港大街小巷、風土文物做題材。好多係已經消失咗喺現實世界嘅地方嚟：摩星嶺徙置區、利東街、九龍城寨等等。另外又有今日已經買少見少，拆得一間得一間嘅小舖，玩具店、綉鞋舖、鐘錶行、藥材行、冰室、上海飛髮舖，洋洋大觀，好似要將往昔嘅香港由時光隧道搬返出嚟咁樣。唔使講都知，造一件情景模型要花嘅心思同時間有幾多，同做其他藝術行業一樣，收入與付出肯定不相稱，冇「愛」係唔可能成事嘅。但情景模型呢樣嘢，仲見到各個藝術家對香港嘅愛，一份唔係香港人唔會理解嘅情懷。凡係呢啲情景模型，唔多會係金雕玉砌嘅豪宅家居，連鎖店林立嘅大型商場，反而會係攙滿塵垢嘅舊街道、舊布景，只有呢啲布景先至有回憶、有微笑同眼淚。
從水泄不通人流可見，呢個展覽大受歡迎，參觀嘅人不限年齡，除咗特登嚟影相嘅龍友，更多係三五知己、對對情侶、一家大細、扶老攜幼嚟睇。情景模型真實呈現香港風物，我覺得就算擺喺博物館長期展覽都冇問題，但凡真正對香港有興趣嘅遊客都會鍾意觀賞。
#微縮模型 #情景模型 #田中達也# #信報 #陳心遙
摩星嶺泊車 在 衝上摩星嶺！(探險日#23) - YouTube 的推薦與評價
45度斜路！大家中度小心頭暈呀！多謝支持呀！:D片頭片尾音樂: Naron - ImaginationFollow me on Instagram: hkmonkeyrider@Minenoyuki. ... <看更多>